Ku bokona mu madisá

Ku bokona mu madisá

Musoso 22: Zuze a mu Takula mu Kaleia

Musoso 22: Zuze a mu Takula mu Kaleia

ZUZE uakexile ngó ni 17 dia mivu kioso kia mu ambatele ku Ijitu. Kuenhoko, a mu sumbisa ku diiala a mu ixana Potifale. Potifale uakexile mu kalakalela sobha ia Ijitu, a mu ixana Falaó.

Zuze mu kaleia

Zuze ua kalakalele kiavulu phala o ngana iê Potifale. Kienhiki, kioso Zuze kia kulu, Potifale ua mu tumina ku tambula konda ia dibhata diê dioso. Mukonda diahi-phe, tua mu mona Zuze mu kaleia? Mukonda dia muhatu a Potifale.

Zuze ua kulu, iú uexile diiala dia uabha, o muhatu a Potifale ua mesenene ku zeka nê. Maji Zuze uejidile kuma kiki kituxi, ka mesenene ku ki bhanga. Kienhiki, o muhatu a potifale ua dizangalele kiavulu. Mu kienhiki, kioso o muadi uê kia bhixila kubhata, muéne ua mu tangela makutu, uixi: ‘Zuze iú muthu uaiibha, ua mesene ku zeka ni’me!’ Potifale uévu muhatu’ê, iu ua dizangala kiavulu ni Zuze. Kienhiki, ua mu takula mu kaleia.

O mulangidi ua kaleia ua mono kuma Zuze diiala dia mbote. Kienhiki ua mu tumina ku tambula konda ia jipelêzu joso. Mu suluka, Falaó ua dizangalele ni kopelu, ni padelu iê, iu ua a takula mu kaleia. Saí usuku, ene kiiadi a lotele nzoji, maji kejidile o kijimbuluilu kia jinzoji jâ. Mu kizuua kia mukuá Zuze uixi: ‘Ngi tangelenu o nzoji jenu.’ Anga, kioso kia mu tangela, Zuze ni kikuatekesu kia Nzambi, ua a lomboluele o kijimbuluilu kia nzoji jâ.

Zuze uixi kua kopelu: ‘Mu izuua itatu ua-nda tunda mu kaleia, ua-nda kala dingi kopelu ia Falaó.’ Mbe, Zuze uixi dingi: ‘Kioso ki ua-nda tunda mu kaleia, ua ka tangela Falaó maka alungu ni’me, ni u ngi kuatekesa ku tunda mu kididi kiki.’ Maji kua padelu, Zuze uixi: ‘Mu izuua itatu, Falaó ua-nda ku batula o mútue.’

Kioso kia bhiti izuua itatu, kia bhiti muene kala kia zuelele Zuze. Falaó ua tumine muene ku batula o mútue ua padelu. O kopelu-phe ua tundu mu kaleia iu uakexile dingi mu sidivila o sobha. Maji o kopelu ua jimbie Zuze! Muéne ka tangele Falaó o maka alungu ni muéne, kienhiki Zuze ua xala mu kaleia.

Dimatekenu 39:1-23; 40:1-23.



Ibhuidisu

  • Mivu ikuxi ia kexile na-iu Zuze kioso kia mu ambatele mu Ijitu? Ihi ia bhitile kioso kia bhixila kuenhoko?
  • Mukonda diahi Zuze a mu takula mu kaleia?
  • Mu kaleia Zuze a mu bhana kikalakalu kiahi?
  • Mu kaleia ihi ia bhange Zuze ku kopelu ni padelu ia Falaó?
  • Ihi ia bhitile kioso o kopelu kia tundu mu kaleia?

Ibhuidisu ia mukua

  • Tanga Dimatekenu 39:1-23.

    Ihi ia bhangesa Zuze ku lenga o muhatu ua Potifale, se ki kua kexile lua kitumu kia Nzambi kiambele kuma kuta phanda kituxi? (Dim. 2:24; 20:3; 39:9)

  • Tanga Dimatekenu 40:1-23.

    Lombolola o nzoji ia kopelu ni kijimbuluilu kia bhele Jihova kua Zuze. (Dim. 40:9-13)

    Nzoji iahi ia lotele o padelu, ni nzoji íii ia lombolola ihi? (Dim. 40:16-19)

    Mu lelu, kiebhi o selevende ia fiiele ia dimuka, a kaiela o phangu ia Zuze? (Dim. 40:8; Jisá. 36:9; Nzuá 17:17; Ikalakalu 17:2, 3)

    Kiebhi o divulu dia Dimatekenu 40:20, di tu kuatekesa ku mona se mukonda diahi o Jikidistá ka bhange ji fesa ja mivu ia uvualukilu? (Ndo. 7:1; Mar 6:21-28)