Ku bokona mu madisá

Ku bokona mu madisá

Jimbangi ja Jihova

Select language Kimbundu

Musoso 35: Jihova u Bhana o Itumu iê

Musoso 35: Jihova u Bhana o Itumu iê

KUA bhitile mbeji jiiadi tundé kia tundu ku Ijitu, akua Izalaiele a bhixila ku Mulundu ua Sinai, a uixana ué Holebe. Kiene o kididi kimoxi bhua zuelele Jihova ni Mozé mu kisasa kia uama. Athu akexile bhenhobho mu thembu iofele.

Kioso athu kia kexile mu kingila, Mozé ua bandele ku mulundu. Ku thandu dia mulundu, Jihova uambela Mozé kuma Muéne ua mesena kuila akua Izalaiele a Mu belesela ni a kala mundu Uê ua kazola. Kioso Mozé kia tuluka, ua tangela akua Izalaiele ioso ia mu ambela Jihova. O mundu exi, tua-nda belesela Jihova, mukonda ene a mesenene ku kala mundu uê.

Kindala, Jihova ua bhange kima kia madiuanu. Muéne ua bhange ku tunda dixi ku mulundu, ni ua tumikisa inuminu ionene. Muéne ua tangela o mundu: ‘Eme ngi Jihova, Nzambi ienu ua mi katula mu Ijitu.’ Kienhiki, muéne ua a tumina: ‘Ki mu bheze nzambi jengi, kala eme ngó.’

Mabaia a iiadi a matadi

Nzambi ua bhana dingi dinake dia ijila, mba itumu ku akua Izalaiele. Athu akexile ni uôma uavulu. Ene ambela Mozé: ‘Zuela eie n’etu, mukonda tuala ni uôma, se Nzambi u tu zuelela tua-nda fuá.’

Anga Jihova u tumina Mozé: ‘Banda ku mulundu. Eme nga-nda ku bhana mabaia aiadi a matadi, ku nga soneka o itumu, i nga mesena kuila o mundu ku i kumbidila.’ Kienhiki, Mozé ua bande dingi ku mulundu. Muéne uakexile koko mu 40 a izuua ni usuku.

Nzambi uakexile ni itumu iavulu phala o mundu uê. Mozé ua soneka o itumu ioso ienii. Nzambi ua bhele ué kua Mozé mabaia a matadi aiiadi. Mu mabaia aiiadi, Nzambi ua soneka 10 dia itumu ia zuelele ku mundu uoso. Ene a ixana Kuinhi dia Ijila.

Mozé ku Mulundu ua Sinai

O Dikuinhi dia Ijila íii itumu ionene. Maji kuexile ué Itumu iavulu ia mukuá ia bhele Nzambi ku akua Izalaiele. Kimoxi kiexile: ‘Eie kala u zola Jihova Nzambi iê, ni muxima uê uoso, ni kilunji kiê kioso, ni muenhu uê uoso, ni nguzu iê ioso.’ O kia mukuá kiexile: ‘Kala u zola mukuenu kála eie muéne.’ Jezú Kristu, o Mon’a Nzambi uambe kiki, o Itumu iiadi ienii, ia bhele Jihova ku mundu uê, Izalaiele, ia beta-kota. Tua-nda dilonga dingi maka a lungu ni Mona Nzambi ni ilongesu iê.

Makatukilu 19:1-25; 20:1-21; 24:12-18; 31:18; Matendelelu 6:4-6; Ijila 19:18; Matesu 22:36-40.



Ibhuidisu

  • Mu mbeji jiiadi kioso kia xisa Ijitu, kuebhi kua kexile akua Izalaiele?
  • Ihi ia mesenene Jihova ieji bhanga o mundu, ni kiebhi kia tambuijila ene?
  • Mukonda diahi Jihova ua bhana kua Mozé matadi aiadi a mabaia?
  • Kua kexile kiá o Dikuinhi dia Ijila, itumu ia kamúkua iahi dingi ia bhanene Jihova ku akua Izalaiele?
  • Itumu iiadi iebhi ia makota ia zuela Jezú Kristu?

Ibhuidisu ia mukua

  • Tanga Makatukilu 19:1-25; 20:1-21; 24:12-18; ni 31:18

    Kiebhi o izuelu io soneke mu divulu dia Makatukilu 19:8, i tu kuatekesa o kuijiia ihi ia bhingi phala ku di bhakula kála Kidistá? (Mat. 16:24; 1 Phe. 4:1-3)

  • Tanga Matendelelu 6:4-6; Ijila  19:18; ni Matesu 22:36-40.

    Kiebhi o Jikidistá edikisa o ku zola Nzambi ni akuâ? (Mar 6:34; Ikalakalu 4:20; Lom. 15:2)