Ku bokona mu madisá

Ku bokona mu madisá

 DISÁ 97

Koloneliu u Tambula Nzumbi Ikola

Koloneliu u Tambula Nzumbi Ikola

Mu Sezaleia, mua kexile muthu uonene mukua Loma, uexile kabhitangu ka masoladi. Dijina diê Koloneliu. Sumbala muene kexile Judé, o Jijudé akexile ku mu xila kiavulu. Muene ua kexile mu kuatekesa o jingadiama, ni athu oso a bhindamene. Koloneliu ua xikinine kua Jihova. Mukonda dia kiki, muene ua kexile mu samba ithangana ioso. Sai kizuua, o anju ia monekena Koloneliu, anga i zuela: ‘Nzambi uevu o misambu ié. Tuma athu ku Jopa, kua Phetele, n’eza mu ku sanga.’ Mu kithangana kieniókio, Koloneliu ua tumikisa maiala ku Jopa. Phala kubhixila mu mbanza íii, ene a tokalele kuenda 48 a jikilómetulu.

Kioso kiexile mu Jopa, Phetele ua mono kisuma. Muene ua mono o iama ia fidisile o akua Judá ku i dia, anga uivua dízui dia mu tangela phala kudia. Phetele ua ditunu mu kuzuela: ‘Maji eme kiluua ngi dia kiama kia xidi ku muenhu uami.’ Anga uivua dingi o dízui dia zuela, uixi: ‘Kana kuzuela, iama íii ia xidi. Nzambi ua i zelesa.’ Phetele, a mu tangela: ‘Kuala maiala atatu ku muelu ua inzo ié. Tuluka, uie-nâ kumoxi.’ Phetele ua tuluka, anga uibhula o maiala, se a mu bhanga ihi bhu muelu uê. Ene a tambuijila: ‘Koloneliu, kabhitangu mukua Loma, muene ua tu tumu. Eie ua tokala kuia ku inzo iê mu Sezaleia.’ Phetele  ua bhingi ku maiala, phala kuzeka ku bhata diê. Mu kamene, muene, ni jiphange ja mukuá ja Jopa, ai kumoxi mu Sezaleia.

Kioso Koloneliu kia mono Phetele, muene ua fukama. Maji Phetele ua zuela: ‘Imana! Eme ue ngi muthu ni mukuenu. Mua k’ijiia kuma muthu uala Judé, Nzambi ua mu fidisa o kukuata ukamba ni mukua’xi iengi, mba kubokona ngó m’onzo iê ni kubhongoloka-nê kumoxi. Mu kiki-phe, mukonda diahi mua ngi tumina ku ng’ixana?’

Koloneliu ua tambuijila Phetele, uixi: ‘Lelu kizuua kia kauana tundé ki nga kexile mu samba, anga ku ngi tukulukila anju ia Nzambi, ia ngi tangela phala ku kuixana. Mu kiki-phe, tua ku dióndo tu longe o Mak’â Jihova?’ Phetele uambe: ‘Nga mono kuma Nzambi kene ni katombo ka athu. Muene u tambulula uoso ua mesena ku mu bheza ni kuiuka.’ Phetele ua a longo ima iavulu ia lungu ni Jezú. Mu kusuluka, Koloneliu ni athu a mukuá akexile nê kumoxi, a tambula o ujitu ua nzumbi ikola, iá a batizala.

“Ku akua jixi joso, uoso u mu xila muène, hé u bhanga ioso iaiuka, Muène u mu tambulula.”—Ikalakalu 10:35