Ku bokona mu madisá

Itendelesu Phala o Kiônge Ukexilu Uetu ua Ukidistá ni Ukunji

Itendelesu Phala o Kiônge Ukexilu Uetu ua Ukidistá ni Ukunji

Milongi Yalamu

1. O Kiônge Ukexilu Uetu ni Ukunji a tokala ku ki bhanga kála kiala mu kamukanda Ukexilu Uetu ni Ukunji Milongi Phala o Iônge ni mu kukaiela o itendelesu iala ku luiji. Aboki oso a tokala kua bhana mbandu. Athu a mukuá a mu dilunga ni kilunga a tena ua kutambula mbandu mu xikola íii se a xikina o ilongesu ia Bibidia ni kuila se a mu kuenda kala kia fuamena kuenda o Jikidistá.—be p. 282.

IZUELU PHALA KUMATEKA

 2. Kithangana kimoxi. Semana joso kioso ki bhua o muimbu ni musambu, o muendexi ua kiônge Ukexilu Uetu ni Ukunji ua-nda lombolola bhofele o kiônge. O mwendexi wa tokala kukwata dingi kujipondo janda beta kukwatekesa o kilunga.

O VALOLO IA MAK’Â NZAMBI

  3. Diskulusu: Dikwinyi dya ithangana. O diambu ni milongi nange ia-nda kala ni maba a iadi mba atatu ia-nda moneka mu kamunda Ukexilu Uetu ni Ukunji Milongi Phala o Iônge. O diskulusu didi a tokala ku dibhanga ku kafunga mba mukuatekexi ua tufunga uala ni uhete. Kioso ki tu mateka kutanga divulu dia Bibidia mu kitangelu kia Bibidia kia semana, a-nda londekesa vidiu ia-nda lombolola  o divulu dienhidi. O mulongexi u tena kulondekesa kiebhi o vidiu ia lungu ni diambu. Maji muéne ua tokala kulombolola o jipondo joso jala mu kamukanda. Se bhuala hanji kithangana muene ua tokala kulombolola ue o jifoto jala mu kamukanda ni jivelusu jimoneka kumoxi ni jifoto, mukonda joso jiji ja lungu ni maka a-nda bhanga muene.

 4. Tokuesa o Milongi ia Nzambi: Dikwinyi dya ithangana. Mbandu íii ibhuidisu ni itambuijilu, ki i bhingi kubhanga introdusá né muene concluzá. A tokala ku i bhanga ku kafunga mba mukuatekexi uala ni uhete. Mukujimbulula o jipondo jitatu, o mulongexi wa tokala ku uanuna o kithangana mu kuxinganeka ku ibhindamu ia kilunga. Maji-phe, muene ua tokala kubhanga o ibhuidisu ioso. O kia mukuá, muene ua tokala kutalesa kiambote se o jivelusu ji moneka mu ibhuidisu iiadi ia dianga, a-nda ji tanga mba kana. O jiphange a-nda tambuijila a tokala kuzuela mu 30 a tuithangana mba ndenge.

  5. Kitangelu kia Bibidia: Ithangana Iwana mba itatu. O mbandu íii a tokala ku i bhanga ku diiala. O dixibulu ua tokala kutanga o mbandu ia mu bhana sé kumateka ni kuzubha ni izuelu. O muendexi ua kiônge ua tokala kukuatekesa o maxibulu kutanga ni kutongolola kiambote o maka, kutanga sé kubabajala, kulungulula kiambote o dízui, kuimana mu ididi ia tokala ni kubatula kiambote o izuelu. Kuma sayi ithangana o jivelusu jitola, ithangana yamukwa jivula, o mwendexi wa kyonge Ukexilu ni Ukunji Wetu wa tokala wijiya o uhete wa adilongi kyoso kyanda kwabhana o jimbandu jiji.

KUMBIDILA O MILONGI ÍII MU UKUNJI UÊ

 6. Kwinyi ni kitanu kya ithangana mba ndenge. O kibatu kiki kia kiônge, a ki bhange phala kubhana kithangana ku aboki oso kia kudipelepalala phala kuia mu boka ni kubandekesa o uhete uâ ua kuboka ni kulonga o Mak’â Nzambi. O maxibulu a tokala kukaiela o izuelu i tu sanga mu mbandu ia 1 ia kamukanda Ukexilu Uetu ni Ukunji Milongi Phala o Iônge. O aboki éne a-nda kuijiia se a bhana kadivulu mba a londekesa vidiu i tu sanga mu mbandu Ferramentas de Ensino. Phala kukwatekesa mu sidivisu yakuboka, o jindunge jakuboka jitusanga mu kamukanda milongi phala o yonge, mwala mbandu yamba kiki Tala o Velusu Yiyi mu Jifalamenda Jetu ja Kulonga. O adilongi ene ejiya se akayela o jindunge jala mbandu yiyi kyoso kyanda bhanga o mbandu ya mba kana. O kamukanda Ukexilu Uetu ni Ukunji Milongi Phala o Iônge kanda londekesa ku adilongi o ithangana ya tokala o kubhanga mu mbandu yê, sayi ithangana o kamukanda ka-nda bhana itendelesu ia mukua kwa ene. O maxibulu ka bhingi kusota mak’engi phala kubandekesa ku mbandu iâ mukonda a subhuka hanji ni kithangana. Sai jimbandu, se a ji pelepalala kiambote a tena ku jibhanga mu kithangana kimoxi. Se kua bhingi ni tufunga a tena ua kubhanga mbandu ia maxibulu.

 7. Jividiu phala kubhana umbangi: O jividyu jajindunge jakuboka, janda jixikisa ni kujilombolola mu mbeji yamuvimba. O jividiu jiji ja-nda londekesa kiebhi ki tu bhana o umbangi ua dianga ni kukunda dingi o muthu. O muendexi ua kionge Ukexilu Uetu ni Ukunji muéne ua tokala kubhanga o mbandu iii.

 8. Umbangi ua Dianga: O mbandu íii a tokala ku i bhanga ku phange ia diiala mba ia muhatu. O mukuatekexi ua tokala u kala ue diiala mba muhatu mba ua tokala u kala ndandu iê. O dixibulu ni mukuatekexi ue a tokala a xikama mba emana. O dixibulu ua tokala kumenekena kála ki bhanga o athu mu diembu. O maxibulu a tokala kukuata o izuelu ya ndunge yakuboka i tu sanga mu kamukanda Ukexilu ni Ukunji Milongi Phala o Yônge.

 9. Kukunda o Muthu: O mbandu íii a tokala ku i bhanga ku phange ia diiala mba ia muhatu. Se a i bhana ku diiala, o mukuatekexi uê ua tokala u kala ue diiala. (km 5/97 p. 2) O dixibulu ni mukuatekexi uê a tokala a xikama mba emana. O dixibulu ua tokala u londekesa kiebhi kia tokala kuzuela mu kuvutuka kudibhata dia io uevu kiambote o njimbu mu veji ia dianga. O maxibulu a tokala kukaiela o izuelu i tu sanga mu kamukanda Ukexilu Uetu ni Ukunji Milongi Phala o Iônge.

 10. Kulonga o Bibidia: O mbandu íii a tokala ku i bhanga kuala phange ia diiala mba ia muhatu. Se a i bhana ku diiala, o mukuatekexi uê ua tokala u kala ue diiala. (km 5/97 p. 2) O dixibulu ni mukuatekexi uê a tokala a xikama mba emana. O mbandu a tokala ku i bhanga mu ukexilu u londekesa  kuila a mateka kiá o kudilonga. Ki ku bhingi kubhanga introdusá mba concluzá, o dixibulu u bhanga ngó kiki se o pondo ia tambula ia mu mu bhinga kubhanga kiki. Ki kubhingi ue kutanga o maka oso, o maxibulu éne ejiia. A tokala kulondekesa o ukexilu uambote ua kulonga.

 11. Diskulusu: Mbandu iii a tokala ku i bhanga ku phange ia diiala, ua tokala ku i bhanga mu ukexilu ua diskulusu phala o kilunga.

UENDELU UA UKIDISTÁ

 12. Kioso kia-nda bhua o muimbu, o mbandu ia kaiela ia 15 ia ithangana ia lungu ni mbandu imoxi mba jiiadi ja tokala phala kukuatekesa o jingivuidi ku kumbidila o Mak’â Nzambi. Se ka tange kima, o mbandu íii a tokala ku i bhanga ku tufunga mba mukuatekexi ua tufunga uala ni uhete, maji o mbandu ia lungu ni ibhindamu ia kilunga a tokala ku i bhanga ngó ku kafunga.

  13. Milongi ia Bibidia mu Kilunga: Makwinyi atatu a ithangana mba ndenge. O mbandu íii a tokala ku i bhanga ku kafunga. (Mu ilunga momo mua kambe tufunga tuavulu, a tena kusola akuatekexi a longa kiambote phala kubhanga o mbandu iii.) O kibuka kia tufunga kia tokala kusola se mudiâ nanhi ua tokala kubhanga o mbandu Milongi ia Bibidia mu Kilunga. Oso ió a-nda kua sola, a tokala kuendesa kiambote o milongi, ku i bhanga mu kithangana kia xindi, kulombolola kiambote o jivelusu ja beta-kota ni kukuatekesa athu oso mu kiônge kumona o valolo ia maka a mu kuivua. Ene a tena kutanga dingi o itendelesu ia lungu ni kuendesa o milongi ia Mulangidi. Se jimbandu joso jasemana jabhu kya, kikubhingi dingi kusuluka ni kuzwela. Se ki bhana, kala semana solenu muendexi umoxi ni mutangi umoxi. Se o muendexi ua kiônge Ukexilu Uetu ni Ukunji u tu bhinga phala tu butise o mbandu, mu kiki, o phange ua mu kuendesa o Milongi ia Bibidia muéne uejiia kiebhi kia-nda bhanga phala kusosolola o mbandu. Nange sai jikaxi, muene ua tokala kubhanga ngó o kibhuidisu sé ku ji tanga dingi.

IZUELU IA SUKINA

  14. Ithangana 3 mba ndenge. O muendexi ua kiônge Ukexilu Uetu ni Ukunji, ua-nda bhitulula jipondo ja kiônge ja tokala. Muene wa tokala we kutanga jipondo ja kiônge ja semana iza-mu, nange u tena kutanga kibhuidisu kia-nda tambuijila mu kiônge kia semana ia-nda kuiza-ku. Se kuala hanji kithangana, u tena ué kulembalesa o maxibulu a-nda bhanga mbandu mu semana ia-nda kaiela. Mu ilombuelelu iê ia sukina ia lungu ni kiônge, o muendexi u tena kutanga jingolokela joso-joso, mba kutanga mukanda. Maji ima kala kiebhi kia tokala kuboka, kuxixila, ka tokala ku i tanga ku ditala, mu i ta mu kididi kia jingolekela. Se ka tena kutanga o jingolokela mba mikanda mukonda dia kukamba kithangana, mu kiki o muendexi ua kiônge ua tokala kubhinga ku jiphange jala ni mbandu mu Uendeleu ua Ukidistá phala kuxisa-ku tuithangana. (Tanga o  kaxi 13 ni  17.) O kiônge ki suka ni muimbu ni musambu.

TA O MUXIMA WÉ MU KUTANGA NI KULONGA

 15. Kala dixibulu wa tokala ubheka mu Kyônge Ukexilu ni Ukunji o kadivulu ke Kulonga kikale mu fiziku mba mu eletroniku. O muendexi ua kiônge Ukexilu ni Ukunji wa-nda kuata o kadivulu kaka phala kuximana mba kubhana phangu. Kala dixibulu dia tokala kubelesela o pondo i moneka mu jiparentesis ku mbandu ia kamukanda Ukexilu ni Ukunji Milongi Phala o iônge. O mbandu “Soneka u Mone Kyebhi ki ua mu Ditunda” a i bhange phala o maxibulu, o muendexi ka tokala kuxinda mu mbandu iii.

KUBHANA PHANGU

  16. Kioso kala dixibulu kia-nda zubha kubhanga o mbandu iê, o muendexi ua kiônge Ukexilu Uetu ni Ukunji uala ni kithangana kimoxi phala kuximana ni kubhana milongi bhu kaxi ka kadivulu Kulonga. Kioso o muendexi kia-nda kuixana o dixibulu, muéne ka tokala kutanga o pondo ia-nda kumbidila o dixibulu mu kubhanga o mbandu iê. Maji kioso o dixibulu kia-nda zubha kubhanga o mbandu iê ni kioso kia-nda mu ximana, o muendexi ua tokala kuzuela o pondo ia kumbidila o dixibulu ni kulondekesa ue se mukonda diahi o dixibulu ua ditundu kiambote. Ni henda ioso, zuela ue se mukonda diahi o dixibulu ua tokala kubhanga nguzu phala kukumbidila o pondo ienioio. O muendexi u  tena ue kuximana o dixibulu mu ima ia mukuá iambote ia bhange muene mu kifika se ua mono kuila kuzuela o ima iii kua-nda kuatekesa o dixibulu mba o jingivuidi joso. Se o dixibulu ua bhingi dingi kikuatekesu, a tena ku mu bhana mu kasuekele ku disukilu dia kiônge mba mu kithangana kiéngi kikale se mu pondo ienioío mba ponto ia mukuá ia lungu ni kuzuela, a mu kuatekesa bhu kaxi ka divulu Kulonga mba o divulu Escola do Ministério.— Tanga o  kaxi 17 22 ni  24 phala kuijiia o kikalakalu kia mwendexi ua kiônge Ukexilu Uetu ni Ukunji ni kikalakalu kia mukuatekexi ua kaiadi.

KITHANGANA

     17. Sé-ku mbandu ia tokala kubhita o kithangana kiê né muene o izuelu ia muendexi ua kiônge Ukexilu Uetu ni Ukunji. Se o maxibulu a mu bhita o kithangana, ni henda ioso a tokala kua batula. Se o jiphange a bhange o jimbandu ja kamukuá, a bhiti ua o kithangana kiâ, o mukuatekexi ua kaiadi ua tokala kua exana mu kasuekele phala kua bhana milongi. (Tanga o  kaxi 24.) O kiônge kioso, ni mimbu ni misambu kia tokala kubhanga ola 1 ni 45 a ithangana.

SEMANA IA KAFUNGA KA ILUNGA

 18. Se o kafunga ka ilunga ua mu kunda o kilunga, o kiônge a tokala ku ki bhanga kála kiala mu kamukanda Ukexilu Uetu ni Ukunji Milongi Phala o Iônge, o jimbandu ka tokala ku ji bhanga, jenhiji: Milongi ia Bibidia mu Kilunga mu mbandu Uendelu ua Ukidistá, o mbandu íii a-nda i bhingana ku diskulusu dia 30 a ithangana, dia-nda bhanga ku kafunga ka ilunga. Ande dia diskulusu, o muendexi ua kiônge Ukexilu Uetu ni Ukunji ua-nda bhitulula o kiônge ni kuzuela jipondo ja semana ia-nda kaiela, se kuala mikanda, ua-nda i tanga kiene ngó kia-nda kuixana o kafunga ka ilunga. Kioso kia-nda bhanga o diskulusu, o kafunga ka ilunga ua-nda sukisa o kiônge ni muimbu ua solo muéne. Mwene u tena kwixana muthu wengi phala kubhanga o musambu wa sukina. Se o kilunga kiala ni salas auxiliares, mu semana kioso o kafunga ka ilunga kia-nda kala mu kilunga, ene oso a tokala kukala kumoxi ni kilunga. O kibuka kitena kubhanga yônge ya nemwene kyoso o kafunga ka ilunga kya mu kunda o kilunga kya mu mu tambula konda (congregação anfitriã). Maji o kibuka kiki kia tokala kukala kumoxi ni kilunga phala kuivua o diskulusu dia sidivisu dia-nda bhanga o kafunga ka ilunga.

SEMANA IA KIÔNGE KIA ILUNGA MBA KIA DIKOTA

 19. Mu semana ia iônge ia makota, o kilunga ki kia-nda bhanga kiônge. O milongi ia kiônge mu jisemana jiji, o jiphange a tokala kudilonga na-iu ene ubheka ua mba ni muiji.

SEMANA IA LEMBALASA

 20. Mu kizuua kia lembalasa, ki mu tokala kubhanga-mu kiônge. Maji o iônge ia sidivisu ia kuboka, mu tena ku i bhanga mu kizuua kia Lembalasa..

MUTUAMENI UA KIÔNGE UKEXILU UETU NI UKUNJI

 21. Kafunga a mu solo kuala o kibuka kia tufunga, ua-nda kalakala kála mutuameni ua kiônge Ukexilu Uetu ni Ukunji. O kikalakalu kiê, o kuidika kiambote o kiônge ni kumona se a mu ki bhanga kála kia tokala. Muéne ni mukuatekexi ua kaiadi a tokala kudizuelesa kiambote. Kioso o kilunga kia-nda tambula o kamukanda ka mbeji Ukexilu Uetu ni Ukunji Milongi Phala o Iônge, o mutuameni ua kiônge Ukexilu Uetu ni Ukunji, ua tokala kubhana o jimbandu ku jiphange ja-nda bhanga mbandu mu mbeji ienioio. (Tanga o  kaxi 5-11.) Kala mbandu ia dixibulu ni pondo ia tokala o kukumbidila, a tokala ku i bhana semana jitatu ande dia kubhixila mu kizuua kia-nda bhanga o mbandu bhu kaxi ka kamukanda ka kiônge Ukexilu Uetu ni Ukunji (S-89).

MUENDEXI UA KIÔNGE UKEXILU UETU NI UKUNJI

  22. Kala semana, kafunga kamoxi ka sidivila kála muendexi ua Kiônge Ukexilu Uetu ni Ukunji katé ku disukilu. (Se tufunga mu kilunga tua tolo, a tena kusola mukuatekexi uala ni uhete phala kubhanga o mbandu iii.) Muéne ua-nda pelepalala o izuelu iê phala kumateka ni kuzubha o kiônge ni kulombolola o jividiu ja lungu ni kuboka ni jividiu jilombolola pondo ia ubhe mu kadivulu Kulonga. Muéne ué ua-nda kuixana oso a-nda bhanga mbandu; se ki muala tufunga tuavulu, muéne u tena ué kubhanga jimbandu mu kiônge. Kala mbandu kioso ki i bhua, o muendexi ua kionge, ka tokala  kuzuela kiavulu. O kibuka kia tufunga ene a mona o tufunga a tena kubhanga o kikalakalu kiki. O tufunga a a solo, a sidivila kála endexi a kiônge. Se ki bhana, o mutuameni ua kiônge Ukexilu Uetu ni Ukunji, a tena ku mu sola phala kukala muendexi ua kiônge veji javulu, tufunga tua mukuá ndenge. Se kafunga u tena kuendesa o mbandu Milongi ia Bibidia mu Kilunga, muéne u tena ué kusidivila kála muendexi ua kiônge. Maji tua kudióndo, ijiia kuila o kafunga ua mu sidivila kála muendexi ua kiônge, ua tokala kukuatekesa ni kuximana o maxibulu a bhanga mbandu mu kiônge. O muendexi uala ue ni kikalakalu kia kubhangesa kuila o kiônge ki zubha mu ola ia tokala. (Tanga o  kaxi ka 14 ni  17.) Se o muendexi ua mesena ni kuila saí kididi kiavulu, a tena kuta microfone ia mukuá bhu ditala phala kioso muéne kia-nda kala mu kuixana o phange ua-nda bhanga o mbandu, o phange muenhú u kala kiá bhu ditala. Kiene kimoxi ué o muendexi se ua mesena u tena kuxikama ku meza bhu ditala kioso o maxibulu kia-nda bhanga o jimbandu, kala o kitangelu kia Bibidia ni mbandu Kumbidila o Milongi Íii mu Ukunji Uê. Kubhanga kiki, kua-nda kuatekesa kusumba kithangana.

KAFUNGA KALA KUPHOLO IA KIBUKA KIA TUFUNGA

 23. O kafunga kala kupholo ia kibuka kia tufunga mba kafunga kengi ka mu mu kwatekesa, u bhana o jimbandu ja mukuá, maji o jimbandu ja lungu ni maxibulu, kana. Mu tufunga tuoso a a solo ku kibuka kia tufunga phala kukala endexi a kiônge, muene u sola-bhu o muendexi ua kiônge phala o semana. Ni kikuatekesu kia mutuameni ua kiônge Ukexilu Uetu ni Ukunji, o kafunga kala kupholo ia kibuka kia tufunga ua tokala kubhanga kopia ia minangu ia kiônge ni ku i ta mu kididi kia jingolokela.

MUKUATEKEXI UA KAIADI

   24. Se ki bhana, kima kiambote kusola kafunga hete mu kulonga phala kubhanga o kikalakalu kiki. O kikalakalu kia mukuatekexi ua kaiadi, kukuatekesa mu kasuekele, se kibhana, o tufunga ni akuatekexi a tufunga mu ukexilu uâ ua kulonga mba kubhanga o jimbandu jâ, katé muene o jimbandu mu kiônge Ukexilu Uetu ni Ukunji, madiskulusu a katunda, kuendesa o Milongi ia Mulangidi ni Milongi ia Bibidia mu Kilunga. (Tanga o  kaxi 17.) Se mu kilunga muala tufunga tuavulu jihete mu kuzuela ni kulonga, kafunga kamoxi u tena kusidivila kála mukuatekexi ua kaiadi muvu umoxi. O mukuatekexi ua kaiadi, ka bhingi kubhana milongi mu kithangana, kioso o phange kia zubha kubhanga o mbandu iê.

MAXILU A MUKUÁ

 25. Se saí maxibulu avulu, o kilunga ki tena kukala ni maxilu a mukuá phala kubhanga-mu o jimbandu ja maxibulu. Kala dixilu mua tokala kukala kafunga kamoxi phala kubhana milongi. Se ki muala tufunga tuavulu, mukuatekexi ua tufunga u tena kubhanga o kikalakalu. O kibuka kia tufunga a tokala kusola o mukuatekexi uala ni uhete phala o kikalakalu kiki ni kumona ue se múthu umoxi ngó ua tokala kubhanga o mbandu iii ki ku bhingi dingi athu engi. Uoso a-nda mu sola phala kubhanga o kikalakalu kiki, ua tokala kukaiela o itendelesu i tu sanga mu  kaxi ka 16. Se kuala dixilu dya mukuá mba sala auxiliar, mu kiki-phe o maxibulu a tokala kua tangela phala kuia-mu kioso kia-nda bhita o mbandu Tokuesa o Milongi ia Nzambi mu mbandu ia kiônge O Valolo ia Mak’â Nzambi. O maxibulu a tokala kuvutuka kudibunda ni jiphange ja mukuá mu kilunga, kioso kia-nda bhita o mbandu Kumbidila O Milongi Íii mu Ukunji Uê. Kioso kia mu lombolola vidiu, oso ió ala mu dixilu diengi se ki bhana a tokala a xikama muene mu dixilu muenhomo mu kuivua o mbandu iii. Se ka tena kubhanga kiki, o kafunga u bhana milongi, ua tokala kulondekesa o vidiu mu mutelembe ua kafuetele ni ku i lombolola.

JIVIDIU

 26. A-nda sola jividiu ja lungu ni kiônge kiki. O jividiu ja kaxi ka semana ja-nda kala mu falamenda JW Library®, falamenda iii a tena ku i jikula mu mitelembe iavulu. Saí bhabha, o jividiu ja lungu ni kuboka a ji londekesa kiá mu kiônge Ukexilu Uetu ni Ukunji, a tena ue ku ji londekesa mu iônge ia kuboka.