Ku bokona mu madisá

Ku bokona mu madisá

 DISÁ 26

O Dikuinhi ni Kiiadi Kia Alondi

O Dikuinhi ni Kiiadi Kia Alondi

Akua Izalaiele a xisa o Mulundu ua Sinai ia ai katé mu kikangalakata kia Palane, mu kididi a kixanene Kadexi. Kuenhoko, Jihova ua tangela Mozé, uixi: ‘Tumikisa 12 kia mala, kala muiji u katula-mu muthu umoxi, phala kulonda o ixi ia Kanana, i nga-nda bhana ana Izalaiele.’ Mu kiki, Mozé ua solo 12 kia mala, iú ua a tangela uixi: ‘Ndenu mu ixi ia Kanana, mu tala se o mavu a uabha phala kudima. Mu tala se o athu akua nguzu mba a bhuila, se o jisanzala jâ jala bhu kanga dia hatu mba a ji xiti ni imbaka.’ O 10 kia alondi, ni Josuué ni Kalebe ene oso ai mu ixi ia Kanana.

Mu kubhita 40 a izuua, o alondi a vutuka, eza ni jifiku, ilénde ia jiloma ni ia jiuva. O alondi exi: ‘Ixi iambote, maji o athu akua nguzu, o jisanzala jâ, a ji xiti ni ilumbu ia lebha kiavulu.’ Kalebe anga ua zuela: ‘Tu tena ku a tolola. Tu bande!’ Uejiia se mukonda diahi Kalebe ua zuela kiki? Mukonda muene ni Josuué a dielele kiavulu kua Jihova. Maji alondi a mukuá, ambe: ‘Kana, ki tu bande! O athu koko, a lebha kiavulu kala mazonda! Tuedi kala tu mahoho muaxaxi ká.’

Mu kuívua kiki, akua Izalaiele a zoza. Ene a mateka kulongolola ni kuzuela mudiâ: ‘Tu sole muthu uéngi, na tu kalele ku pholo ni tu  vutuke mu Ijitu. Mukonda diahi tuia mu kididi kiki na tu jibhe?’ Josuué ni Kalebe ambe: ‘Kanenu kubhukumukina Jihova, ki mu kale ni uôma. Jihova ua-nda tu langa.’ Maji akua Izalaiele ka bhana mátui. Katé muene, a mesenene kujibha Josuué ni Kalebe!

Ihi ia bhange Jihova? Muene uambela Mozé: ‘Né muene ni mbote ioso i nga bhange muaxaxi ka akua Izalaiele, ene a mu ngi bhukumukina hanji. Mu kiki, ene a-nda buakela mu kikangalakata mu 40 a mivu, a-nda fuila muenhomo. O an’â ngó ni Josuué ni Kalebe a-nda bokona mu ixi i nga a kanena.’

“Mualela-hi ni uôma, enu mua tolo o kuxikana?”​—Matesu 8:26