Ku bokona mu madisá

Ku bokona mu madisá

Jimbangi ja Jihova

Select language Kimbundu

Musoso 31: Mozé ni Ala a zuela ni Falaó

Musoso 31: Mozé ni Ala a zuela ni Falaó

KIOSO Mozé kia vutuka ku Ijitu, muéne ua tangela phang’ê Alá ia lungu ni madiuanu. Kioso Mozé ni Alá kiedikisa o madiuanu ku akua Izalaiele, o mundu uoso ua xikinine kuma Jihova uala nâ.

O kiki-phe, Mozé ni Alá ai mu zuela ni Falaó. Ene a mu ambela: ‘Jihova o Nzambi ia Izalaiele uixi, “Ehela mundu uami uie mu izuua itatu, mu kikangalakata a ngi bhangele-mu fesa.” ’ Maji Falaó ua tambuijila: ‘Eme, Jihova ki ngi muijiia. Ki nga-nda ehela Izalaiele kuia.’

Falaó ua dizangala mukonda o mundu ua mesene ku nhoha ku ikalakalu iâ, phala kubheza Jihova. Kienhiki, muéne ua a jijidika ku bhanga kikalakalu kia hadi. Akua Izalaiele a tatela Mozé, mukonda akexile ku a talesa hadi iavulu, kienhiki Mozé ua luuala. Maji Jihova ua mu ambela kana ku tandanganha. Jihova uixi, ‘Eme nga-nda jijidika Falaó kueha mundu uami ku tunda.’

Mozé ni Alá bhu pholo ia Falaó

Mozé ni Alá endele dingi mu zuela ni Falaó. Mu veji íii ene a bhange madiuanu. Alá ua takula o mbangala iê bhoxi, inga i bhiluka nhoka ionene. Maji o jinganga ja Falaó kiene ué kia bhange. Maji, talenu-phe! O nhoka ia Alá ia mu minha o jinhoka ja jinganga. Né kiki Falaó kehele akua Izalaiele kuia.

Kua bhixila thembu ia Jihova ku longa disá kua Falaó. Eie uejiia kiebhi muéne kia bhangele kiki? Ua tumikisa 10 dia mabhebhu, mba ibhidi ionene mu Ijitu.

Kioso kia bhitile o mabhebhu, Falaó ua tumu Mozé, uixi: ‘Palalesa o dibhebhu, nga-nda ehela akua Izalaiele kuia.’ Maji kioso kia palalesa o dibhebhu, Falaó ua bhilula o ndunge iê. Muéne kehele o mundu kuia. Maji, mu disukilu dia 10 dia dibhebhu, Falaó ua tumina akua Izalaiele kuia.

Eie uejiia o 10 dia mabhebhu?

Makatukilu 4:27-31; 5:1-23; 6:1-13, 26-30; 7:1-13.



Ibhuidisu

  • O madiuanu a bhangele Mozé ni Alá, a bhangesa ihi ku akua Izalaiele?
  • Ihi iambe Mozé ni Alá kua Falaó, ni ihi ia tambuijila Falaó?
  • Kála kidikisa o fikula, ihi ia bhitile kioso Alá kia takula o mbangala iê bhoxi?
  • Disá diahi dia bhana Jihova kua Falaó, ni ihi ia bhange Falaó?
  • Ihi ia bhitile kioso kiabhu o dibhebhu dia kakuinhi?

Ibhuidisu ia mukua

  • Tanga Makatukilu 4:27-31 ni 5:1-23.

    Ihi ia-ndalele ku zuela Falaó kioso kiambe: “Eme Jihova ki nga mu ijiia”? (Mak. 5:2; 1 Sam. 2:12; Lom. 1:21)

  • Tanga Makatukilu 6:1-13, 26-30.

    Kiebhi Jihova ka di bhana kuijiia kua Mbalahamu ni Izake ni Jakobo? (Mak. 3:13, 14; 6:3; Dim. 12:8)

    Kiebhi ki tu divua mu kuijiia kuma Jihova ua tumina Mozé ku bhanga o kikalakalu, se Mozé ua kijidile kuma keji tena ku ki bhanga? (Mak. 6:12, 30; Luka 21:13-15)

  • Tanga Makatukilu 7:1-13.

    Phangu iahi ia xisa Mozé ni Alá phala o jiselevende ja Jihova lelu, kioso kia bokele ni ku suína kuoso o ufundisu ua Nzambi kua Falaó? (Mak. 7:2, 3, 6; Ikalakalu 4:29-31)

    Kiebhi kiedikisa Jihova o ku tena kuê, ku jinzambi ja Ijitu? (Mak. 7:12; 1 Mal. 29:12)