Ku bokona mu madisá

Ku bokona mu madisá

Musoso 29: Mukonda Diahi Mozé ua Lenge

Musoso 29: Mukonda Diahi Mozé ua Lenge

TALA Mozé ua mu lenga ku Ijitu. Ua mu mona o maiala a mu mu kaia? Eie uejiia mukonda diahi ene a-ndala ku jibha Mozé? Ndoko tu tungunune se mukonda diahi.

Mozé ua mu lenga ku Ijitu

Mozé ua kudila mu dibhata dia Falaó, sobha ia Ijitu. Muéne uexile njimu ia diiala. Mozé ua kijidile kuma ki mukuá Ijitu, maji tata jê akua Izalaiele, abhika.

Kienhiki, kia tenesa 40 a mivu, Mozé uendele mu tala kiebhi kiexile mu kuenda akua ixi iê. Akexile mu a talatala kiaiibha. Muéne ua mono mukuá Ijitu ua mu beta mubhika mukuá Izalaiele. Mozé kia mono kuma ki kuala muthu, ua beta o mukuá Ijitu, inga mukuá Ijitu ufuá. Kienhiki, Mozé ua sueka o kimbi mu kisekele.

Mu kizuua kia kaiela, Mozé uai dingi mu tala o jindandu jê. Muéne ua banzele kuila ueji tena ku a kuatekesa ku tunda ku ubhika. Maji muéne ua mono maiala aiadi akua Izalaiele a mu bhânga, kienhiki Mozé uambela o mukuá: ‘Mukonda diahi ua mu beta phang’ê?’

Muéne ua tambuijila: ‘Nanhi ua ku bhange ngana, mba mufundixi uetu? Ua-nda ngi jibha ué, kála ki ua jibhile o mukuá Ijitu?’

Mozé uôma ua mu kuata. Muéne ua kijidile kuma athu a mu mono kia jibhile mukuá Ijitu. Katé ué Falaó ua kivuile, ni ua tumu maiala phala ku jibha Mozé. Mukonda dia kiki Mozé ua lenge ku Ijitu.

Kioso Mozé kia lenge ku Ijitu muéne uendele dikanga ku ixi ia Midiiana. Kuenhoko uejiia-ko muiji ua Jetulu, ni ua sokana ni mon’ê, a mu ixana Zipola. Mozé uexile mubhidi uakexile mu kuinga o jimbudi ja Jetulu. Muéne ua tungile mu ixi ia Midiiana mu 40 a mivu. Muéne uakexile kiá ni 80 a mivu. Saí kizuua, Mozé uakexile mu kuinga o jimbudi ja Jetulu, kua bhitile madiuanu a bhilula o muenhu ua Mozé. Tu tale ihi ia bhitile.

Makatukilu 2:11-25; Ikalakalu 7:22-29.



Ibhuidisu

  • Kuebhi kua kudila Mozé, ni ihi iejidile ia lungu ni jitata jê?
  • Ihi ia bhangele Mozé kioso kia kexile ni 40 a mivu?
  • Ihi ia zuelele Mozé ku mukuá Izalaiele uakexile mu bhânga, ni kiebhi kia mu tambuijila o diiala?
  • Mukonda diahi Mozé ua lenge ku Ijitu?
  • Kuebhi kua lengela Mozé, kuenhoko uejidile-ko nanhi?
  • Ihi ia bhangele Mozé mu 40 a mivu, kioso kia lenge ku Ijitu?

Ibhuidisu ia mukua

  • Tanga Makatukilu 2:11-25.

    Sumbala Mozé a mu longo mu mivu iavulu mu unjimu ua akua Ijitu, kiebhi muéne kiedikisa ku zola kua Jihova ni mundu uê? (Mak. 2:11, 12; Jih. 11:24)

  • Tanga Ikalakalu 7:22-29.

    Disá diahi di tu longa Mozé, kia fikisa muéne ku bhulula akua Izalaiele mu ubhika mu Ijitu? (Ikalakalu 7:23-25; 1 Phe. 5:6, 10)