KINDALA tala Kaini ni Abele. O kiiadi a kulu kiá. Kaini uexile kidimakaji. Muéne ua dimine masa ni masangu, ibundu, ni ima ia uísu.

Kaini ni Abele a mu bhana ujitu kua Nzambi

Abele uexile mubhidi ua jimbudi. Muéne ua zolele kuinga o jimbudi. O jimbudi ja kudile ni javudile, Abele uakexile ni kibhanga phala ku sasa.

Kizuua kimoxi, Kaini ni Abele a bhekele ujitu kua Nzambi. Kaini ua bhekele o kúdia kua díbhia diê. Abele ua bhekele o mbudi ia betele-kota mu kibhanga kiê. Jihova ua sangulukile ni ujitu ua Abele. Maji ka sangulukile ni ujitu ua Kaini. Uejiia mukonda diahi?

Ki kiexile ngó mukonda o ujitu ua Abele ua betele-kota, ua Kaini uexile ndenge. Maji kiexile mukonda Abele uexile muthu uambote. Muéne ua zolele Jihova ni phangi’ê. Maji Kaini uexile muthu uaiibha, muéne ka zolele phangi’ê.

Kienhiki, Nzambi uambela Kaini phala kueha o ukexilu uê uaiibha. Maji Kaini ka muívu. Muéne ua dizangalele mukonda Nzambi ua betele ku zola Abele. Kienhiki, Kaini uambela Abele, ‘Ndoko ku mukáu.’ Kioso kia kexile ubheka uâ, Kaini ua beta phangi’ê, Abele. Muéne ua mu beta ni nguzu iavulu, iu ua mu jibha. O ia bhangele Kaini, ki ia iibhile?

Kaini ua lenge kioso kia jibha Abele

Sumbala Abele uafú, Nzambi ka mu jimbi. Abele uexile muthu uambote, Jihova ka jimbi athu iâ. Saí kizuua Jihova Nzambi ua-nda fukununa Abele. Kienhiki, Abele ka-nda fuá dingi. Muéne ua-nda kala ni ku sanguluka mu ixi. Ki kia-nda uabha kuijiia athu ambote kala Abele?

Maji Nzambi ka uabhela athu kala Kaini. Kaini kia jibha phangi’ê, Nzambi ua mu kaxtikala, ua mu tumikisa dikanga ku muiji uê. Kioso Kaini kiendele kuengi mu ixi, muéne uambatele phangi’ê ia muhatu, iu uakexile muhatu’ê.

Kienhiki, Kaini ni muhatu’ê a mateka ku vuala ana. Ana a mukuá a Adá ni Eva, a kazala a vuala ué ana. Mu ku bhita kithangana o ixi iezalele ni athu. Ndoko tu tale se kiebhi kia kexile

Dimatekenu 4:2-26; 1 Nzuá 3:11, 12; Nzuá 11:25



Ibhuidisu

  • Maufunu ahi a solele Kaini ni Abele?
  • Ujitu uahi a bhanene Kaini ni Abele kua Jihova?
  • Mukonda diahi Jihova ua uabhelele ngó o ujitu ua Abele, maji ujitu ua Kaini ki ua mu uabhelele?
  • Kaini uexile muthu ua kífua kiahi, ni ihi ia bhangele Jihova phala ku mu bazela?
  • Ihi ia bhangele Kaini kioso kia kexile ubheka uê ni phangi’ê mu mukau?
  • Jimbulula ihi ia bhiti ni Kaini kioso kia jibha phangi’ê.

Ibhuidisu ia mukua

  • Tanga Dimatekenu 4:2-26.

    Kiebhi kia zuela Jihova o ibhidi mua di tele Kaini? (Dim. 4:7)

    Kiebhi kiedikisa Kaini ia kexile ku muxima uê? (Dim. 4:9)

    Kiebhi Jihova kia mona o ujibhangânga? (Dim. 4:10; Iza. 26:21)

  • Tanga 1 Nzuá 3:11, 12

    Mukonda diahi Kaini uakexile ni njinda, ni kiebhi kiki ki sidivila phala ku tu dimuna lelu? (Dim. 4:4, 5; Jisa. 14:30; 28:22)

    Kiebhi kidikisa o Bibidia kuma né muene oso ku muiji uetu ka zolo Jihova, etu tu tena ku kolokota ku mu sidivila? (Jisá 27:10; Mat. 10:21,22)

  • Tanga Nzuá 11:25.

    Kikanenu kiahi kia bhana Jihova kia lungu ni ió afú, mukonda dia ku bhanga o mbote? (Nzuá 5:24)