UA MU mona ihi ia mu bhanga Mbalahamu bhabha? Muéne ua kuata o phoko, kala ua-nda jibha mon’ê. Mukonda diahi muéne ua mu bhanga kiki? Kia dianga, ndoko tu tale kiebhi Mbalahamu ni Sala kia tena ku kala ni mona.

Mbalahamu ua mu satela Izake

Lembalala, Nzambi ua a kanene kuma a-nda kala ni mona. Maji kiki ki keji bhita, mukonda Mbalahamu ni Sala a kukile kiá. Mbalahamu ua xikinine kuma Nzambi utena ku bhanga kima kia bhonzo. Kia bhiti kiebhi?

Tundé Nzambi kia bhanene o kikanenu kiê, kua bhitile muvu ua muvimba. Kioso Mbalahamu kiexile ni 100 ia mivu, Sala 90 a mivu, ene a vuala mona a mu luku Izake. Nzambi ua kumbidile o kikanenu kiê!

Maji kioso kia kulu Izake, Jihova ua polovala o kixikinu kia Mbalahamu. Muéne ua mu ixana: ‘Mbalahamu!’ Mbalahamu ua tambuijila: ‘Ngala bhobha!’ Nzambi uixi: ‘Ambata mon’ê, o mon’ê umoxi-élele, Izake, ndé ku mulundu, u nga-nda kuidikisa. Kuenhoko u jibha mon’ê, u ngi bhana nê mu sata.’

Kienhiki Mbalahamu ua luualele kiavulu, mukonda Mbalahamu ua zolele kiavulu mon’ê. Lembalala kuma, Nzambi ua kanena kuila an’â Mbalahamu eji tunga mu ixi ia Kanana. Maji kiebhi kiki kieji bhita se Izake ua fuile? Mbalahamu ka kexile mu ki tendela, maji ua belesele Nzambi.

Mbalahamu kia bhixila ku mulundu, ua kutu Izake iu ua mu tula ku kalatódio ka tungile. Muéne ua katula o phoko phala ku jibha mon’ê. Maji mu kithangana kieniókio o anju ia Nzambi ia mu ixana: ‘Mbalahamu, Mbalahamu!’ Mbalahamu ua tambuijila: ‘Ngala bhobha!’

Nzambi uixi, ‘Kana ku bhanga kiaiibha ku muzangala.’ ‘Kienhiki nga kijiia kuma eie uala ni kixikinu kokua’mi, mukonda ku di tunu ku ngi bhana mon’ê umoxi-élele.’

Mbalahamu uakexile ni kixikinu kionene kua Nzambi! Muéne ua xikinine kuma ki bhuale kima kia bhonzo phala Jihova ku kibhanga, katé ué Jihova ueji fukununa Izake mu kaxaxi ka ió afú. Maji mu kidi Nzambi ka mesenene kuila Mbalahamu u jibha Izake. Nzambi ua bhangesa o mbudi ku kala pelezu ku muxi bhua zukamene, iu ua tumina Mbalahamu ku i satela bhu kididi kia mon’ê.

Dimatekenu 21:1-7; 22:1-18.



Ibhuidisu

  • Kikanenu kiahi kia bhangele Nzambi kua Mbalahamu, ni kiebhi Nzambi kia ki kumbidila?
  • Kála ki tua mu mona mu fikula, kiebhi Nzambi kia polovala o kixikinu kia Mbalahamu?
  • Ihi ia bhange Mbalahamu se muéne ku ki tendela, ni mukonda diahi Nzambi ua mu tumina ku bhanga kima kiki?
  • Ihi ia bhitile kioso Mbalahamu kia kuatele o phoko phala ku jibha mon’ê?
  • O kixikinu kiexile na-kiu Mbalahamu kua Nzambi kia suínine muene?
  • Ihi ia bhanene Nzambi phala Mbalahamu ku i satela, ni kiebhi kiki kia bhitile?

Ibhuidisu ia mukua

  • Tanga Dimatekenu 21:1-7.

    Mukonda diahi Mbalahamu ua saie mon’ê mu kizuua kia kanake? (Dim. 17:10-12; 21:4)

  • Tanga Dimatekenu 22:1-18.

    Kiebhi kiedikisa Izake kia londekesa o ku belesela tat’ê Mbalahamu? Kiebhi íii ia lombolola o ima ia beta-kota ia-nda kuíza ku pholo? (Dim. 22:7-9; 1 Kol. 5:7; Fil. 2:8, 9)