O njimbu ia lungu ni mbanza ia Jedikó ia tula katé mu jixi ja mukuá ja Kanana. O jisobha ja Kanana ja banze kudibunda phala kuzoka ni akua Izalaiele. Maji akua Ngibiione a bhange kima kiéngi. Ene a te izuatu iokulu, ia tandujuka ai kua Josuué, ia ambe: ‘Tua tundu ixi ia dikanga. Tuévu ioso ia bhange Jihova mu ixi ia Ijitu ni ia Mouabhe phala ku mi kuatekesa. Kana ku tu bhanga kiaiibha, tua-nda kala tu jiselevende jenu.’

Josuué ua xikina ni kua dielela, ka a bhange kima kiaiibha. Mu kubhita izuua itatu, muene ueza mu kuijiia kuila ene mbé ka tundile ixi ia dikanga. Ene a tokalele mu ixi ia Kanana. Josuué uebhuidisa akua Ngibiione: ‘Mukonda diahi mua tu dingila?’ Ene a tambuijila: ‘Tua kexile ni uôma! Tuejiia kuila Jihova uala ku mbandu ienu. Tua ku dióndo kanenu ku tu jibha.’ Josuué ua kumbidila o kizuelu kiê, ka a jibha kana.

Ki ku bhiti thembu iavulu, sobha jitanu ja Kanana ni ifuxi iâ, a kuatesa uôma ku akua Ngibiione. Josuué ni masoladi mê, endele o usuku uoso phala kubhulula akua Ngibiione.  O nvunda ia mateka mu kamenemene ka selu. Akua Kanana a mateka kulenga mu jimbandu joso. Kididi kioso-kioso kia lengele, Jihova ua kexile mua takula matádi a mvula ku thandu diâ. Josuué anga u bhinga kua Jihova phala kuimanesa o dikumbi. Mukonda diahi muene ua bhingi kua Jihova kubhanga kiókio, se o dikumbi nuka diemanene? Mukonda Josuué ua dielele kiavulu kua Jihova. O dikumbi ki di fuile mu kizuua kioso kia kambamba, katé akua Izalaiele kia buikisa o jisobha ja akua Kanana ni ifuxi iâ.

“O kudikunda kuenu-phe ku kale kua kuila: Kiene, kiene; kana, kana; kioso ki di bandekeza kuku, kima kia tundu ku Dimonho.”​—Matesu 5:37