Ku bokona mu madisá

Ku bokona mu madisá

 Disá 11

Ene a Soneka ia Lungu ni Jezú

Ene a Soneka ia Lungu ni Jezú

Eie ua mu mona o maiala mu foto?— O maiala enhá, Matesu, Marku, Luka, Nzuá, Phetele, Tiiaku, Juda, ni Phaulu. O maiala enhá, akexile ku muenhu mu izuua ia Jezú, ene a soneka ia lungu ni Jezú. Tu di longe ia lungu ni maiala enhá.

Ihi i uejiia ia lungu ni maiala enhá?

Kitatu kiâ exile o jipoxolo ja bokele kumoxi ni Jezú. Eie uejiia se o kitatu kiki a nanhi?— Matesu, Nzuá ni Phetele. O poxolo Matesu ni Nzuá ejidile kiambote Jezú, kala muthu ua soneka divulu, mua tange ia lungu ni Jezú.  O poxolo Nzuá ua soneka ué divulu, a di exana Dijingunuinu, ni mikanda itatu a ixana Mukanda ua Dianga ua Nzuá, Mukanda ua Kaiiadi ua Nzuá, ni Mukanda ua Katatu ua Nzuá. O poxolo Phetele ua soneka mikanda iiadi iala mu Bibidia. A ixana Mukanda ua Dianga ua Phetele, ni Mukanda ua Kaiiadi ua Phetele. Mu mukanda uê ua kaiiadi, Phetele ua soneka ia lungu ni kithangana kia zuelele Jihova tundé ku diulu ia lungu ni Jezú, kuila: ‘Iu mon’ami. Nga mu zolo, nga mu xikina.’

O maiala a mukuá mu foto, a tu longa ué ia lungu ni Jezú, mu madivulu mâ a soneka. Umoxi, Marku. Nange muéne ua kexile ué mu kithangana kia kutu Jezú, iu ua mono ioso ia kexile mu bhita. O mukuá uexile Luka. Muéne uexile dotolo, nange ua kitukile ngó Kidistá kioso kiafú Jezú.

O asoneki a iiadi a Bibidia, u ua mu mona ué mu foto, exile jindenge ja Jezú. Eie uejiia o majina mâ?— O majina mâ exile Tiiaku ni Juda. Ku dimatekenu, ene ka xikanene Jezú. Akexile mu banza kuila muéne ua tekuka. Maji mu ku bhita kithangana, ene a mateka ku xikina Jezú, ia a kituka Jikidistá.

O musoneki ua Bibidia ua suku-ku, u ua mu mona mu foto, Phaulu. Ande dia ku kala Kidistá, dijina diê diexile Saulu. Muéne ua zembele kinene o Jikidistá, iu ua kexile mu ku a zukutisa. Eie uejiia se ihi ia bhangesa Phaulu ku kituka Kidistá?— Saí kizuua, Phaulu ua kexile mu kuenda njila, kioso kiévu dízui dia muthu ku diulu, ua kexile mu zuela né. Muthu muenhó uexile Jezú! Muéne uebhuidisa Phaulu: ‘Mukonda diahi eie ua zembe o athu a ngi xikana?’ Tundé o kithangana kieniókio, Phaulu ua kituka Kidistá. Phaulu ua soneka 14 a madivulu a Bibidia, ua soneka o divulu dia Loma katé o divulu dia Jihebeleu.

Tuene mu tanga o Bibidia izuua ioso, ki kiene?— Mu ku tanga o Bibidia, tu di longa ima iavulu ia lungu ni Jezú. O kuila ua mesena ku di longa dingi ia lungu ni Jezú?—

TANGA MU BIBIDIA IÊ

  • 2 Phetele 1:16-18

  • Marku 3:21; 14:51

  • Juda 1

  • Ikalakalu 9:1-18