Jihova uambela Samuuele: ‘Ndé kubhata dia Jese. Saí mon’ê, ua-nda kala o sobha ia Izalaiele.’ Mu kienhiki, Samuuele uai ku bhata dia Jese. Kioso kia mono mon’ê ua dianga, muéne ua banze: ‘O munzangala iú muéne a-nda mu sola.’ Maji Jihova ua tangela Samuuele kuila, ió ki muéne a mu solele kana. Jihova uambe: ‘Eme ki ngi tala o pholo ia muthu kana, maji o muxima uê.’

Jese ua bheka dingi o sambuadi dia an’ê kua Samuuele. Maji Samuuele uambe: ‘Jihova ka solo-bho né ngó muthu umoxi mudiá. O kuila eie uala dingi ni tuana tua mukuá?’ Jese uambe: ‘Ngala dingi ni mona umoxi o kasule kami, Davidi. Muéne ua tundu, uai mu langa o jimbundi jami.’ Kioso Davidi kia bokona, Jihova uambela Samuuele: ‘Iú muéne nga mu solo!’ Samuuele ua lundula máji ku mutué ua Davidi, ua mu undu, mukonda muéne ueji kala sobha ia Izalaiele.

Mu kubhita thembu, akua Izalaiele a luu ita ni akua Fídixia, exile ni dizonda dia diiala a muixana Ngoliia ua kexile mua bhângela. Izuua ioso Ngoliia ua kexile mu lebhula akua Izalaiele. Muéne ua kexile mu dikola: ‘Ngi tu mikisienu diiala phala ku bhânga n’eme. Se muéne u tu tolola, etu tua-nda kala tu abhik’enu. Maji se ngi mu tolola, enu mua-nda kala mu abhik’etu.’

Davidi uai bhu kididi bhua kexile akua Izalaiele ni kudia phala o makota-mê, exile masoladi. Muéne uevu Ngoliia, iú uambe: ‘Nga-nda bhânga n’ê!’ O Sobha Saulu uambe:  ‘Eie u mona ndenge hanji.’ Davidi ua mu vutuila: ‘Jihova ua-nda ngi kuatekesa.’

Saulu ua bhana kua Davidi o izuatu iê ia ita, maji Davidi uambe: ‘Eme ki nga-nda tena kubhânga kiambote ni izuatu íii ia ita.’ Davidi ua katula o mbala-funda iê iú uai katé mu honga. Muéne ua solo matadi atanu a xanana, iú ua te mu mbuenga iê. Bhenhobho Davidi anga u kala pholo-ni-pholo ni Ngoliia. O dizonda ua dikola: ‘Zá bhabha mon’a ndenge. Nga-nda bhana o xitu ié ku jinjila ni ku iama ia muxitu.’ Davidi ka kexile ni uôma. Muéne ua mu vutuila ni dizuí dia suína: ‘Eie uiza kokuami ni xibhata ni sosa, maji eme ngiza mu dijina dia Jihova. Eie ki ua mu bhânga n’etu, maji ua mu bhânga ni Nzambi. Mundu uoso uala bhabha ua-nda mona kuila, Jihova ua beta-o-kota mu kutena, o xibhata ni sosa ndenge. Muéne ua-nda mi bhana enu oso bhu maku’etu.’

Davidi ua katula o ditadi mu mbuenga iê iú ua di nhungu ni nguzu iê ioso. Ni kikuatekesu kia Jihova, o ditadi dio takule anga di bokona bhu dibhomo dia Ngoliia. O dizonda ua bu bhoxi anga ufuá. Akua Fídixia mu ku mona kiki, a lenge. O kuila eie u dielela ué kua Jihova, kala kia bhangele Davidi?

“Ku athu ki kamba ku xikina, kua Nzambi phe kana. Kuma kua Nzambi iene ioso i xikina.”​—Marku 10:27