Mu kithangana kia nzala mu ixi ia Izalaiele, muhatu mukua Izalaiele Nouemi, muadi uê, ni tuana ai mu tunga mu ixi ia Mouabhe. Mu kubhita kithangana muadi uê uafu. O tuana tuê tua kazala ni Lute ni Olofa, exile akua Mouabhe. Mu kubhita thembu, o tuana tua Nouemi tuafu ué.

Kioso Nouemi kievu kuila, mu Izalaiele ki muexile dingi nzala, ua vutuka mu ixi ié. Lute ni Olofa ai kumoxi, maji kioso kia kexile mu njila, Nouemi ua ambela uixi: ‘Enu muexile mu ahatu ambote phala o tuana tuami, muexile ue mu jimbalakaji jambote phal’eme. Nga mesena kuila enu mu kazala dingi. Vutukenu mu ixi ia Mouabhe.’ Ene ambe: ‘Etu tua ku zolo kiavulu! Ki tua mesena ku kuxisa.’ Nouemi ua jijidika muene phala kuvutuka. Mu kusuluka, Olofa ua vutuka, maji Lute ua xala. Nouemi ua mu tangela: ‘Olofa ua mu vutuka ku muiji uê, ni ku jinzambi jê. Mu kaiele.’ Maji Lute ua muambela: ‘Eme ki nga-nda ku xisa. O mundu ué u kala mundu uami, o Nzambi ié Nzambi iami.’ Ni izuelu iii ia Lute, kiebhi kia divu Nouemi?

Lute ni Nouemi a bhixila mu Izalaiele ku dimatekenu dia kubhongolola o sevada. Sai kizuua, Lute uai mu bonga o jimbundu ja subhukile mu dibhia dia Bouaji, uexile mon’a Lahaba. Muéne uevuile kuila, Lute uexile mukua Mouabhe ni ufiiele uoso ua xala ni Nouemi. Muéne ua tangela o jiselevende jê phala kuxisa jimbundu mu díbhia, phala Lute ku ji bhongolola.

 Mu usuku uenhó Nouemi uebhuidisa Lute: ‘Lelu ua kalakala ku díbhia dia nanhi?’ Lute uambe: ‘Mu díbhia dia diiala a muixana Bouaji.’ Nouemi ua muambela: ‘Bouaji ndandu ia muadi uami. Kolokota mu kukalakala mu díbhia dia muéne ni ilumba ia mukua. Eie a-nda ku langa kiambote mon’ami.’

Lute ua suluka ni kukalakala mu díbhia dia Bouaji, katé kiabhu o kithangana kia kubhongolola. Bouaji ua muene kuila, Lute ua kalakalele kiavulu ni kuila muhatu uambote. Mu izuua ienhoio, se diiala ufua se kuvuala mona, o ndandu iê, ua tokalele kukazala ni mutudi. Mu kienhiki, Bouaji ua kazala ni Lute. Ene a vualele mona, dijina diê Obede, mu kusuluka Obede ua kituka kuku ia Sobha Davidi. O makamba a Nouemi a sangulukile kiavulu. Ene a zuela: ‘Kia dianga Jihova ua kubhana Lute, muthu uambote uene mu ku kuatekesa, kindala uala kia ni mulaula. Jihova a tane-ku.’

“Sai-phe dikamba di beta kota, o phange ndenge.”​—Jisabhu 18:24