Ku bokona mu madisá

Ku bokona mu madisá

 Disá 3

Lahaba ua Xikinine Kua Jihova

Lahaba ua Xikinine Kua Jihova

Xinganeka kuila tuala mu mbanza ia Jedikó. O mbanza íii, tu i sanga mu ixi ia Kanana, mua tungu athu ka xikina ku bheza Jihova. Mua tungu ué muhatu a mu ixana Lahaba.

Kioso kiexile hanji mona-ndenge, Lahaba uevu misoso ia zuela kiebhi Mozé, kia jikula o Kalunga ka Kusuka, ni ku bhulula akua Izalaiele ku Ijitu. Muéne uevu ué kiebhi Jihova, kia a kuatekesa ku tolola o jinguma jâ joso mu ita. Kindala, muéne uevu kuila, o akua Izalaiele a tula mu mbanza ia Jedikó!

Lahaba ua kuatekesa o alondi, mukonda muéne ua kexile ni kixikanu kua Jihova

Mu usuku, akua Izalaiele endele mu londa o mbanza ia Jedikó. Ene a bhixila ku dibhata dia Lahaba. Muéne ua a bokuesa mu inzo. Mu usuku uenhó, o sobha ia Jedikó uevu kuila, mu mbanza mua bokuene alondi, akexile m’inzo ia Lahaba. O sobha ua tumikisa maiala, phala kuia mua a takana. Lahaba ua sueka o alondi ku thala dia inzo, anga uambela o maiala a sobha: ‘O alondi akexile mu inzo iami, maji kala dingi mu mbanza. Se mu a kaiela kindala, mua-nda tena ku a kuata!’ Eie uejiia se mukonda diahi Lahaba ua sueka o alondi?— Mukonda muéne ua xikana kua Jihova, iu uejidile kuila muéne ueji bhana o ixi ia Kanana ku akua Izalaiele.

Ande dia ku xisa o inzo ia Lahaba, o alondi a mu kanena ku bhulula muéne ni muiji uê, kioso kieji kuíza mu buika o mbanza ia Jedikó. Eie uejiia ihi ia mu tendelesa o ku bhanga?— Ene ambe: ‘Kuata o ngoji íii, u i nhengeneka ku njanela iê. Se u bhanga kiki, oso ala mu inzo iê a-nda ku a bhulula.’ Lahaba ua bhange kála kia mu tumine o alondi. Uejiia ihi ia bhiti?—

Jihova ua bhulula Lahaba ni muiji uê

Mu ku bhita izuua, o akua Izalaiele a kondoloka o ixi, sé ku bhanga jibuia. Ene a kondoloka o mbanza mu izuua isamanu, veji imoxi ku kizuua. Maji mu kizuua kia kasambuadi, ene a kondolokele o mbanza sambuadi dia ji veji. Mu kusuka-ku, ene oso a dikola ni dízui dia suína. Jihova ua bhangesa kuila, o ilumbu ia mbanza i lundumuka bhoxi. Maji o inzo  ia kexile ni ngoji ia kusuka mu njanela, ki i lundumukine! U tena ku ki xinganeka?— Lahaba ni muiji uê a bhuluka!

Ihi i u tena ku di longa ku phangu ia Lahaba?— Lahaba ua xikanine kua Jihova, mukonda dia ima ioso iambote ia di longo ia lungu ni muéne. Eie uê ua mu di longa ima iavulu iambote ia lungu ni Jihova. Eie u mu xikana kála kia xikanine Lahaba?— Etu tuejiia kuila eie ua xikana!

TANGA MU BIBIDIA IÊ

  • Josuué 2:1-24; 6:1-5, 14, 15, 20-25

  • Jihebeleu 11:31