TALA ihi ia mu bhita kindala. Adá ni Eva a mu a kaia mu jaludim ia uabha ia Edene. Uejiia mukonda diahi?

Adá ni Eva a mu a kaia mu jaludim ia Edene

Mukonda ene a bhange kima kiaiibha. Kienhiki, Jihova ua mu a kaxtikala. Uejiia se kima kiahi kia bhangele Adá ni Eva?

Ene a bhangele kima kia zuelele Nzambi kuma kana ku ki bhanga. Nzambi ua ambela phala kudia o ibundu ia mixi ioso ia jaludim. Maji muxi umoxi uambe Nzambi kana ku udia, se a udia eji fuá. Muéne ua bhakele o muxi uenió phala muéne. Tuejiia kuma ku katula kima kia ngene kituxi, ki kiene? Ihi-phe ia bhiti?

Saí kizuua, kioso Eva kia kexile ubheka uê, o nhoka ia mu zuelesa. Xinganeka ngó! Iambela Eva kudia o kibundu kiambele Nzambi kuma kana ku kidia. Kioso kia bhange o jinhoka, Jihova ka ji bhangele phala ku zuela. Kiki kilombolola kuma saí muthu ua bhangesa o nhoka ku zuela. Nanhi-phe?

Ki Adá kana. Uexile muthu a mu bhange kuala Jihova ande dia ku bhanga o ixi. Muthu iu anju, etu ki tu tena ku mu mona. O anju íii iexile ni luímbi luavulu. Muéne ua xinganekene kuma utena ué ku tumina kála Nzambi. Muéne ua mesenene kuila athu oso a mu belesela, Jihova kana. Iene o anju ia bhangesa o nhoka ku zuela.

O anju íii ia tenene ku nganala Eva. Kioso kia mu ambela kuma muéne ua-nda kala kála Nzambi se udia o kibundu, muéne ua xikana. Kienhiki muéne uadi, ni Adá ué uadi. Adá ni Eva a bhukumukina Nzambi, kienhiki a texi o dibhata diâ dia jaludim ia uabha.

Maji, saí kizuua Nzambi ua-nda bhilula dingi o ixi mu jaludim ia uabha kála o jaludim ia Edene. Kienhiki, tua-nda kuijiia dingi kiebhi eie utena ku kuatekesa ku bhanga kiki. Maji, tu tale se ihi ia bhiti ni Adá ni Eva.

Dimatekenu 2:16, 17; 3:1-13, 24; Dijingunuinu 12:9.



Ibhuidisu

  • Tala mu fikula, ihi ia mu bhita ni Adá ni Eva?
  • Mukonda diahi Jihova ua a kaxtikala?
  • Ihi ia zuela o nhoka kua Eva?
  • Nanhi ua bhangesa o nhoka ku zuela ni Eva?
  • Mukonda diahi Adá ni Eva a texi o dibhata diâ, dia Palaízu?

Ibhuidisu ia mukua

  • Tanga Dimatekenu 2:16, 17 ni 3:1-13, 24.

    Kiebhi o kibhuidisu kia nhoka kua Eva, kia mu bhangesa ku bhanza kiaiibha kia lungu ni Jihova? (Dim. 3:1-5; 1 Nzuá 5:3)

    Kiebhi o ia bhange Eva i sidivila phala ku tu dimuna? (Fil. 4:8; Tii. 1:14, 15; 1 Nzuá 2:16)

    Kiebhi Adá ni Eva ka xikina o kikuma kia kituxi kiâ? (Dim. 3:12, 13)

    Kiebhi o jixelube ja tele mu jaludim ia Edene ja kuatekesele o ungana ua Jihova? (Dim. 3:24)

  • Tanga Dijingunuinu 12:9.

    Kiebhi Satanaji kiene mu tena ku nganala o mundu ku unguvulu ua Nzambi? (1 Nzuá 5:19)