Samuuele ua kudila mu tembulu, mua kexile mu kuíza o athu phala ku bheza Jihova, muene mua kexile mu kalakala. Eie uejiia kiebhi kiai Samuuele mu tunga mu tembulu? Tu dianga ku di longa ia lungu ni manh’á Samuuele Hana.

Mu mivu iavulu, Hana ka kexile mu vuala, maji ua mesenene kiavulu ku vuala mon’a. Kienhiki, muéne ua sambe kua Jihova, iu ua diondela ku mu kuatekesa. Muéne ua mu kanena kuila, se u mu bhana mon’a, ueji mu bhakula mu tembulu. Jihova ua tambuijila o musambu anga muéne u vuala mon’a diiala. Muéne ua mu luku dijina dia Samuuele. Kala kia kanene Hana, kioso Samuuele kia tenesa mivu itatu mba iuana, muéne ua mu ambata mu tembulu, phala ku sidivila Nzambi.

Eli uexile mukunji mu tembulu. O an’ê kiiadi akexile mu kalakala ué mu tembulu. Lembalala kuila, o tembulu iexile inzo ia ku bheza Nzambi, o athu akexile mu tembulu, a tokalele ku bhanga o ima iambote. Maji o an’a a Eli akexile mu bhanga ima ia iibha. Samuuele ua mono ia kexile mu bhanga. O kuila Samuuele ua bhangele ué ima ia iibha kála o an’a a Eli?— Kana, muéne ua kexile mu bhanga ngó ima iambote kála kia mu longele o jitata jê.

Ihi i u xinganeka ia tokalele o ku bhanga Eli ku an’ê kiiadi?— Muéne ua tokalele ku a bazela. Ka tokalele ku a ehela dingi ku kalakala mu inzo ia Nzambi. Maji ki kiene kia bhangele Eli, mukonda dia kiki, Jihova ua dizangala nê, ni an’ê kiiadi. Jihova ua a kaxtikala.

Samuuele ua bhanene njimbu ia Jihova kua Eli

Mu usuku, kioso kia kexile mu zeka, Samuuele uevu dízui dia kexile ku mu ixana: ‘Samuuele!’ Muéne ua lengela kua Eli, maji Eli uambe: ‘Ki ngi ku ixana.’ A mu ixana dingi mu veji ia kaiiadi. Mu veji ia katatu, Eli uambela Samuuele kuila, se uivua a ku ixana dingi, ua kela: ‘Nga ku dióndo Jihova, zuela, mubhik’ê  iu uivua.’ Samuuele ua bhange kala kia mu tumina. Jihova uambela Samuuele: ‘Tangela Eli kuila, eme nga-nda kaxtikala o muiji uê, mukonda dia ima ia iibha ia mu bhanga.’ Eie ua fika kuila, ki ki bhonzele kua Samuuele ku tangela o njimbu íii kua Eli?— Kana, kia bhonzele. Sumbala Samuuele ua kexile ni uôma, maji ua bhangele ia mu tumine Jihova. Jihova ua kumbidila ia zuelele. O an’a kiiadi a Eli a a jibha, Eli ué uafú.

Samuuele phangu iambote phala etu. Muéne ua bhangele o ima iambote, sumbala ua kexile mu mona o athu ku bhanga ima ia iibha. Abha eie ué? Ua-nda kala kála Samuuele, mu ku suluka mu ku bhanga o ima iambote? Se u bhanga kiki, Jihova ni ji tata jê, a-nda sanguluka.

TANGA MU BIBIDIA IÊ

  • 1 Samuuele 2:22-26; 3:1-21