ZUZE ka tenene dingi ku di kondeka. Muéne ua tumina o jiselevende jê ku tubhuka bhu kanga. Kioso kia xala ubheka-uê ni jiphange jê, Zuze ua mateka ku dila. Tu tena ku xinganeka kiebhi o jiphange jê kia divuile, mukonda ene kejidile, se muéne ua mu didila’hi. Mu kusukáko, muéne uixi: ‘Eme ngi Zuze. Tat’etu iú ué hanji ni muenhu?’

O jiphange jê a sasumukine katé ué a lembua ku zuela. Ene akexile ni uôma. Maji Zuze ua ambela: ‘Nga-mi dióndo, zukamenu kuku.’ Kioso kia zukama, muéne uixi: ‘Eme ngi phang’enu, Zuze, mua ngi sumbisile mu Ijitu.’

Zuze ua suluka ni ku zuela ni henda: ‘Ki mu di tatele mu dienu mu ku ngi sumbisa kuku. Nzambi ua ngi tumikisa ku Ijitu phala ku bhulula o mienhu ia athu. Falaó ua ngi bhange nguvulu ia ixi ioso. Mu kienhiki, vutukenu kua tat’etu mu tangele’nu ioso ia bhiti. Ambele’nu tat’etu eze mu tunga kuku.’

Zuze ua dilekela ni jiphange jê iu ua a bejala. Kioso Falaó kievu kuma o jiphange ja Zuze ia eza, uambela Zuze: ‘Ambatenu o jikalosa, ndé-nu mu takane tat’enu ni miji ienu, neze kuku. Nga-nda ku a bhana o ixi iambote mu Ijitu.’

Kiki kiene kia bhange. Bhabha u tena ku mona Zuze ku disanga ni tat’ê kioso kia bhixila mu Ijitu ni muiji uê uoso.

O muiji ua Jakobo uexile uonene. En’oso exile 70 a tungile mu Ijitu, Jakobo ni an’ê, ni alaúl’ê. Maji endele ué ni ahatu ni jiselvende javulu. En’oso iâ endele mu Ijitu. Ene a exanene akua Izalaiele, mukonda Nzambi ua lunguluile o dijina dia Jakobo, iu ua mu luku Izalaiele. Akua Izalaiele a kituka mundu ua kazola ka Nzambi, kála ki tua-nda mona ku pholo.

Dimatekenu 45:1-28; 46:1-27.

Zuze ni muiji uê


Ibhuidisu

  • Ihi ia bhitile kioso Zuze kia tangela o jiphange jê se muéne nanhi?
  • Ihi ia tangela Zuze ku jiphange jê ni henda ioso?
  • Ihi ia zuela Falaó kioso kiévu kia lungu ni jiphange ja Zuze?
  • Athu akuxi akexile ku muiji ua Jakobo kioso kiendele mu Ijitu?
  • Kiebhi kiexanene o muiji ua Jakobo, ni mukonda diahi?

Ibhuidisu ia mukua

  • Tanga Dimatekenu 45:1-28.

    Kiebhi o musoso ua Bibidia ua lungu ni Zuze uidikisa kuma, Jihova u tena ku bhanga kuila se a mesena ku bhanga kiaiibha ku jiselevende jê, i kituka mbote phala ene? (Dim. 45:5-8; Iza. 8:10; Fil. 1:12-14)

  • Tanga Dimatekenu 46:1-27.

    Kikanenu kiahi kia bhele Jihova kua Jakobo mu njila iê ku Ijitu? (Dim. 46:1-4)