Kioso Zuze kia kexile mu kaleia, o Sobha ia Ijitu, Falaó, ua lotele jinzoji, ki mu kexile muthu ua tenene ku mu jimbuluila-ju. Sai selevende ia tangela Falaó kuila Zuze ueji tena ku mu lomboluela o jinzoji jê. Bhenhobho Falaó ua tumu kuixana Zuze.

Falaó ua muibhula: ‘U tena ku ngi lomboluela o jinzoji ji nga loto?’ Zuze ua mu tambuijila: ‘Ejiia na-iu, kuma kua-nda kuiza sambuadi dia mivu ia idima iavulu mu ixi ioso ia Ijitu. O ki i zubha o kubhita, kua-nda kaiela sambuadi dia mivu ia nzala; mu kienhiki sola njimu ia diiala, phala kubhaka kudia mu thembu ioso íii, se u bhanga kiki, o mundu ki ua-nda fua ni nzala.’ Falaó anga u zuela uixi: ‘Nga ku solo eie! Eie ua-nda kala u muthu ua kaiiadi ua beta o kota mu ixi ia Ijitu!’ Kiebhi Zuze kia tenene kulombolola o jinzoji jojo kua Falaó? Jihova ua mu kuatekesele kuijiia ihi ia kexile mu lombolola o jinzoji jojo.

Mu sambuadi dia mivu, Zuze ua bhakele kudia kuavulu. Mu kienhiki o kithangana kia nzala kia bhixila mu ixi, kala kia zuelele Zuze. Athu akua jixi joso akexile muia kua Zuze phala kusumba kudia. Kioso tat’ê kiévu kuila ku Ijitu kudia kuavulu, ua tumikisa an’ê phala kusumba kudia.

An’â Jakobo ai kua Zuze, Zuze ua a mono kuila jiphange jê. Maji o jiphange jê kejiidile kuila muene uexile Zuze phang’iâ. Ene a mu fukamena kala kia lotele Zuze mu unzangala uê. Zuze ua mesenene kuijiia se phange jê exile hanji athu aiibha. Mu kiki, muene ua a tangela: ‘Enu mu alondi. Mueza kumona kiebhi ki mu tena ku tu tolola.’ Ene a mu tambuijila: ‘Kana tata! Etu tu 12 kia  jiphange mu ixi ia Kanana. O kasule ketu ua xala ni tat’etu, o mukua uafu.’ Zuze anga u zuela: ‘Ngi bhekedienu o kasule kenu, kiene ngó ki nga-nda xikina kuila mua mu zuela kidi.’ Mu kienhiki, ene a vutuka kua tat’â.

Kioso o kudia kuoso ki kuabhu, Jakobo ua tumikisa dingi an’ê mu ixi ia Ijitu. Mu kithangana kienhókio, ene ambata o kasule kâ, Bejami. Phala kulola o jiphange jê, Zuze ua sueka o dikau diê dia phalata m’oxi ia mbuenga ia kudia ia Bejami, iu ua tatela o jiphange jê kuila a di nhanene. Kioso o jiselevende ja Zuze kia sange o dikau mu mbuenga ia Bejami, o jiphange jê a thandanganha kiavulu. Ene a bhingi a diondo kua Zuze phala ku a kaxtikala ene, kana Bejami.

Mu kiki Zuze uejiidile kuila jiphange jê exile kiá athu ambote. Zuze ka tenene dingi ku di sueka. Muene ua di te ni kudila, iu uambe: ‘Eme Zuze, phang’enu. O kuila tat’etu uala hanji ku muenhu?’ Jiphange jê a diuanene kiavulu. Muene ua a tangela: ‘Kanenu kudivua kiaiibha mu ioso i mua ngi bhange. Nzambi ua ngi tumikisa bhabha phala ku mi bhulula. Mu kiki, ndenu ni lusolo, zenu ni tat’etu.’

Ene a vutuka kubhata, ia a tangela kua tat’â o njimbu iambote, ia a muambata mu Ijitu. Kua bhitile kiá mivu iavulu, maji mu kithangana kieniókio Zuze ua kexile dingi kumoxi ni tat’ê.

“Se mu kamba-phe kuloloka athu ikuma iâ, ni Tat’enu uene ku diulu ka mi loloka ue ikuma ienu.”​—Matesu 6:15