Jakobo ni an’ê

TALA hanji o muiji iú uonene. O 12 kia an’a Jakobo. Muéne uakexile ué ni an’a ahatu. Uejiia o majina a an’ê? Ndoko tuejiie a mukuá.

Liia ua vualele Lubene, Ximinhá, Levi, ni Juda. Kioso Lakele kia mono kuma ka-nda vuala ana, muéne ua luualele kiavulu. Mu kienhiki, muéne ua bhana mubhik’ê Bila kua Jakobo, Bila ua vuala ana aiiadi, a exanene Dane ni Nafitali. Liia ua bhana ué mubhik’ê Nzídipa kua Jakobo, kienhiki Nzídipa ua vuala ué Ngade ni Asele. Mu kusukáko, Liia ua vualele dingi ana aiadi, Isakale ni Nzebulone.

Mu kusukáko, Lakele ua vuala ué mona. Muéne ua mu luku dijina dia Zuze. Anga tua-nda kuijiia dingi maka alungu ni Zuze, mukonda muéne ua kituka muthu uonene. Iâ exile 11 ua an’â a vuala kuala Jakobo, kioso kia tungile ni Labano, tata ia Lakele.

Jakobo uakexile ué ni an’a ahatu, maji o Bibidia i tanga ngó o dijina dia mona umoxi. Dijina diê Dinah.

Kua bhixila ola ia Jakobo ku xisa o dibhata dia Labano ni ku vutuka mu Kanana. Muéne ua bhongolola o muiji uê uonene ni ibhanga ia jimbudi ni ibhanga ia jingombe, iu ua mateka o njila.

Kioso Jakobo ni muiji uê kia kexile kiá mu vutuka mu Kanana, Lakele ua vuala mona ua mukuá. Kiki kia bhitile mu njila. Lakele mu ku vuala ua bhitile hadi, kienhiki muéne uáfu kioso kia vuala. Maji o mona uakexile kiambote. Jakobo ua mu luku dijina dia Bejamí.

Tua-ndala ku lembalala o majina a 12 kia an’a Jakobo, mukonda o kifuxi kia Izalaiele kia tundu kokuâ. O 12 kia diembu dia Izalaiele akexile ni majina a 10 dia an’a Jakobo, ni kiiadi kia an’a Zuze. Izake uakexile hanji ni muenhu mu mivu iavulu kioso kia vuala o mizangala ioso íii, muéne ua sangulukile ni ku kala ni alaúla avulu. Maji tu tale se ihi ia bhiti ni mulaul’ê, Dinah.

Dimatekenu 29:32-35; 30:1-26; 35:16-19; 37:35.



Ibhuidisu

  • Kiebhi kiexanene o kisamanu kia ana a Jakobo a vuala ni muhatu’ê ua dianga Liia?
  • Nanhi exile ana aiadi a vuala selevende ia Liia, Nzidipa ni Jakobo?
  • Kiebhi kie xanene ana aiadi a vuala selevende ia Lakele, Bila ni Jakobo?
  • A nanhi exile ana aiadi a vuala Lakele, ni ihi ia bhitile kioso kia vuala o mon’ê ua kaiadi?
  • Kála ki ua mu mona mu fikula, Jakobo uakexile ni ana mala akuxi, ni ihi ia tundu kua ene?

Ibhuidisu ia mukua

  • Tanga Dimatekenu 29:32-35 ni 30:1-26.

    Kála kia bhitile ni 12 kia ana a Jakobo, kiebhi kiexile mu sola o majina a ana a Jihebeleu mu ukulu?

  • Tanga Dimatekenu 35:16-19 ni 37:35.

    Sumbala o Bibidia i tanga ngó o dijina dia Dinah, kiebhi ki tuejiia kuma Jakobo uakexile ni ana a kamúkua a ahatu? (Dim. 37:34, 35)