Ihi i u bhanga kioso ki u kala ni uôma?— Nange u bhinga kikuatekesu ku ji tata jê. Maji kuene ué muthu ua mukuá u tena ku ku kuatekesa. O muthu iú uala ni kutena kuavulu, se-ku muthu u mu tunda. O muthu iú ua muijiia se nanhi?— Kidi muene, Jihova Nzambi. Tu di longe mu Bibidia, phangu ia munzangala a mu ixana Davidi. Muéne uejidile kuila, Jihova ueji mu kuatekesa mu ithangana ioso, mukonda dia kiki, muéne ka kexile ni uôma.

Tundé kia mu vuala, Davidi a mu longo ku jitata jê ku zola Jihova. Kiki kia kuatekesa Davidi ku kamba uôma, né muene se kua monekene ibhidi. Muéne uejidile kuila Jihova uexile Dikamba diê, ni kuila Muéne ueji mu kuatekesa. Saí kizuua, kioso Davidi kia kexile mu kuinga o jimbudi jê, kua moneka hoji ionene ia kuata o mbudi iê ni dikanu! Eie uejiia ihi ia bhangele Davidi? Muéne ua kaie o hoji, iu ua i jibha ni maku mê! Kioso o ulusu ki ia kuata o mbudi, Davidi ua i jibha ué! Ihi i ua banze, nanhi ua kuatekesa Davidi?— Kidi muene, Jihova.

Saí kithangana kia mukuá, Davidi ua londekesa kuila ka kexile ni uôma. O akua Izalaiele akexile mu bhânga ni akua Fidíxia. Saí disoladi dia akua Fidíxia, diexile dizonda! Dijina diê Ngoliia. O dizonda didi, dia kexile mu xonguena o masoladi akua Izalaiele, ni Jihova. Ngoliia uexana o masoladi akua Izalaiele kuíza mu bhânga nê. Maji o akua Izalaiele oso akexile ni uôma ua ku bhânga nê. Davidi, kioso kia kívu, uambela Ngoliia kuila: ‘Nga-nda bhânga n’eie! Jihova ua-nda ngi kuatekesa, eme nga-nda ku ku tolola!’ Eie ua xinganeka kuila Davidi ua suínine?— Kiene muene, Davidi ua suínine kiavulu. Eie ua mesena kuijiia ihi ia bhiti dingi?

Davidi ua kuata o mbala funda iê, ni matadi atanu, iu uai mu bhânga ni dizonda. Ngoliia, kioso kia mono kuila Davidi mona ndenge, muéne ua mateka ku xonguena Davidi. Maji Davidi ua mu ambela: ‘Eie uíza ko kuami ni xibhata, maji eme ngiza mu dijina dia Jihova!’  Kienhiki, muéne ua te o ditadi mu mbala funda iê, iu ua di takula kua Ngoliia. O ditadi dia tula bhu dibhômo dia Ngoliia! O dizonda dia bu bhoxi, diáfu! O akua Fidíxia, uôma ua a kuatele, ia a lenge. Kiebhi o munzangala Davidi, kia tena ku tolola o dizonda?— Jihova ua mu kuatekesa, Jihova ua betele mu kutena, o dizonda ndenge!

Davidi ka kexile ni uôma mukonda uejidile kuila, Jihova ueji mu kuatekesa

Ihi i u tena ku di longa mu phangu ia Davidi?— Se-ku muthu ua tundu Jihova mu kutena. Muéne Kamba diê. Se kizuua u kala ni uôma, lembalala kuila, Jihova ua-nda ku kuatekesa o ku suína!

TANGA MU BIBIDIA IÊ

  • Jisálamu 56:3, 4

  • 1 Samuuele 17:20-54