LOTE ni muiji’ê a tungile ni Mbalahamu mu ixi ia Kanana. Kizuua kimoxi Mbalahamu uambela Lote: ‘Kuku ki kuale kididi kiavulu phala o ibhaku ietu ioso. Nga ku dióndo, ndoko tu di uane. Se uia ku mbandu iéngi eme nga-nda-ia kuengi.’

Lote ua tonginina kiambote o ixi ioso. Muéne ua mono o mbandu ia ixi ia uabha kiavulu, mukonda mua kexile menha ni iangu iambote phala o ibhaku iê. Iexile o Mbanza ia Njolodá. Lote uambatele o muiji uê ni ibhaku iê ioso, uendele ku tunga kuenhoko. Mu kusukáko ene a tungu mu mbanza ia Sodoma.

Athu mu Sodoma aiibhile kiavulu. Íii ia bhangesa Lote ku luuala, mukonda muéne uexile muthu uambote. Kiki kia luualesa ué Nzambi. Mu kusukáko, Nzambi ua tumikisa anju jiiadi, ku tangela Lote kuma ua-nda buika Sodoma, ni mbanza ia zukama Ngomola, mukonda dia kuiibha kuâ.

O ji-anju jambela Lote: ‘Lenguluka! Katula muhatu’ê ni an’ê aiadi, tundé-nu bhabha!’ Lote ni muiji uê, akexile mu landuka mu tunda, kienhiki o ji-anju a kuata ku maku-mâ, ni a a katula bhu kanga dia mbanza. O anju ia mukuá iambe: ‘Lengenu mu bhulule o muenhu uenu! Ki mu sakuke ku dima. Lengenu ku milundu phala ki mu fué.’

Lote ni an’ê aiadi a belesela ni a lengela dikanga dia Sodoma. Ene k’manene, né ngó bhofele, né ku sakuka ku dima. Maji o muhatu ua Lote ua xibhaka. Kioso kia xisa Sodoma, muéne uemanene iu ua sakukile ku dima. Kienhiki, o muhatu ua Lote ua bhiluka philadi ia móngua. Ua mu mu mona mu fikula?

Tu tena ku dilonga disá dia mbote. Íii idikisa kuma Nzambi u bhulula oso u mu belesela, maji oso ka mu belesela u texika o muenhu uê.

Dimatekenu 13:5-13; 18:20-33; 19:1-29; Luka 17:28-32; 2 Phetele 2:6-8.

Lote ua mu lengela dikanga dia Sodoma


Ibhuidisu

  • Mukonda diahi Mbalahamu ni Lote a di xisa?
  • Mukonda diahi Lote ua solo ku tunga mu Sodoma?
  • Kiebhi kiexile athu mu Sodoma?
  • Ngolokela iahi ia bhele o anju jiiadi kua Lote?
  • Mukonda diahi o muhatu ua Lote ua kituka philadi ia móngua?
  • Disá diahi di tua dilongo ia bhitile ni muhatu ua Lote?

Ibhuidisu ia mukua

  • Tanga Dimatekenu 13:5-13.

    Kioso ki tu batula o maka mu kaxaxi ka athu, disá diahi di tu dilonga kua Mbalahamu? (Dim. 13:8, 9; Lom. 12:10; Fil. 2:3, 4)

  • Tanga Dimatekenu 18:20-33

    Kiebhi o ku di bhana kua Jihova ni Mbalahamu, ku tu bhana o kidielelu kuma Jihova ni Jezú a-nda fundisa ni kuiuka kuoso? (Dim. 18:25, 26; Mat. 25:31-33)

  • Tanga Dimatekenu 19:1-29.

    Kiebhi o musoso iú, ua Bibidia ulondekesa kuma kia iibhila Nzambi maiala ku bhanga ufusa ni akuâ? (Dim. 19:5, 13; Iji. 20:13)

    Ihi i tua mono ki ia difu ia lungu ni Mbalahamu ni Lote, mu ku xikana o itumu ia Nzambi, ni ihi i tu dilonga ia lungu ni íii? (Dim. 19:15, 16, 19, 20; 22:3)

  • Tanga Luka 17:28-32.

    Mu kienhiki, ukexilu uahi uakexile nau o muhatu a Lote ua lungu ni jimbote, ni kiebhi íii i sidivila phala ku tu dimuna? (Luka 12:15; 17:31, 32; Mat. 6:19-21, 25)

  • Tanga 2 Phetele 2:6-8.

    Mu ku kaiela Lote, kífua kiahi ki tua tokala ku kala na-kiu ku mundu uaiibha ua tu kondoloka? (Ize. 9:4; 1 Nzuá 2:15-17)