Tu di longe ia lungu ni munzangala ua bhulula o muenhu ua sekulu’ê. O sekulu ia munzangala iú, uexile poxolo Phaulu. Ki tuijiia o dijina diê, maji tuejiia kuila, muéne ua bhangele kima kia londekesele ku suína. Ua mesena kuijiia se ihi ia bhangele?—

Phaulu ua kexile mu kaleia mu Jeluzaleme. Muéne a mu kutile, mukonda ua kexile mu zuela ia lungu ni Jezú. Saí maiala a zembele Phaulu, mukonda dia kiki, a xinganeka ndunge phala ku mu jibha. Ene a zuela: ‘Tu bhingenu kabhitangu phala ku tumina o masoladi mê ku bheka Phaulu ku mbonge. Tua-nda di sueka mu njila, kioso kia-nda bhita Phaulu, tua-nda mu jibha!’

O muevu ua tangela sekulu’ê Phaulu ni ku kabhitangu ka masoladi o ndunge ia maiala

O muevu a Phaulu, uevu o ndunge ia kexile na-iu o maiala. Ihi ia bhange? Muéne uai mu kaleia, iu ua ki tangela Phaulu. Phaulu ua mu tendelesa kuia ni lusolo mu tangela o ndunge iâ ku kabhitangu ka masoladi. Ihi i u banza, o kuila ki ki bhonzele phala o muevu a Phaulu kuia ku ki tangela ku kabhitangu ka masoladi?— Kia bhonzele, mukonda o kabhitangu uexile muthu ua katunda. Maji o muevu a Phaulu ua suínine, iu uai mu zuela ni kabhitangu.

O kabhitangu ka masoladi uejidile kiambote ihi ia tokalele o ku bhanga. Muéne ua bhongolola 500 ja masoladi phala ku langidila Phaulu! Muéne ua a tumina kuambata Phaulu ku Sezaleia mu usuku uenhó. O kuila Phaulu ua bhuluka?— Xé, ua bhuluka mukonda o maiala a iibha ka tenene ku mu bhanga kia iibha! O ndunge iâ, ki i tundu kiambote.

Ihi i u di longa ku musoso iú?— Eie u tena ué ku suína kála kia suínine o muevu ua Phaulu. Tua tokala ku suína, kioso ki tu zuela ni akuetu ia lungu ni Jihova. Eie ua-nda suína mu ku suluka ni kuzuela ia lungu ni Jihova?— Se u bhanga kiki, nange ua-nda bhulula muenhu ua muthu.

TANGA MU BIBIDIA IÊ

  • Ikalakalu 23:12-24

  • Matesu 24:14; 28:18-20

  • 1 Timote 4:16