សំណួរពីយុវវ័យ
តើខ្ញុំត្រូវធ្វើយ៉ាងណាដើម្បីសម្រកទម្ងន់?
តើខ្ញុំពិតជាត្រូវសម្រកទម្ងន់ឬទេ?
យុវវ័យខ្លះប្រាប់ថាពួកគេចង់សម្រកទម្ងន់។ ប៉ុន្តែ . . .
យុវវ័យជាច្រើនខ្វល់ពីសម្បកក្រៅជាងខ្វល់ពីសុខភាព។ ពួកគេសាកវិធីខ្លះដែលពួកគេជឿថាធ្វើឲ្យពួកគេឆាប់ស្រកទម្ងន់ ដូចជាបង្អត់អាហារខ្លួនឯងឬលេបថ្នាំសម្រកទម្ងន់ជាដើម។ តាមធម្មតាវិធីទាំងនោះមិនមានប្រសិទ្ធភាពទេ ហើយជួនកាលអាចមានគ្រោះថ្នាក់ទៀតផង។
ប្អូនហេលីបានរៀបរាប់ថា៖«ក្មេងស្រីខ្លះបង្អត់អាហារដើម្បីស្គមលឿនជាង។ តែវិធីនេះធ្វើឲ្យខូចសុខភាព ហើយត្រូវការពេលយូរដើម្បីស្ដារសុខភាពឲ្យល្អឡើងវិញ»។
យុវវ័យជាច្រើនខ្វល់ហួសហេតុពេកពីទម្ងន់របស់ខ្លួន។ ពួកគេប្រហែលជាមានទម្ងន់ល្មមហើយ តែជួនកាលពួកគេគិតថាខ្លួនធាត់ដោយសារប្រៀបធៀបខ្លួនជាមួយនឹងមិត្តភក្តិ ឬតារាស្គមៗដែលបង្ហាញតាមអ៊ីនធឺណិត។
ប្អូនផាអូឡាបានរៀបរាប់ថា៖«ពេលខ្ញុំអាយុ១៣ឆ្នាំ ខ្ញុំប្រៀបធៀបរូបរាងខ្លួនជាមួយនឹងមិត្តភក្តិ។ ខ្ញុំគិតថាពួកគេនឹងចូលចិត្តខ្ញុំជាង បើខ្ញុំស្គមដូចពួកគេ»។
ផ្ទុយពីយុវវ័យទាំងនោះ យុវវ័យខ្លះពិតជាត្រូវសម្រកទម្ងន់មែន។ យោងទៅតាមអង្គការសុខភាពពិភពលោកបានរៀបរាប់ថា . . .
ក្មេងៗនិងយុវវ័យប្រមាណ៣៤០លាននាក់នៅទូទាំងពិភពលោក ដែលមានអាយុរវាង៥ឆ្នាំដល់១៩ឆ្នាំ ច្រើនតែលើសទម្ងន់ឬធាត់ជ្រុល។
នៅឆ្នាំ១៩៧៥ ក្មេងៗនិងយុវវ័យប្រមាណ៤ភាគរយ ដែលមានអាយុរវាង៥ឆ្នាំដល់១៩ឆ្នាំ ជាក្មេងដែលលើសទម្ងន់។ តែមកដល់ឆ្នាំ២០១៦ ចំនួននោះបានកើនឡើងរហូតដល់១៨ភាគរយ។
សព្វថ្ងៃនេះ ប្រទេសភាគច្រើននៅទូទាំងពិភពលោក មិនសូវមានមនុស្សស្គមទេ តែមានមនុស្សធាត់ជ្រុលច្រើនឡើងៗ។
នៅក្នុងប្រទេសក្រីក្រក៏មានអ្នកធាត់ជ្រុលដែរ សូម្បីតែនៅក្នុងគ្រួសារដែលសមាជិកខ្លះខ្វះអាហារូបត្ថម្ភក្ដី។
តើអ្វីជាវិធីល្អបំផុតដើម្បីសម្រកទម្ងន់?
តើវិធីមួយណាដែលប្អូនជ្រើសយក?
១. បង្អត់អាហារ។
២. ហាត់ប្រាណនិងមានរបបអាហារត្រឹមត្រូវ។
៣. ញ៉ាំថ្នាំសម្រកទម្ងន់។
ចម្លើយត្រឹមត្រូវ គឺវិធីទី២៖ ហាត់ប្រាណនិងមានរបបអាហារត្រឹមត្រូវ។
ពេលយើងបង្អត់អាហារឬឈប់ញ៉ាំអាហារប្រភេទខ្លះ ប្រហែលជាឃើញប្រសិទ្ធភាពភ្លាមៗ តែវិធីនេះអាចបង្ខូចសុខភាពរបស់ប្អូន។ ហើយបើប្អូនបរិភោគដូចធម្មតាវិញ នោះទម្ងន់របស់ប្អូនប្រហែលជាឡើងលឿនដែរ។
ផ្ទុយទៅវិញ បើប្អូនមានគោលដៅសម្រកទម្ងន់ដើម្បីសុខភាព ប្អូននឹងមើលទៅមាំមួន ហើយមានអារម្មណ៍ល្អ។ វេជ្ជបណ្ឌិត ម៉ៃឃឺល ប្រេតលី a បានរៀបរាប់ថា៖«វិធីសម្រកទម្ងន់ដែលមានសុវត្ថិភាពបំផុត និងរក្សាសុខភាពល្អក្នុងរយៈពេលវែង គឺផ្ដើមពីទម្លាប់ប្រចាំថ្ងៃ និងការរក្សាទម្លាប់នោះ»។ តើចំណុចសំខាន់ជាអ្វី? បើប្អូនចាំបាច់ត្រូវសម្រកទម្ងន់មែន ប្អូនត្រូវកែប្រែអ្វីមួយចំនួនក្នុងជីវិតប្រចាំថ្ងៃរបស់ប្អូន។
អ្វីដែលប្អូនអាចធ្វើ
គម្ពីរប្រាប់យើងឲ្យ«ប្រព្រឹត្តដោយមានតុល្យភាព» នេះរួមបញ្ចូលទម្លាប់ក្នុងការបរិភោគ។ (ធីម៉ូថេទី១ ៣:១១) មិនត្រឹមតែប៉ុណ្ណោះ គម្ពីរក៏ព្រមានពីការបរិភោគច្រើនជ្រុលដែរ។ (សុភាសិត ២៣:២០; លូកា ២១:៣៤) ពេលគិតគោលការណ៍នេះ សូមរក្សាទម្លាប់ប្រចាំថ្ងៃដើម្បីឲ្យសុខភាពល្អប្រសើរឡើង ដោយសាកធ្វើតាមវិធីដូចខាងក្រោម៖
ស្វែងយល់អំពីអាហារណាដែលធ្វើឲ្យមានសុខភាពល្អ។
ប្អូនមិនចាំបាច់ដាក់កម្រិតពេកចំពោះអាហារដែលប្អូនបរិភោគឡើយ តែពេលប្អូនមានចំណេះដឹងអំពីអាហារណាដែលមានជីវជាតិ នោះជួយប្អូនឲ្យមានរបបអាហារត្រឹមត្រូវ។ របបអាហារនោះជាវិធីល្អបំផុតដែលជួយប្អូនរក្សាទម្ងន់របស់ខ្លួនឲ្យនៅថេរ។
ហាត់ប្រាណជាទៀងទាត់។
សូមគិតអំពីសកម្មភាពប្រចាំថ្ងៃ ដែលជួយប្អូនឲ្យមានចលនា។ ជាឧទាហរណ៍ ជាជាងប្រើជណ្ដើរយន្ត សូមឡើងចុះដោយប្រើជណ្ដើរជើង។ ជាជាងអង្គុយលេងហ្គេមវីដេអូកន្លះម៉ោង សូមយកពេលនោះដើរហាត់ប្រាណនៅខាងក្រៅវិញ។
បរិភោគអាហារដែលមានជីវជាតិ ជៀសវាងប្រភេទអាហារបង្ខូចសុខភាព។
ប្អូនសូហ្វៀបានរៀបរាប់ថា៖«ពេលខ្ញុំចេញទៅណាម្ដងៗ ខ្ញុំព្យាយាមដាក់ដំណាប់បន្លែ និងដំណាប់ផ្លែឈើតាមខ្លួន។ ពេលខ្ញុំមានអ្វីទ្រាប់ពោះហើយ ខ្ញុំមិនសូវចង់ញ៉ាំអាហារដែលមិនមានជីវជាតិទេ»។
ញ៉ាំយឺតៗ។
អ្នកខ្លះញ៉ាំលឿនពេក រហូតដល់លែងដឹងថាឆ្អែត! ដូច្នេះ សូមញ៉ាំយឺតៗ។ សូមផ្អាកសិនមុននឹងញ៉ាំថែមទៀត។ ពេលធ្វើដូច្នោះ ប្អូននឹងឃើញថាខ្លួនមិនឃ្លានខ្លាំងណាស់ណាទេ។
ប្រយ័ត្ននឹងអាហារដែលមានកាឡូរីខ្ពស់។
សូមមើលថាអាហារដែលប្អូនបរិភោគមានកាឡូរីច្រើនប៉ុនណា។ ប្អូនដឹងទេ បង្អែម ទឹកក្រូច និងអាហារខ្លាញ់ៗមានកាឡូរីច្រើន ហើយវាធ្វើឲ្យប្អូនឡើងទម្ងន់។
មានតុល្យភាព។
ប្អូនសារ៉ាដែលមានអាយុ១៦ឆ្នាំ បានរៀបរាប់ថា៖«ពេលណាឃើញអាហារក្នុងចាន ខ្ញុំចេះតែគិតពីបរិមាណកាឡូរី។ អ្វីដែលខ្ញុំឃើញមិនមែនអាហារទេ តែជាចំនួនកាឡូរីវិញ»។ ប្អូនមិនចាំបាច់គិតពីកាឡូរីរហូតឡើយ។ យូរៗម្ដង ប្អូនអាចញ៉ាំអ្វីដែលឆ្ងាញ់ៗក៏បាន ទោះជាវាមានកាឡូរីច្រើនក៏ដោយ។
យោបល់៖ សូមពិភាក្សាជាមួយគ្រូពេទ្យអំពីកង្វល់របស់ប្អូនទាក់ទងនឹងការឡើងទម្ងន់។ គាត់អាចផ្ដល់ព័ត៌មានពីវិធីជួយប្អូនឲ្យសម្រកទម្ងន់ដែលត្រូវនឹងរាងកាយរបស់ប្អូន។
a ពីសៀវភៅWhen Things Get Crazy With Your Teen។
លោកអ្នកក៏ប្រហែលជាចូលចិត្តដែរ
សំណួរពីយុវវ័យ
តើតាមរបៀបណាខ្ញុំអាចមានរបបអាហារដែលមានតុល្យភាព?
បើក្មេងម្នាក់មិនមានសុខភាពល្អ នោះគាត់ប្រហែលជាពិបាកមានសុខភាពល្អពេលធំឡើង។ ដូច្នេះ ដើម្បីមានសុខភាពល្អតាំងពីក្មេង គឺជាការល្អដែលអ្នកបរិភោគអាហារដែលមានប្រយោជន៍សម្រាប់សុខភាពចាប់ពីឥឡូវនេះ។
សំណួរពីយុវវ័យ
តើខ្ញុំគួរធ្វើយ៉ាងណាដើម្បីចង់ហាត់ប្រាណច្រើនជាង?
ក្រៅពីធ្វើឲ្យមានសុខភាពល្អដល់រាងកាយ តើមានប្រយោជន៍អ្វីទៀតដែលមកពីការហាត់ប្រាណជាទៀងទាត់?
ទស្សនៈពីមនុស្សស្រករប្អូន
ទស្សនៈរបស់ប្អូនៗយុវវ័យអំពីរូបសម្ផស្ស
ហេតុអ្វីប្អូនៗយុវវ័យពិបាកមានទស្សនៈត្រឹមត្រូវអំពីរូបសម្ផស្ស? តើអ្វីអាចជួយពួកគេបាន?
