Sai diiala uexile kinema, ua xikamene ni kubhinga jimola bhu muelu ua tembulu izuua ioso. Sai kizuua mu ngoloxi, muene ua mono Phetele ni Nzuá kubokona mu tembulu. Muene ua a tangela: ‘Nga mi diondo, ngi bhanie-nu kama.’ Phetele ua tambuijila: ‘O kima ki nga mesena ku kubhana, kia beta-o-kota, o kitadi ndenge. Mu dijina dia Jezú, balumuka uende!’ Mu kusuluka Phetele ua mu kuatekesa o kuimana. Mu kiki o diiala ua mateka kuenda! O mundu ua sanguluka kiavulu mu kumona o kidiuanu kiki. Mukonda dia kiki, athu avulu a mateka kuxikina o milongi ia jipoxolo.

Maji o akunji ni Jisaduseu akexile ni njinda iavulu. A kuata o jipoxolo, anga a ambata mu inzo ia kufundisa, iá a ebhuidisa: ‘Nanhi ua mi bhana o kutena kua kusaka o diiala didi?’ Phetele ua tambuijila: ‘Jezú Kristu, mua mu jibhile, muene ua tu bhana o kutena.’ O atuameni a jingeleja ambe: ‘Kana kulonga maka a lungu ni Jezú!’ Maji o jipoxolo a tambuijila exi: ‘Tua tokala kuzuela ia lungu ni muene. Ki tua-nda fula.’

Kioso Phetele ni Nzuá kia tundu, ai mu di sanga ni maxibulu a mukuá, phala ku a tangela ioso ia bhitile. Ene a sambe kumoxi, anga a diondela Jihova, exi: ‘Tua ku dióndo, tu kuatekese kubhua uôma, ni tu suluke ni kubhanga o kikalakalu kiê.’ Jihova ua a bhana nzumbi ikola. Mu kiki, ene a suluka mu kuboka ni kusaka o athu. Mundu uavulu ua xikina o kidi kia Nzambi. Kuma o Jisaduseu akexile ni njinda iavulu, a te o jipoxolo mu kaleia. Maji mu usuku, Jihova ua tumikisa anju, ia jikula o mabhitu a kaleia, anga u tangela o jipoxolo, uixi: ‘Vutukenu mu tembulu, mua ka longe o athu.’

Mu kamene, a tangela o atuameni a jingeleja, exi: ‘Tua sange o kaleia a ka jika muene kiambote, maji o athu u mua kase, kala-mu! Ene ala mu Tembulu, a mu longa o athu!’ A kuata dingi o jipoxolo, ia ambata  bhu pholo ia Atuameni a jingeleja, phala ku a fundisa. O mukunji ua dikota uambe: ‘Etu tua mi fidisa kiá kulonga maka a lungu ni Jezú!’ Maji Phetele ua tambuijila, uixi: “Tua bhingi tu tumaka Nzambi, kana athu.”

O atuameni a jingeleja akexile ni njinda iavulu. Mukonda dia kiki, ene a mesenene kujibha o jipoxolo. Maji sai diiala uexile Falizeu, a mu ixanene Ngamadiiele, ua balumuka bhu kaxi kâ, iú uambe: ‘Alukenu! Nzambi uala ni maiala iá. Mua mu sota kubhânga ni Nzambi?’ Ene a xikina o kitendelesu kiê. Kia zubha kubeta o jipoxolo ni ji xikote, a a fidisa dingi kuboka, anga a a jituna. Maji o kitumu kia bhanene, ki kia a bhekesa uôma. Ene a suluka, ni kuboka o njimbu iambote ni kusuina kuoso. Akexile mu boka nzo ni inzo, ni mu thembulu.

“Tua bhingi tu tumaka Nzambi, kana athu.”—Ikalakalu 5:29