Akua Izalaiele a kexile mu kikangalakata mu 40 a mivu. A buikisile kiá jimbanza javulu. Mu kithangana kiki, ene a kexile kiá kua zukamene o Mulundu ua Mouabhe ku mbandu ia tundila-kumbi, ia Ngiji ia Njolodá, kiexile o kithangana kia tokalele phala kubokona mu ixi ia Kanana. Balake o Sobha ia Mouabhe, ua kexile ni uôma kuila eji mu tambula o ixi, mukonda dia ene. Mu kienhiki muene uexana diiala dijina diê Balamu, phala kuloka akua Izalaiele.

Maji Jihova uambela Balamu: ‘Eie ku tokala kuloka akua Izalaiele.’ Mu kiki, Balamu ua ditunu o kuenda. O Sobha Balake ua muixana dingi lua kaiadi, iu ua mu kanena ku mu bhana kima kioso-kioso kieji bhinga. Né muene kiki, Balamu ua ditunu. Mu kienhiki, Nzambi uambe: ‘Eie ndaie maji ua tokala u zuela ngó o maka u nga-nda ku ku tangela.’

Balamu ua sambela ku bulu iê, iu uai katé ku sulu ia Mouabhe. Muene ua kanena kuloka akua Izalaiele, né muene ni maka a mu tangele kia Jihova. O anju ia Jihova ia moneka mu njila mu veji jitatu. Balamu ka mono o anju, maji o bulu ia muene o anju. Kia dianga, o bulu ia tundu mu njila, i iai mu iangu. Mu kusuluka, o bulu anga i di phupha ku ditádi, o kinama kia Balamu anga ki naminina ku ditádi. Mu kusuka-ku, o bulu ia butama mu kaxi ka njila. Mu kithangana kienhókio, Balamu ua beta o bulu ni mbangala.

Mu veji ia katatu, Jihova ua bhangesa o bulu kuzuela. O bulu iebhuidisa Balamu: ‘Mukonda diahi ua mu ngi beta?’ Balamu ua zuela: ‘Ua ngi bhangesa kukala ngi kioua. Se nga kexile ni xibhata hinu nga ku jibha.’ O bulu ia zuela: ‘Eie uene mu ngi sambela kiá tundé ukulu. O kuila eme nga ku bhangele kiá kiki?’

Mu kusuluka, Jihova ua bhangesa Balamu ku mona o anju. O anju iambe: ‘Jihova ua ku tangela phala kuloke Izalaiele.’ Balamu uambe: ‘Eme nga lueza. Nga-nda vutuka kubhata.’ Maji o anju  iambe: ‘Ndaie ku Mouabhe, maji kále u zuela ngó kia ku tumu Jihova.’

O kuila Balamu ua dilongo disá? Kana. Kioso kia bhiti o ima íii, Balamu ua loka dingi Izalaiele mu veji jitatu, maji Jihova ua bhangesa o izuelu iê iaiibha kukala mabesá. Mu kusukaku akua Izalaiele a buikisa akua Mouabhe, anga Balamu a mu jibha. Ki kieji kala kima kiambote, se Balamu ua belesele Jihova?

“Alukenu, mu di lange ku luímbi, mukonda o muenhu ua muthu ki u tundu mu unvuama uê ua kuvula o jimbongo.”​—Luka 12:15