Ku bokona mu madisá

Ku bokona mu madisá

 DISÁ 16

Nanhi Uexile Jobe?

Nanhi Uexile Jobe?

Mu ixi ia Uze, mua tungile diiala dia kexile mu bheza Jihova. A mu ixanene Jobe. Muene uexile mvuama, ua kexile ni muiji ua dikota. Uexile muthu uambote, ua kexile mu kuatekesa o jingadiama, atudi ni an’â itungu. Maji o kuila mukonda dia kukala muthu uambote, Jobe keji bhita mu ibhidi?

Jobe ka kijiidile kuila Satanaji o Diabhu ua kexile mu mu ta diesu. Jihova ua tangela Satanaji: ‘Selevende iami Jobe, ua mu mono? Ki kuala mukuâ mu ngongo ua soko ni muene. Muene u ng’ívua, u lenga o ima iaiibha.’ Satanaji uambe: ‘Kidi, Jobe u ku belesela. Mukonda uene mu mu langa ni ku mu besoala. Ua mu bhana ixi ni ibhaku iavulu. Mu katule ngó o imbamba íii, muene ka-nda ku bheza dingi.’ Jihova uambe: ‘Mu te mu polova. Maji kana ku mu katula o muenhu.’ Mukonda diahi Jihova uehela Satanaji kupolovala Jobe? Mukonda muene uejiidile ni kidi kioso kuila Jobe ueji kolokota mu ufiiele uê.

Satanaji ua mateka kubheka mavuua avulu kua Jobe. Kia dianga, muene ua tumikisa athu, a exanene Jisabéu phala kunhana o jingombe ni jibulu ja Jobe. Kua tuluka túbhia tuohele o jimbudi joso. Kibuka kia mukuá kia athu, akua Kaldeia, eza ia a nhana o jikamelu jê joso. Abhika oso akexile mu langa o ibhaku ióio, a a jibha. Mu kusuluka, kueza o divuua dia beta o kuiibha. Ana oso a Jobe afu kioso kia kexile mu bhanga fesa, o inzo mua kexile ia a buila ku thandu. Jobe ua tolokele o muxima, maji ka bhana dikunda kua Jihova.

Satanaji ua mesenene kutalesa hadi iavulu kua Jobe, mu kidi muene ua bhangesa kuila mu mukutu uoso ua Jobe mu kala ijimbu. Jobe ua kexile mu  kuivua ndolo iavulu. Muene kejiidile se mukonda diahi ua kexile mu bhita mu ima ioio. Maji né kiki, Jobe ua kexile hanji mu bheza Jihova. Nzambi ua muene ioso, ua sangulukile kiavulu mukonda dia ufiiele ua Jobe.

Ku pholo dia kuenda, Satanaji ua tumikisa maiala atatu phala kulola Jobe. Ene a mu tangela: ‘Eie nange ua te kituxi, eie ua ki sueka. Kiene Nzambi kia mu ku kaxtikala.’ Jobe uambe: ‘Ki ngi bhange kima kiaiibha.’ Maji bhenhobho muene ua mateka kufika kuila Jihova muéne ua kexile mu mu bhekela o ibhidi ienióio, iu uambele kuila Nzambi ka kexile mu batula kiambote o maka.

Sai munzangala, a muixanene Edihu, ua kexile mu kuívua kiambote o maka. Mu kubhita ithangana, muene ua mateka o kuzuela, uixi: ‘Ioso i mua zuela, makutu. O unene ua Jihova ki tu tena ku u tendela kiambote. Muene ka tena kubhanga kima kiaiibha. Muene u mona ioso, u kuatekesa o athu a mu bhita ni maka.’

Ku pholo dia kuenda, Jihova ua zuela ni Jobe. Muene uambe: ‘Kuebhi ku ua kexile kioso ki nga bhange o diulu ni ixi? Mukonda diahi ua mu zuela kuila ki nga mu batula kiambote o maka? Eie uejiia ngó kuzuela, maji kuijiie se mukonda diahi o ima ia mu bhita.’ Jobe ua xikina kuila ua tondalele, muene uambe: ‘Nga tondala. Ngevuile ngó ima ia lungu n’eie, maji kindala nga kuijiia kiá kiambote. Sé-ku kima kia ku bhonzo o kubhanga. Ngi loloke mu ioso i nga zuela.’

Kioso Jobe kia zubha o ku mu polovala, Jihova ua bhangesa kuila Jobe u kala dingi ni sauidi iambote iu ua mu bhana jimbongo javulu, m’ukulu ndenge. Jobe ua kexile ku muenhu mivu iavulu ni kusanguluka kuoso. Jihova ua besoala Jobe, mukonda dia ku mu belesela né muene mu ithangana ia bhonzo. O kuila ua-nda kaiela o phangu ia Jobe mu kukolokota kubheza Jihova sumbala ni ibhidi?

“O kukolokota kua Jobe mua kuivua, muejiia ue o disukilu diê kioso Nzambi kia mu zediuisa.”​—Tiiaku 5:11