Timote uexile munzangala mu kilunga kia Listra. Tat’ê uexile mukua Ngelexia, manh’â uexile mukua Judá. Manh’â, Eunise ni kuku’ê, Loide a mu longo ia lungu ni Jihova tundé mu undenge uê.

Kioso Phaulu kia kundu o kilunga kia Listra lua kaiadi, muene ua mono kuila Timote ua zolele kiavulu o jiphange, iu ua mesenene kua kuatekesa. Phaulu uexana Timote phala kuia-nê kumoxi mu njila iê. Mu kubhita kithangana, Phaulu ua longo Timote kukala muboki ni mulongexi ua katunda ua njimbu iambote.

O nzumbi ikôla iendesa Phaulu ni Timote mu ididi ioso mu’aile. Sai kizuua mu usuku, Phaulu ua mono mu kisuma diiala dia mu tangela phala kuia ku Masedonha mua kuatekesa. Mu kienhiki, Phaulu, Timote, Sila, ni Luka endele kuenhoko mu boka ni kubhanga ilunga.

Mu mbanza ia Tesalonika, ku Masedonha, mala avulu ni ahatu a kituka Jikidistá. Maji sai Jijudé a kexile ni difuba dia Phaulu ni makamba mê. Ene a di bhongolola anga a koko o jiphange katé ku pholo ia jinguvulu ja mbanza, anga a dikola exi: ‘O mala iá jinguma ja nguvulu ia Loma!’ Phaulu ni Timote a kexile mu kiluezu, mukonda dia kiki a lengela ku Beleia mu usuku uenhó.

O athu mu Beleia a kexile ni hânji iavulu ia kuívua o njimbu iambote, mukonda dia kiki ni Jingeleku ni Jijudé a kituka Jikidistá. Maji kioso Jijudé kia tundu mu mbanza ia Tesalonika iá ai ku Beleia, a bheka dingi maka, mu kiki Phaulu uai ku Atena. Timote ni Sila a xala mu Beleia phala kusuínisa o jiphange. Mu kubhita kithangana, Phaulu ua tumikisa Timote mu mbanza ia Tesalonika phala kukuatekesa o jiphange kukolokota sumbala ni  izukutisu ia kexile mu dibhana na-iu. Mu kubhita thembu, Phaulu ua tumikisa Timote phala kukunda ilunga ia mukuá ni kua suínisa.

Phaulu ua tangela Timote uixi: ‘Oso andala kusidivila Jihova a-nda kua zukutisa.’ Timote a mu zukutisa anga a mu te ue mu kaleia mukonda dia kixikanu kiê. Muene ua sangulukile mu kulondekesa o ufiiele uê kua Jihova.

Phaulu ua tangela jiphange akua Filipe: ‘Nga mu tumikisa Timote kokuenu. Muene ua-nda mi longa ihi ilombolola kuenda mu kidi, ua-nda mi longesa ue kiebhi ki mu tena kukalakala kiambote mu ukunji.’ Phaulu ua dielele Timote. Ene a kalakala ni kusidivila kumoxi kala makamba mu mivu iavulu.

“Ki ngala dingi ni muthu ua sokela-nê muxima, u mi kala ni muanu ua kidi mu ku mi tambula konda. Mukonda akua ene oso a bhindamena ima iâ-ene, ka bhindamena ima ia Jezú Kristu.”—Filipe 2:20, 21