សំណួរពីយុវវ័យ

ហេតុអ្វីគួររៀនភាសាផ្សេងទៀត?

លេង

ការរៀនភាសាផ្សេងអាចបង្វឹកបង្ហាត់ប្អូនឲ្យចេះលត់ដំខ្លួននិងមានចិត្តរាបទាប។ តើសមតម្លៃឲ្យប្អូនព្យាយាមឬទេ? យុវវ័យជាច្រើននឹងនិយាយថាគឺសមមែន! ហេតុអ្វី? អត្ថបទនេះនឹងពន្យល់ប្អូនអំពីមូលហេតុដែលពួកគេនិយាយដូច្នេះ។

ហេតុអ្វីគួររៀន?

យុវវ័យជាច្រើនរៀនភាសាផ្សេងដោយសារនោះមានក្នុងកម្មវិធីសិក្សានៅសាលា។ តែយុវវ័យឯទៀតមានចិត្តចង់រៀនដោយខ្លួនឯង។ ជាឧទាហរណ៍៖

យុវតីម្នាក់ឈ្មោះអាណាដែលរស់នៅប្រទេសអូស្ត្រាលី បានសម្រេចចិត្តរៀនភាសាឡេតូនី ដោយសារភាសានេះជាភាសាដើមរបស់ម្ដាយគាត់។ អាណាបាននិយាយថា៖«ក្រុមគ្រួសារខ្ញុំមានគម្រោងទៅលេងប្រទេសឡេតូនី ហើយខ្ញុំចង់និយាយភាសានេះជាមួយសាច់ញាតិខ្ញុំនៅទីនោះ»។
ប្អូនជីណាដែលជាសាក្សីព្រះយេហូវ៉ានៅសហរដ្ឋអាម៉េរិកបានរៀនភាសាសញ្ញាអាម៉េរិក ហើយបានរើទៅប្រទេសបេលី ដើម្បីជួយផ្សព្វផ្សាយនៅទីនោះ។ នាងបានប្រាប់ថា៖«ធម្មតាមនុស្សគថ្លង់ប្រហែលជាអាចប្រាស្រ័យទាក់ទងជាមួយមនុស្សបានតែពីរឬបីនាក់ប៉ុណ្ណោះ ដូច្នេះ ពេលខ្ញុំប្រាប់ពួកគេថាខ្ញុំបានរៀនភាសាសញ្ញាអាម៉េរិកដើម្បីបង្រៀនគម្ពីរជាភាសារបស់ពួកគេ ពួកគេពិតជាសប្បាយចិត្តណាស់»។

តើប្អូនដឹងទេ? គម្ពីរប្រាប់ទុកជាមុនថា ដំណឹងល្អអំពីរាជាណាចក្រព្រះនឹងត្រូវផ្សព្វផ្សាយ«ដល់គ្រប់ប្រជាជាតិ គ្រប់កុលសម្ព័ន្ធ គ្រប់ភាសា»។ (ការបើកបង្ហាញ ១៤:៦) ដើម្បីសម្រេចទំនាយនេះ យុវវ័យជាច្រើនដែលជាសាក្សីព្រះយេហូវ៉ាបានបង្កើនកិច្ចបម្រើផ្សាយរបស់ពួកគេដោយរៀនភាសាថ្មីដើម្បីផ្សព្វផ្សាយនៅប្រទេសរបស់ខ្លួនឬនៅប្រទេសផ្សេង។

តើមានការពិបាកអ្វីខ្លះ?

ការរៀនភាសាថ្មីមិនងាយស្រួលទេ។ ប្អូនខឺរីណឺបានរៀបរាប់ថា៖«ខ្ញុំធ្លាប់គិតថា ការរៀនភាសាថ្មីគឺគ្រាន់តែរៀនពាក្យថ្មីៗប៉ុណ្ណោះ។ តែខ្ញុំបានឃើញថា តាមពិតការរៀនភាសាថ្មីក៏រួមបញ្ចូលការរៀនវប្បធម៌ថ្មីនិងមានរបៀបគិតគូរថ្មីដែរ។ បើនិយាយឲ្យចំទៅ គឺត្រូវការពេល ដើម្បីចេះនិយាយភាសាថ្មី»។

ការរៀនភាសាថ្មីតម្រូវឲ្យមានចិត្តរាបទាប។ ប្អូនប្រុសជេម ដែលបានរៀនភាសាអេស្ប៉ាញ បានរៀបរាប់ថា៖«ធម្មតាទេដែលយើងនិយាយខុសច្រើនពេលរៀនភាសាថ្មី តែជាជាងដាក់សម្ពាធលើខ្លួន យើងអាចសើចនឹងកំហុសនោះ»។

សរុបសេចក្ដី៖ បើប្អូនអាចយកឈ្នះឧបសគ្គផ្សេងៗដូចជាការខ្លាចនិយាយខុសជាដើម នោះប្អូនទំនងជាងអាចរៀនភាសាថ្មីបានល្អជាង។

យោបល់៖ បើប្អូនឃើញថាអ្នកឯទៀតរៀនឆាប់ចេះជាងប្អូន សូមកុំធ្លាក់ទឹកចិត្តឡើយ។ គម្ពីរចែងថា៖«ចូរឲ្យម្នាក់ៗពិនិត្យមើលការប្រព្រឹត្តរបស់ខ្លួន រួចគ្រប់គ្នានឹងមានហេតុត្រេកអរអំពីខ្លួនផ្ទាល់ ដោយមិនប្រៀបធៀបខ្លួននឹងអ្នកឯទៀត»។—កាឡាទី ៦:៤

តើមានគុណប្រយោជន៍អ្វីខ្លះ?

ការរៀនភាសាថ្មីផ្ដល់គុណប្រយោជន៍ជាច្រើន។ ជាឧទាហរណ៍ ប្អូនអូលីវាបានរៀបរាប់ថា៖«ពេលយើងរៀនភាសាថ្មី យើងចេះបើកចិត្តឲ្យទូលាយ ហើយអាចមានមិត្តភក្ដិថ្មីៗ»។

ប្អូនម៉ារីបានឃើញថា ការរៀនភាសាថ្មីជួយគាត់ឲ្យមានទំនុកចិត្តមកលើខ្លួនឯងជាង។ គាត់បានរៀបរាប់ថា៖«អ្វីមួយដែលពិបាកសម្រាប់ខ្ញុំ គឺខ្ញុំមិនសូវមានមោទនភាពចំពោះអ្វីដែលខ្លួនបានធ្វើទេ។ តែឥឡូវ ពេលរៀនពាក្យថ្មីម្ដងៗ ខ្ញុំរំភើបចិត្តណាស់ ព្រោះវាធ្វើឲ្យខ្ញុំមានអារម្មណ៍ល្អជាងចំពោះខ្លួនឯង»។

ប្អូនជីណាដែលបានរៀបរាប់នៅខាងដើម បានឃើញថាពេលគាត់បង្រៀនគម្ពីរជាភាសាសញ្ញាដល់មនុស្សគថ្លង់ គាត់កាន់តែមានអំណរថែមទៀតក្នុងកិច្ចបម្រើផ្សាយ។ គាត់បានប្រាប់ថា៖«ពេលខ្ញុំសន្ទនាជាមួយអ្នកឯទៀតជាភាសាកំណើតរបស់ពួកគេ ហើយឃើញទឹកមុខពួកគេយល់អ្វីដែលខ្ញុំចង់និយាយ ខ្ញុំសប្បាយចិត្តណាស់!»។

សរុបសេចក្ដី៖ ការរៀនភាសាមួយទៀត អាចជួយប្អូនឲ្យមានមិត្តថ្មី ជួយប្អូនឲ្យមានទំនុកចិត្តចំពោះខ្លួន និងមានអំណរថែមទៀតក្នុងកិច្ចបម្រើផ្សាយ។ នេះជាវិធីចម្បងមួយដែលជួយយើងឲ្យផ្សព្វផ្សាយដំណឹងល្អដល់មនុស្ស«ពីគ្រប់ប្រជាជាតិ គ្រប់កុលសម្ព័ន្ធ គ្រប់ជនជាតិ និងគ្រប់ភាសា»។—ការបើកបង្ហាញ ៧:៩

ទស្សនៈពីមនុស្សស្រករប្អូន

ប្អូនម៉ូនីកាបានរៀបរាប់ថា៖«បើយើងមានចិត្តគំនិតមិនត្រឹមត្រូវពេលរៀនភាសាថ្មី នោះប្រៀបដូចជាយានជំនិះរបស់យើងបែកកង់។ បើយើងមិនប្ដូរកង់ទេ យើងមិនអាចទៅកន្លែងណាបានឡើយ។ ដូច្នេះ សំខាន់ដែលយើងរក្សាចិត្តគំនិតត្រឹមត្រូវ ទោះជាការរៀនភាសាថ្មីមានការពិបាកខ្លះក៏ដោយ»។

ប្អូនអ៊ីថានបានរៀបរាប់ថា៖«ការរៀនភាសាថ្មីគឺប្រៀបដូចជាការជីកកំណប់។ យើងប្រហែលជីកអស់រាប់ម៉ោងតែមិនឃើញផលអីទេ។ ទោះជាអ៊ីចឹងក៏ដោយ ពេលយើងបន្តជីក យូរៗទៅយើងនឹងឃើញផលមិនខាន។ ដូចគ្នាដែរ បើយើងព្យាយាមអស់ពីសមត្ថភាពរៀនភាសាថ្មី យើងនឹងចេះនិយាយភាសានោះនៅថ្ងៃណាមួយ»។

ប្អូនជេស៊ីកាបានរៀបរាប់ថា៖«ខ្ញុំឃើញថារង្វាន់ធំបំផុតនៃការរៀនភាសាថ្មី គឺខ្ញុំអាចប្រាស្រ័យទាក់ទងជាមួយអ្នកដែលចេះនិយាយភាសានោះ។ ពេលនោះទើបខ្ញុំទទួលស្គាល់ថាពេលវេលានិងការព្យាយាមរៀនភាសាថ្មី គឺសមនឹងតម្លៃមែន!»។