Ku bokona mu madisá

Ku bokona mu madisá

 DISÁ 82

Jezú u Longa o Maxibulu Mê Kiebhi Kia Tokala Kusamba

Jezú u Longa o Maxibulu Mê Kiebhi Kia Tokala Kusamba

Ima ioso ia bhangele o Jifalizeu iexile phala kutambula fuma ia athu. Se a bhangele ima iambote, o athu a tokalele ku kijiia. Ene exile mu samba mu ididi mua kexile athu avulu, phala ku a mona. O Jifalizeu exile mu bhaka misambu ia lebha mu mútue, anga a i bhitulula mu malombe ni mu ikoka mua kexile athu eji ku a evua. O athu a sasumuka kioso Jezú kia ambela: ‘Kanenu kusamba kala kiene mu bhanga o Jifalizeu. Ene a banza kuila, Nzambi ua-nda ku a evua mukonda dia kuzuela kiavulu maji ki kiene. O musambu phala eie ngó ni Jihova. Kana kubhitulula o izuelu mu musambu. Jihova ua mesena kuila, mu zuela o ima iala ku mixima ienu.

‘Mua tokala kusamba kiki: “Tata ietu uene mu diulu, dijina dié a dixile. Utuminu ué uíze. Vondadi ié a i bhange bhoxi kala kiala ku i  bhanga ku diulu.” Jezú ua ambela kuila, ene a tokalele kusamba mu kubhinga o mbolo ia kizuua ni kizuua, kubhinga o muloloki ua ituxi, ni ibhindamu iamukuá ia muenhu.

Jezú uambe: ‘Ki mu fule o kusamba. Suluke-nu ni kubhinga ima iambote kua Tata ienu Jihova. Jitata joso a uabhela kubhana ima iambote ku tuana tuâ. Tata iebhi mu dienu se mon’ê u mu bhinga mbolo, u mu bhana ditadi? Mba se mon’a ua mu bhingi mbiji, u mu bhana nhoka?’

Mu kusuluka, Jezú ua jimbulula o disá: ‘Enu-phe sumbala mu akuá ituxi, muejiia kubhana ima iambote ku an’enu, manhi Tat’enu Jihova, ka kala kota mu kubhana o nzumbi ikola kua ió oso a mu bhinga? Ioso i mua tokala kubhanga, o kubhinga ngó kua muene.’ O kuila ua mu kaiela o kitendelesu kia Jezú? Ima iahi i u bhinga mu musambu?

“Bhinga, nda a ku bhane; sota, nda u sange; phupha, nda a ku jikuile.”—Matesu 7:7