Ku bokona mu madisá

Ku bokona mu madisá

Musoso 23: O Jinzoji ja Falaó

Musoso 23: O Jinzoji ja Falaó

KUA bhitile mivu iiadi, Zuze uala hanji mu kaleia. O kopelu ka mu lembalala. Saí usuku Falaó ua lotele nzoji jiiadi jonene, muéne ua mesene kuijiia se ja jimbuluile ihi. Ua mu mono, muéne ua zeka bhobha? Mu kimene kia mukuá, Falaó uexana o jinganga jê, iu ua a tangela o jinzoji jê. Maji ene ka tenene ku zuela o kijimbuluilu kia jinzoji jê.

Mu kusukáko, o kopelu ua lembalala Zuze. Muéne ua tangela Falaó: ‘Kioso nga kexile mu kaleia, mua kexile o diiala ua tenene ku lombolola o kijimbuluilu kia jinzonji.’ Falaó ua tumina ku takana Zuze mu kaleia.

Falaó ua tangela Zuze o jinzonji jê: ‘Nga mono sambuadi dia jingombe janete, ni jauabha. Nga mono dingi sambuadi dia jingombe jabhele. O jingombe jabhele jadi o jingombe janete.

Falaó ua mu lota nzoji

‘Mu nzoji iami ia kaiadi, nga mono sambuadi dia masa ezala ni abhi ia sabhukile mu kixima kimoxi. Anga, nga mono dingi sambuadi dia masa a tolo ni a xoueta. O masa a tolo akexile mu lelesa o masa a uabha.’

Zuze ua tangela Falaó: ‘O nzoji jiiadi ja jimbulula kima kimoxi ngó. O sambuadi dia jingombe janete, ni sambuadi dia masa ezala, a jimbulula sambuadi dia mivu, o sambuadi a jingombe ja nete ni sambuadi dia masa a xoueta, a jimbulula sambuadi a mivu ia mukuá. Kua-nda kuíza sambuadi dia mivu kua-nda kala ni kúdia kuavulu mu Ijitu. Kua-nda kuíza ué sambuadi dia mivu ia nzala mu Ijitu.’

Kiki-phe, Zuze uambela Falaó: ‘Sota diiala dia unjimu, u mu tumina ku bhongolola makúdia phala sambuadi dia mivu ioso íii. Kienhiki, athu ka-nda kala ni nzala, mu sambuadi dia mivu ia-nda kuíza-ko, kioso kia-nda kamba idima.’

Falaó, o ndunge ia mu uabhela. Muéne ua solo Zuze phala ku bhongolola o kúdia, ni ku ibhaka. Zuze uexile o diiala dia kaiadi dionene mu Ijitu, ua mu tundu ngó Falaó.

Dinake dia mivu ia ithangana ia nzala ia bhitile, Zuze ua mono maiala ku bhixila. Uejiia se a nanhi? Exile 10 dia jiphange jê ja makota! Tat’â Jakobo ua a tumikisa ku Ijitu, mukonda ka kexile dingi ni kúdia mu Kanana. Zuze ua lembalala o jiphange jê, maji ene ka mu ijidile dingi. Uejiia mukonda diahi? Mukonda Zuze uexile kiá muadiakime, ni ua zuatele kizuatu kiéngi.

Zuze ua lembalala kuma, kioso kiexile muzangala, muéne ua lotele nzoji, o jiphange jê eza ku mu fukamena. Eie ua ki lembalala? Kienhiki, Zuze ua mono kuma Nzambi ua mu tumikisa ku Ijitu, mu kima kiambote. Ihi iu ua fika ia bhange Zuze? Ndoko tu tale.

Dimatekenu 41:1-57; 42:1-8; 50:20.



Ibhuidisu

  • Mu usuku umoxi, ihi ia bhitile ni Falaó?
  • Mukonda diahi o kopelu ua lembalala Zuze?
  • Kála kidikisa o fikula, nzoji jiiadi jahi ja lotele Falaó?
  • Ihi ia zuela Zuze ia lungu ni dilomboluelu dia jinzoji?
  • Kiebhi Zuze kiéza mu kala muthu uonene ua kaiadi mu Ijitu, u mu tunda ngó Falaó?
  • Mukonda diahi o jiphange ja Zuze endele mu Ijitu, ni mukonda diahi ene ka muijidile?
  • Nzoji iahi ia lembalala Zuze, ni kiebhi o íii ia mu kuatekesa ku i tendela?

Ibhuidisu ia mukua

  • Tanga Dimatekenu 41:1-57

    Kiebhi Zuze kia bhana kijingu kua Jihova? Kiebhi o Jikidistá ja lelu a tena ku kaiela o phangu iê? (Dim. 41:16, 25, 28; Mat. 5:16; 1 Phe. 2:12)

    Kiebhi o mivu ia kúdia kuavulu mu Ijitu, ni mivu ia kaiela ia nzala, idikisa kuma ia difuangana ni iene mu bhita mu kaxaxi ka ilongesu ia mundu ua Jihova lelu, ni ia Kidistándade? (Dim. 41:29, 30; Amo 8:11, 12)

  • Tanga Dimatekenu 42:1-8 ni 50:20.

    O kuila kituxi o abhezi a Jihova ku bhetamena muthu mukonda dia kijingu kia ungana uê, se kiki kiene kia bhanga ku ixi iâ? (Dim. 42:6)