Ku bokona mu madisá

Ku bokona mu madisá

 DISÁ 48

O Mon’â Mutudi u Kala Dingi ni Muenhu

O Mon’â Mutudi u Kala Dingi ni Muenhu

Mu kithangana kia kixibhu, Jihova ua tangela Elija uixi: ‘Ndé ku Seleta. O Mutudi ua-nda kubhana kudia.’ Bhu mielu ia mbanza, Elija ua mono mutudi ua muhatu ua kexile mu xanga jihuinhi. Elija ua mu bhingi tumenha. Kioso muene kia kexile muia mu takana tumenha, Elija ua muixana, uixi: ‘Nga ku dióndo, ngi bhekele ué kambolo.’ Maji o mutudi ua tambuijila: ‘Ki ngala’mi ni mbolo phala ku ku bhana. Ngala ngó ni tufuba, ni máji phala kubhanga kakudia phala mon’ami n’eme.’ Elija ua mu tangela: ‘Jihova ua tange kuila se u ngi bhangela kambolo, o fuba ié m’ômbia ni máji ka-nda bhua katé o kizuua Jihova kia kà bhana dingi o mvula mu ngongo.’

Mu kiki, o mutudi uai kubhata iu ua bhange kambolo phala o polofeta ia Jihova. Kala kia tangele Jihova, o mutudi ni mon’ê a kexile ni kia kudia mu kithangana kioso kia kixibhu. O fuba mu jimbia ki iabhu ni máji ué kana.

 Kua moneka divuua dia dikota. O mon’â mutudi ua kate iu uafu. Muéne ua bhingi ua diondo kua Elija phala ku mu kuatekesa. Elija ua mu tambula o mona iu ua muambata bhu jihata jê, ua bande-nê kate ku dixilu dia kexile kuthandu dia inzo. Bhenhobho ua te o mona bhu hama, iu ua sambe: ‘Jihova nga ku dióndo, vutukisa o muenhu ua kana kaka.’ Elija ua bhingi kima kia dikota kua Jihova. Mukonda ki muexile luua muthu ua fuile ia a mu fukunuine. Ku mbandu ia mukuá, o mutudi iú ni mon’ê ka tokalele ku muiji ua Izalaiele.

Maji mona ua vutuka ku muenhu, ua mateka dingi o kubhuima! Elija ua tangela o mutudi: ‘Tala! Mon’ê uala ni muenhu.’ O mutudi ua sangulukile kiavulu iu ua tangele Elija: ‘Sé phata, eie u muthu ua Nzambi. Ngejiia kiki, mukonda eie u zuela ngó o ima i ku tangela Jihova.’

“Xinganekenu o ilombelombe, i kamba kununa, i kamba kubhongolola, i kamba kinganja mba dibhakelu; Nzambi-phe u i bhana kúdia! Enu-phe kífua ki kota, mbé mu soka ni jinjila?”—Luka 12:24