Ku bokona mu madisá

Ku bokona mu madisá

Musoso 5: A Mateka o Muenhu ua Hadi

Musoso 5: A Mateka o Muenhu ua Hadi

BHU KANGA dia jaludim ia Edene, Adá ni Eva akexile ni ibhidi iavulu. Ene akexile ni kikalakalu kia hadi phala ku kala ni kúdia. Bhu kididi kia mixi ia ibundu, bhua sabhukile ngó jisongo. Íii iene ia bhitile ni Adá ni Eva, kioso kia bhukumukina Nzambi ni a xisa ku kala kamba Diê.

Adá ua mu kalakala kiavulu ni mon’ê

Kienhiki, Adá ni Eva a mateka kufuá. Lembalala kuma, Nzambi ua a dimuine kuila se adile o kibundu kia muxi eji fuá. Ene a mateka kufuá kioso kiadi o kibundu. Ene exile ioua mu ku kamba kuívua Nzambi!

An’a Adá, a a vuala ngó kioso Nzambi kia kaie o tata jâ, mu jaludim ia Edene. Kiki kilombolola kuila an’ê oso a lundula o kituxi kiê, ni akexile ué mu kuka ni kufuá.

Se Adá ni Eva a belesele Jihova, o muenhu uâ, ni ua an’ê, ueji sanguluka. Ene eji kala ni ku sanguluka mu ixi. Né ngó muthu ueji kuka, ku kata, mba kufuá.

Nzambi ua mesena kuila athu a kale ni muenhu ua kalelaku, Muéne ua kanena kuma saí kizuua, kiene kia-nda kala. Ko ixi ngó ia-nda iuka, maji athu ué a-nda kala ni sauidi. Athu oso mu ixi a-nda kala makamba mu diâ, ni makamba a Nzambi.

Eva ni tuana tuê

Maji, Eva kexile dingi kamba dia Nzambi mu thembu iavulu. An’ê ua a vuala ni hadi. Muéne uakexile ni jindolo. O ku bhukumukina Jihova, kua mu bhekela dilamba dia vulu, ki kiene?

Adá ni Eva a vuala an’a-mala ni an’a-ahatu avulu. Kioso kia vuala o mon’ê ua dianga, ua mu luku Kaini. O mon’ê ua kaiadi ua mu luku Abele. Ihi ia bhiti nâ? Eie uejiia?

Dimatekenu 3:16-23; 4:1, 2; Dijingunuinu 21:3, 4.



Ibhuidisu

  • Kiebhi kiexile o muenhu ua Adá ni Eva bhu kanga dia jaludim ia Edene?
  • Ihi ia mateka ku bhita ni Adá ni Eva, ni mukonda diahi?
  • Mukonda diahi an’a Adá ni Eva eji kuka ni eji fuá?
  • Se Adá ni Eva a belesele Jihova, kiebhi kieji kala o muenhu uâ, ni ua an’â?
  • Mukonda diahi o ku bhukumuka kua Eva kua mu bhekela o ndolo?
  • Kiebhi kie xanene ana aiadi a Adá ni Eva?
  • A nanhi ana a kamúkua ala mu fikula?

Ibhuidisu ia mukua

  • Tanga Dimatekenu 3:16-23 ni 4:1, 2.

    O mázui alungu ni mavu a bhekela ihi ku muenhu ua Adá? (Dim. 3:17-19; Lom. 8:20, 22)

    Mukonda diahi o dijina dia Eva dia lombolola “mama ia athu” dia mu fuamene? (Dim. 3:20)

    Kiebhi kiedikisa Jihova o favolo ku Adá ni Eva, né muene kioso kia tele o kituxi? (Dim. 3:7, 21)

  • Tanga Dijingunuinu 21:3, 4.

    ‘Ima io ukulu’ iahi iu ua mesena kuila i bhua?