Ku bokona mu madisá

Ku bokona mu madisá

 Disá 7

O Kuila ua Divuile Kiá Ubheka uê, Mba ua Kexile Kiá ni Uôma?

O Kuila ua Divuile Kiá Ubheka uê, Mba ua Kexile Kiá ni Uôma?

Tala o kamona mu foto. Uala kála uala ubheka uê, iu uala ni uôma, ki kiene? O kuila ua divuile kiá kiki?— Saí ithangana, o athu oso ene mu kala ni uôma. O Bibidia i tanga makamba a Jihova a divuile ubheka uâ, akexile ué ni uôma. Umoxi uexile Elija. Tu di longe ia lungu ni muéne.

Jezebele ua mesenene ku jibha Elija

Elija ua tungile m’ukulu mu Izalaiele, ande dia Jezú ku mu vuala. Akabe o sobha ia Izalaiele, kexile mubhezi ua Nzambi ia kidi, Jihova. Akabe ni muhatu’ê Jezabele, exile abhezi a nzambi ia makutu, Bahale. Mukonda dia kiki, athu avulu mu Izalaiele, a mateka ué ku bheza Bahale. O sobha Jezabele uexile muthu ua iibha, ua mesenene ku jibha o abhezi oso a Jihova, ni Elija ué! Eie uejiia ihi ia bhangele Elija?—

Elija ua lenge! Muéne ua lengela mu kikangalakata, iu ua disuekele mu dibanda.  Mukonda diahi muéne ua bhangele kiki?— Kiene muéne, ua kexile ni uôma. Maji Elija ka tokalele ku kala ni uôma. Mukonda diahi? Mukonda muéne uejidile kuila, Jihova ueji mu kuatekesa. Jihova ua londekesele kiá o kutena kuê kua Elija. Saí kizuua, Jihova ua tambuijile o musambu ua Elija, mu ku laukisa túbhia ku diulu. Sé phata, Jihova ueji kuatekesa ué Elija mu kithangana kiki!

Kiebhi Jihova kia kuatekesa Elija?

Kioso Elija kia kexile mu dibanda, Jihova ua mu ibhula: ‘Ua mu bhanga ihi bhabha?’ Elija ua tambuijila: ‘Eme ngó nga xala-ku mu ku u bheza. Ngala ubheka uami, ngala ni uôma ua ku ngi jibha.’ Elija ua banzele kuila, o abhezi oso a Jihova a a jibhile kiá. Maji Jihova uambela Elija: ‘Kana, kiki ki kidi. Kua subhuka hanji 7.000 a athu a mu ngi bheza. Kala u kindanda. Ngala hanji ni kikalakalu kiavulu phala eie!’ O kuila Elija ua sangulukile kioso kiévu kiki?—

Ihi i u tena ku di longa ni maka a bhitile nau Elija?— Eie ku tokala ku divua ubheka uê, mba ku kala ni uôma. Eie uala ni makamba a zolo Jihova, a ku zolo ué. Jihova uala ué ni kutena kuavulu, muéne ua-nda ku kuatekesa! Eie ua sanguluka mu kuijiia kuila kua-nda kala ubheka uê?—

TANGA MU BIBIDIA IÊ

  • 1 Jisobha 19:3-18

  • Jisálamu 145:18

  • 1 Phetele 5:9