Ku bokona mu madisá

Ku bokona mu madisá

Jimbangi ja Jihova

Select language Kimbundu

Musoso 9: Noué u Tunga o Álaka

Musoso 9: Noué u Tunga o Álaka
Athu a mu kuelela Noué

NOUÉ uakexile ni muhatu ni ana kitatu. An’ê a a xanene Seme, Hamane, ni Jafate. Kala mona uakexile ni muhatu. O muiji ua Noué uexile dinake dia athu.

Nzambi ua tumina Noué ku bhanga kima kia bhonzo. Muéne ua mu tumina ku tunga o álaka ionene. O álaka iexile ionene kála naviio, maji ia difuanganene kala kaxa ionene. Nzambi uixi, ‘Bhanga-iu ni sabhalalu jitatu, ni u temu maxilu.’ O maxilu exile phala Noué ni muiji uê ni iama, ni kúdia phala ene oso.

Nzambi ua tumina Noué ku tunga kiambote o álaka, phala ki i bokone menha. Nzambi uixi: ‘Nga-nda tumikisa dilúvio dia-nda buika o ixi ioso. Uoso ka-nda kala mu álaka ua-nda fuá.’

Noué ni an’ê a belesela Jihova ni a mateka ku i tunga. Maji athu a kamúkua akexile kuelela ngó. Ene a kolokota mu ku bhanga ima iaiibha. Né ngó muthu ua xikanene ia zuela Noué ieji bhanga Nzambi.

O muiji ua Noué ua mu bokuesa o iama ni kudia mu álaka

A bhiti izuua iavulu mu ku tunga o álaka, mukonda iexile ionene. Kia bhitile mivu iavulu a i zubha. Kienhiki, Nzambi ua tumina Noué ku bheka mu álaka iama ioso. Nzambi ua tumina ku bheka ué mu álaka kiiadi mu ki dífua kia iama, ndunbe ni mukaji. Maji ku iama ia mukuá Nzambi uambela Noué ku bheka sambuadi. Nzambi ua mu tumina ué ku bheka ífua ioso ia jinjila. Kienhiki, kiene kia bhangele Noué kála kia mu tumine Nzambi.

Kioso kia zubha, Noué ni muiji uê a bokona mu álaka. Nzambi ua jika o dibhitu. Mu álaka Noué ni muiji’ê akexile mu kingila. Xinganeka eie mu álaka ni ene mu kingila. Kua-nda kuíza muene dilúvio kála kia zuelele Nzambi?

Dimatekenu 6:9-22; 7:1-9.



Ibhuidisu

  • Athu akuxi akexile mu muiji ua Noué? Ni kiebhi kie xanene an’ê kitatu?
  • Kima kiahi kia bhonzo kia bhingile Nzambi kua Noué phala ku ki bhanga, ni mukonda diahi?
  • Ihi ia bhangele athu kioso Noué kia tangela o maka alungu ni álaka?
  • Ihi ia zuela Nzambi kua Noué ia tokalele ku bhanga ni iama?
  • Kioso Nzambi kia jika o dibhitu dia álaka, Noué ni muiji uê eji bhanga ihi?

Ibhuidisu ia mukua

  • Tanga Dimatekenu 6:9-22.

    Ihi ia bhangesa Noué ku kala selevende ia Nzambi ia kidi? (Dim. 6:9, 22)

    Kiebhi Jihova kia mona o usuéia, ni kiebhi íii i tu kuatekesa ku sola kiambote o ukexilu uetu ua ku tonoka? (Dm. 6:11, 12; Jisá. 11:5)

    Kiebhi tu tena ku kaiela Noué kioso ki tu tambula o ilongesu ia Jihova mu kilunga kiê? (Dim. 6:22; 1 Nzuá 5:3)

  • Tanga Dimatekenu 7:1-9.

    Kiebhi kuijiia kuma Jihova ua solo Noué o diiala mukuá ituxi kála muthu ua iuka, i tu kolokotesa lelu? (Dim. 7:1; Jisa. 10:16; Iza. 26:7)