Ku bokona mu madisá

Ku bokona mu madisá

 Disá 4

Muéne ua Sangulukisa Tat’ê ni Jihova

Muéne ua Sangulukisa Tat’ê ni Jihova

Ihi ia mu kanena Jefete kua Jihova?

Kia bhonzele kiavulu kua mon’a Jefete ku kumbidila o kikanenu kia bhangele tat’ê, maji muéne ua kumbidila

Ua mu mona o kilumba kiki mu foto?— Muéne mon’a Jefete. O Bibidia ki i tumbula o dijina diê, maji tuejiia kuila muéne ua sangulukisa tat’ê ni Jihova. Tu di longe dingi ia lungu ni muéne ni tat’ê Jefete.

Jefete uexile diiala diambote, ua bhitile kithangana kiavulu mu ku longa mon’ê, ia lungu ni Jihova. Muéne uexile ué diiala dia suína, uexile ué mutuameni uambote. Mukonda dia kiki, o akua Izalaiele a mu solele phala ku kala mutuameni uâ, kioso kia kexile mu bhânga ni jinguma jâ.

Jefete ua sambele kua Nzambi, mu ku bhinga kikuatekesu phala ku tolola o jinguma. Jefete ua kanena kuila, se ua toluele o jinguma jê, muéne ueji bhakula kua Jihova, o muthu ueji dianga ku tunda mu inzo iê, kioso kieji vutuka ku ita.  O muthu iú, ueji tunga ni ku kalakala mu tembulu ia Nzambi ku muenhu uê uoso. O tembulu iexile o kididi mua kexile múia o athu, phala ku bheza-mu Nzambi mu izuua ienioió. Jefete ua tolola o jinguma! Eie uejiia se nanhi ua dianga ku tunda mu inzo iê, kioso kia vutuka ku bhata?—

Kiene muene, o mon’a Jefete! Muéne uexile mon’ê umoxi-elele, mu kiki Jefete ua tokalele ku mu tumikisa dikanga. Kiki kia mu luualesa kiavulu. Maji lembalala kuila muéne ua ki kanene kua Jihova. Mu kithangana kieniókio, o mon’ê uambe: ‘Papá, eie ua kanena kua Jihova, mu kiki, eie ua tokala u kumbidila o kikanenu kiê.’

Ku mivu ioso, o makamba a mon’a Jefete, akexile múia mu ku mu kunda

O mon’a Jefete ua luualele ué kiavulu. Mu tembulu, muéne keji kazala mba ku vuala an’a. Maji muéne ua mesenene kiavulu ku kumbidila o kikanenu kia bhangele tat’ê, ni ku sangulukisa Jihova. Kiki kia betele kota phala muéne, o ku kazala ni ku vuala an’a. Mu kiki, muéne ua tundu mu inzo ia tat’ê, iu uai mu tunga mu tembulu, iu ua kexile muenhomo muenhu uê uoso.

Eie u xinganeka kuila o ia bhangele muéne ia sangulukisa tat’ê ni Jihova?— Xé ene a sanguluka! Se u belesela, anga u zola Jihova, ua-nda kala ué kála o mon’a Jefete. Ua-nda sangulukisa o jitata jê ni Jihova.

TANGA MU BIBIDIA IÊ

  • Matendelelu 6:4-6

  • Afundixi 11:30-40

  • 1 Kolindo 7:37, 38