Ku bokona mu madisá

Ku bokona mu madisá

Musoso 18: Jakobo Uia mu Halane

Musoso 18: Jakobo Uia mu Halane

EIE uejiia se o maiala iâ a mu zuela ni Jakobo, akua kuebhi? Kia zubha o njila mu izuua iavulu, Jakobo ua disange ni ene bhu fixi. Ene akexile mu kuinga o jimbudi. Jakobo ua a ebhula: ‘Enu mu akua kuebhi?’

Ene a tambuijila, ‘Tu akua Halane.’

Jakobo ua ebhula. ‘Enu muejiia Labanu?’

Ene a tambuijila, ‘Tua muijiia.’ ‘Tala, o mon’ê Lakele ua mu kuíza ni kibhanga kia jimbudi ja tat’ê.’ ‘Ua mu mona Lakele kuná, ua mu kuíza?

Jakobo ua mu mona Lakele

Kioso Jakobo kia mono Lakele ni ibhaku ia sekulu’ê Labano, ua katula o ditadi ku thandu a fixi phala o jimbudi jinuá. Bhenhobho Jakobo ua bejala Lakele, iu ua mu tangela se muéne nanhi. Muéne ua sangulu kile kiavulu iu uai ni lusolo mu tangela tat’ê, Labano.

Labano ua sangulukile kiavulu mu ku kala ni Jakobo. Kioso Jakobo kia bhingile Lakele phala ku kazala-nê, Labano ua sangulukile. Maji ua bhingi kua Jakobo ku kalakala ku díbhia diê, sambuadi dia mivu phala Lakele. Kienhiki, Jakobo ua xikana, mukonda ua zolele kiavulu Lakele. Maji mu ola ia ukaza, uejiia ihi ia bhitile?

Labano ua bhana mon’ê ua dikota Liia kua Jakobo, bhu kididi kia Lakele. Kioso Jakobo kia xikana ku kalakala dingi sambuadi dia mivu, Labano ua mu bhana ué Lakele kála muhatu’ê. Mu thembu iná, Nzambi uehelele o maiala ku kala ni ahatu avulu. Maji mu lelu, kála kidikisa o Bibidia, o diiala ua tokala ku kala ngó ni muhatu umoxi.

Dimatekenu 29:1-30.



Ibhuidisu

  • Nanhi o kilumba mu fikula, ni ihi ia mu bhangela Jakobo?
  • Ihi Jakobo ia bhingile ku bhanga phala ku kazala ni Lakele?
  • Ihi ia bhangele Labanu kioso kia bhixila o thembu ia Jakobo ku kazala ni Lakele?
  • Ihi ia xikana Jakobo ku bhanga phala Lakele ku kala ué muhatu’ê?

Ibhuidisu ia mukua

  • Tanga Dimatekenu 29:1-30.

    Sumbala Jakobo a mu nganala kua Labanu, kiebhi kiedikisa kuma mukuá kilunji? Ihi i tua dilongo ni íii? (Dim. 25:27; 29:26-28; Mat. 5:37)

    Kiebhi kidikisa o phangu ia Jakobo kuila o ku di zola ni ku di uabhela ki kiene kimoxi? (Dim. 29:18, 20, 30; Miku. 8:6)

    A nanhi exile ahatu kiuana akexile ku muiji ua Jakobo, ia a mu vualela ana? (Dim. 29:23, 24, 28, 29)