TALA o ixi bhabha! Ioso ia uabha! Tala o iangu, ni mixi, ni ithulu ni iama ioso. Eie uejiia se o nzamba iebhi, mba se jihoji jebhi?

Iama mu jaludim ia Edene

Nanhi ua bhange o jaludim íii ia uabha? Ndoko tu tale kiebhi kia iudika Nzambi o ixi phala etu.

Nzambi ua dianga ku bhanga o iangu phala ku xita o ixi. Ua bhange isasa iofele ni mixi ionene. O ima ioso íii ia iukisa o ixi. Ienii i bhana dingi ima iavulu. Muala mixi i tu bhana kúdia kua uabha.

Nzambi ua bhange ué jimbiji ji zoua mu menha, ni jinjila ji phulula ku diulu. Muéne ua bhange jimbua, jingatu ni jikabalu, iama ionene ni iofele. Iama iahi iala bhu bhata diê? Etu ki tua tokala ku sanguluka mu kuijiia kuila Nzambi ua bhange ima ioso íii phala etu?

Mu kusukáko, Nzambi ua iudika kididi mu ixi, kididi kia beta ku iuka. Muéne ua xana o kididi kiki, jaludim ia Edene. Kiexile kididi kia iuka. Ima ioso ia uabhele. Nzambi ua mesene kuila o ixi ioso i iuka kála o jaludim íii ia bhangele.

Maji tala dingi o fikula ia jaludim íii. Eie uejiia se ihi ia mono Nzambi kuila ia kambe-mu? Tu tale.

Dimatekenu 1:11-25; 2:8, 9.



Ibhuidisu

  • Kiebhi kia iudika Nzambi o ixi phala ku kala dibhata dietu?
  • Zuela o iama ioso ki i difu ia bhange Nzambi. (Tala o fikula.)
  • Mukonda diahi o jaludim ia Edene iexile kididi kia iuka?
  • Nzambi ua mesenene kuila o ixi i kala kiebhi?

Ibhuidisu ia mukua

  • Tanga Dimatekenu 1:11-25.

    Ihi ia bhange Nzambi mu kizuua kia katatu? (Dim. 1:12)

    Ihi ia bhiti mu kizuua kia kauana kia kibhangelu? (Gen. 1:16)

    Iama iahi ia bhange Nzambi mu kizuua kia katanu, ni kia kasamanu? (Dim. 1:20, 21, 25)

  • Tanga Dimatekenu 2:8, 9.

    Mixi iiadi iahi ia beta-kota ia tele Nzambi mu jaludim, ni mixi íii ia lomboluele ihi?