SE MUTHU ua lebha kála o ditala dia’nzo iê u ku zukama, ihi ueji banza? Muthu iú dikixi! Mu ukulu mua kexile makixi mu ixi. O Bibidia idikisa kuma tata jâ, exile ji-anju ku diulu. Mukonda diahi akexile kiki?

Makixi aiibha

Lembalala kuma, o anju iaiibha Satanaji ia kexile mu bhanga mavua. Muéne ué, ua nganala o ji-anju ja Nzambi ku kala athu aiibha. Ji-anju jiji jevu Satanaji. Ene a xisa o kikalakalu kiá, ku diulu kia a bhele Nzambi. Ene eza mu ixi ni a di bhangela mikutu ia athu. Uejiia mukonda diahi

O Bibidia izuela kuma an’a Nzambi akexile mu tala an’a ahatu a uabha mu ixi, ni a mesene ku kazala nâ. Kienhiki ene eza mu ixi ni a kazala ni ahatu enhá. O Bibidia izuela kuma kiki kituxi, mukonda Nzambi ua bhange o ji-anju phala ku kala ku diulu.

Kioso ji-anju ki ja vuala ana ni ahatu, ene a difuile kiéngi. Mu dimatekenu ka monekene kuila a difuile kiéngi. Maji ene exile athu onene, akexile ni nguzu iavulu, kia kulu a kituka makixi.

O makixi iá aiibhile. Mukonda exile onene ni nguzu iavulu akexile mu totojola athu. Akexile mu jijidika akuâ, phala ku kala athu aiibha kála ene.

Enoko ua fuile kiá, maji kua kexile diiala dia mbote mu ixi. Dijina diê Noué. Muéne ua bhangele ioso ia mu tumina Nzambi.

Saí kizuua Nzambi ua tangela Noué kuma o thembu phala Muéne ku buika athu oso aiibha ia bhixila. Maji Nzambi ueji bhulula Noué, ni muiji, uê ni iama. Ndoko tu tale kiebhi Nzambi kia bhange kiki.

Dimatekenu 6:1-8; Juda 6.



Ibhuidisu

  • Ihi ia bhitile kioso o ji-anju ja kamúkua ja Nzambi kiévu Satanaji?
  • Mukonda diahi o ji-anju ja kamúkua a xisa o ikalakalu iâ ku diulu, ni eza mu ixi?
  • Mukonda diahi kima kiaiibha o ji-anju kuíza mu ixi, ni ku kituka athu mu xitu?
  • Ihi ki ia difuanganene mu an’a ji-anju?
  • Kála ki ua mu mona mu fikula, ihi ia kexile mu bhanga an’a ji-anju kioso kia kituka makixi?
  • Nanhi o diiala dia kaiela Enoko dia kexile mu ixi, ni mukonda diahi Nzambi ua mu zolele?

Ibhuidisu ia mukua

  • Tanga Dimatekenu 6:1-8.

    Kiebhi o divulu dia dimatekenu 6:6, didikisa kuma o i tu bhanga i tena ku luualesa Jihova mba i mu sangulukisa? (Jisá. 78:40, 41; Jisa. 27:11)

  • Tanga Juda 6.

    O ji-anju “ja kambele ku bhaka o ukota uâ, a xisa o kididi kia a tokala” mu izuua ia Noué i sidivila phala ku tu dimuna lelu? (1 Kol. 3:5-9; 2 Phe. 2:4, 9, 10)