សំណួរពីយុវវ័យ
តើតាមរបៀបណាខ្ញុំអាចបង្ហើយកិច្ចការសាលា?
ប្អូនដាវីឌបានរៀបរាប់ថា៖«ខ្ញុំអស់កម្លាំងណាស់ត្រូវងើបម៉ោងមួយយប់ដើម្បីធ្វើកិច្ចការសាលា។ ខ្ញុំធ្វើមិនចូលទេព្រោះបើកភ្នែកមិនរួច»។
ប្អូនថេរីសាបានរៀបរាប់ថា៖«ជួនកាលខ្ញុំរៀនរហូតដល់ម៉ោង៤កន្លះទៀបភ្លឺ ហើយត្រូវងើបម៉ោង៦ព្រឹកដើម្បីទៅសាលាទៀត។ ខ្ញុំហត់ណាស់!»។
តើកិច្ចការសាលារបស់ប្អូនគរដូចភ្នំទេ? បើមែន អត្ថបទនេះអាចជួយប្អូនបាន។
ហេតុអ្វីបានជាគ្រូឲ្យកិច្ចការសាលា?
ក្នុងចំណោមកិច្ចការឯទៀត កិច្ចការសាលា . . .
ជួយបង្កើនចំណេះដឹងដល់ប្អូន
ជួយបង្រៀនប្អូនឲ្យមានទំនួលខុសត្រូវច្រើនជាង
ជួយប្អូនឲ្យចេះបែងចែកពេលវេលា និងចេះប្រើពេលវេលាដោយឈ្លាសវៃ
ជួយប្អូនឲ្យយល់និងធ្វើតាមព័ត៌មានដែលប្អូនបានរៀននៅសាលា a
ប្អូនម៉ារីបានរៀបរាប់ថា៖«កិច្ចការសាលាជាវិធីមួយដែលគ្រូជួយសិស្សឲ្យអនុវត្តអ្វីដែលគាត់បានបង្រៀន មិនមែនសិស្សគ្រាន់តែស្ដាប់ រួចមកភ្លេចចោលនោះទេ»។
មុខវិជ្ជាគណិតនិងវិទ្យាសាស្ត្រជួយប្អូនបង្កើនសមត្ថភាពក្នុងការរកដំណោះស្រាយ។ អ្នកជំនាញបានរៀបរាប់ថា មុខវិជ្ជាទាំងនេះអាចបង្កើតនិងពង្រឹងទំនាក់ទំនងរវាងកោសិកាខួរក្បាល(ដែលគេហៅថាណឺរ៉ូន)។ ដូច្នេះ កិច្ចការសាលាដែលគ្រូដាក់ឲ្យ គឺប្រៀបដូចជាលំហាត់ប្រាណខួរក្បាលរបស់ប្អូន។
បើនិយាយឲ្យចំទៅ កិច្ចការសាលាគឺមានប្រយោជន៍សម្រាប់ប្អូន។ ទោះជាប្អូនមិនឃើញប្រយោជន៍ពីនោះក្ដី ប្អូននៅតែត្រូវធ្វើ គេចមិនរួចឡើយ ព្រោះវាជាផ្នែកមួយនៃជីវិតរបស់ប្អូន។ ថ្វីត្បិតតែប្អូនមិនអាចកំណត់បរិមាណកិច្ចការសាលាដែលគ្រូដាក់ឲ្យក៏ពិតមែន តែប្អូនអាចបង្ហើយកិច្ចការនោះលឿនជាង។ សូមស្វែងយល់អំពីរបៀបធ្វើដូច្នោះ។
យោបល់សម្រាប់សិក្សា
បើប្អូនពិបាកបង្ហើយកិច្ចការសាលា សូមកុំបារម្ភ។ តាមពិត មានដំណោះស្រាយមួយ គឺសម្រេចកិច្ចការច្រើន ដោយប្រើពេលវេលាតិច។ សូមសាកធ្វើតាមយោបល់ដូចខាងក្រោម៖
យោបល់ទី១៖ រៀបចំទុកជាមុន។ គម្ពីរចែងថា៖«គម្រោងរបស់មនុស្សឧស្សាហ៍នឹងបានជោគជ័យជាមិនខាន»។ (សុភាសិត ២១:៥) សូមត្រៀមសៀវភៅនិងជំនួយសិក្សាទាំងអស់ទុកនៅក្បែរដៃ ដើម្បីប្អូនអាចធ្វើកិច្ចការសាលាដោយមិនចាំបាច់ក្រោកទៅយក។
បន្ថែមទៅទៀត សូមរកកន្លែងរៀនមួយដែលប្អូនស្រួលផ្ចង់អារម្មណ៍។ ប្អូនៗខ្លះចូលចិត្តរៀនក្នុងបន្ទប់ស្ងាត់នៅក្នុងផ្ទះ។ ប្អូនៗខ្លះទៀត មិនធ្វើកិច្ចការសាលានៅក្នុងផ្ទះទេ តែនៅកន្លែងផ្សេងវិញ ដូចជានៅបណ្ណាល័យជាដើម។
ប្អូនរីឆឺដបានរៀបរាប់ថា៖«ការមានកាលវិភាគច្បាស់លាស់ ជួយយើងប្រើពេលវេលាដោយឈ្លាសវៃ។ ពេលយើងធ្វើកិច្ចការសាលាម្ដងមួយៗតាមពេលវេលាដែលគ្រូកំណត់ នោះយើងមិនសូវតានតឹងចិត្តទេ»។
យោបល់ទី២៖ បែងចែកកិច្ចការសាលារបស់ប្អូន។ គម្ពីរចែងថា៖«ចូរឲ្យអ្វីៗទាំងអស់ធ្វើឡើង . . . ដោយរបៀបរៀបរយ»។ (កូរិនថូសទី១ ១៤:៤០) ដោយគិតពីគោលការណ៍នេះ សូមបែងចែកថាកិច្ចការសាលាមួយណាដែលប្អូនត្រូវធ្វើមុន កិច្ចការណាដែលប្អូនត្រូវធ្វើក្រោយ។
ប្អូនៗខ្លះធ្វើកិច្ចការណាដែលពិបាកជាងគេមុន។ ប្អូនៗខ្លះទៀតចូលចិត្តធ្វើកិច្ចការណាដែលស្រួលជាងគេមុន។ ដូច្នេះ ប្អូនអាចជ្រើសយកវិធីណាដែលស្រួលសម្រាប់ប្អូន។
ប្អូនហាយឌីបានរៀបរាប់ថា៖«ពេលខ្ញុំរៀបចំបញ្ជីកិច្ចការសាលា នោះជួយខ្ញុំស្រួលដឹងថាកិច្ចការណាខ្ញុំត្រូវធ្វើមុន កិច្ចការណាខ្ញុំត្រូវធ្វើបន្តបន្ទាប់ និងកិច្ចការណាខ្ញុំត្រូវធ្វើចុងក្រោយ។ ពេលខ្ញុំធ្វើដូច្នេះ វាជួយកុំឲ្យកិច្ចការសាលាចេះតែគរឡើងៗ ហើយជួយខ្ញុំមិនឲ្យតានតឹងចិត្តដែរ»។
យោបល់ទី៣៖ ចាប់ផ្ដើមធ្វើ។ គម្ពីរចែងថា៖«ចូរមានចិត្តឧស្សាហ៍ក្នុងកិច្ចការរបស់អ្នក កុំខ្ជិលឡើយ»។ (រ៉ូម ១២:១១) ប្អូនប្រហែលជាចង់ធ្វើអ្វីផ្សេង តែកុំឲ្យអ្វីនោះឆក់យកពេលវេលាដែលប្អូនត្រូវប្រើដើម្បីធ្វើកិច្ចការសាលារបស់ប្អូនឡើយ។
ពេលយើងបង្អែបង្អង់ យើងទំនងជាធ្វើកិច្ចការសាលាមិនទាន់ពេលឬធ្វើយ៉ាងតក់ក្រហល់។ ជាលទ្ធផល កិច្ចការដែលយើងធ្វើមិនសូវល្អទេ។ ដូច្នេះ ដើម្បីកុំឲ្យតានតឹងចិត្ត ប្អូនអាចចាប់ផ្ដើមធ្វើកិច្ចការសាលា ឲ្យបានលឿនបំផុតតាមដែលអាចធ្វើទៅបាន។
ប្អូនសឺរីណាបានរៀបរាប់ថា៖«ពេលខ្ញុំធ្វើកិច្ចការសាលាភ្លាមៗក្រោយពីគ្រូដាក់ឲ្យ ខ្ញុំមិនដេកគិតអំពីនោះរហូតទេ ហើយវាក៏មិនរំខានខ្ញុំពីកិច្ចការផ្សេងទៀតដែរ»។
យោបល់៖ សូមធ្វើកិច្ចការសាលានៅម៉ោងដដែលជារៀងរាល់ថ្ងៃ។ ការធ្វើដូច្នោះ នឹងជួយប្អូនឲ្យចេះលត់ដំខ្លួន ហើយមានទម្លាប់ធ្វើជាទៀងទាត់។
យោបល់ទី៤៖ ព្យាយាមផ្ចង់អារម្មណ៍។ គម្ពីរចែងថា៖«ចូរ . . . សម្លឹងមើលអ្វីដែលនៅខាងមុខកូន»។ (សុភាសិត ៤:២៥) ដើម្បីធ្វើតាមយោបល់នេះ សូមកុំឲ្យអ្វីមករំខានប្អូន ជាពិសេសគ្រឿងអេឡិចត្រូនិក។
ការអូសមើលអ៊ីនធឺណិតនិងផ្ញើសារ អាចពន្យារពេលវេលារបស់ប្អូនក្នុងការបង្ហើយកិច្ចការសាលា។ ប៉ុន្តែ បើអារម្មណ៍ប្អូនមូល ប្អូននឹងស្រួលផ្ចង់អារម្មណ៍ធ្វើកិច្ចការនោះ ហើយប្អូនក៏មិនសូវតានតឹងចិត្ត ថែមទាំងនៅសល់ពេលទៀតផង។
ប្អូនជោអែលបានរៀបរាប់ថា៖«ទូរសព្ទ កុំព្យូទ័រ ហ្គេមវីដេអូ និងទូរទស្សន៍ ធ្វើឲ្យយើងពិបាកផ្ចង់អារម្មណ៍។ ពេលខ្ញុំបិទទូរសព្ទនិងគ្រឿងអេឡិចត្រូនិកផ្សេងទៀតដែលនៅក្បែរខ្ញុំ នោះជួយខ្ញុំស្រួលផ្ចង់អារម្មណ៍ជាង»។
យោបល់ទី៥៖ សមហេតុផល។ គម្ពីរចែងថា៖«ចូរឲ្យមនុស្សទាំងអស់ឃើញថាអ្នករាល់គ្នាជាមនុស្សសមហេតុសមផល»។ (ភីលីព ៤:៥) ពេលប្អូនធ្វើកិច្ចការសាលា បើប្អូនត្រូវសម្រាក សូមសម្រាកបន្តិចដើម្បីកាត់បន្ថយការតានតឹងចិត្ត។ សូមដើរហាត់ប្រាណ ជិះកង់ ឬរត់បន្តិចក៏បាន។
បើប្អូនធ្វើដូច្នោះហើយ តែនៅតែមានអារម្មណ៍តានតឹងចិត្តនឹងកិច្ចការសាលាដែលប្អូនទទួល សូមប្រាប់គ្រូបង្រៀនរបស់ប្អូន។ បើពួកគាត់ឃើញថាប្អូនពិតជាខំព្យាយាមអស់ពីសមត្ថភាពរបស់ប្អូនមែន ពួកគាត់ប្រហែលជាកាត់បន្ថយកិច្ចការសាលាខ្លះរបស់ប្អូន។
ប្អូនជូលាបានរៀបរាប់ថា៖«សូមកុំឲ្យកិច្ចការសាលាទៅជាសម្ពាធឡើយ។ អ្វីដែលអាចធ្វើបានគឺខំអស់ពីសមត្ថភាព។ យើងមិនចង់ឲ្យកិច្ចការនោះបង្ខូចសុខភាពរបស់យើងឡើយ»។
សូមសួរខ្លួនឯងនូវសំណួរដូចតទៅ៖
តើមានព័ត៌មានអ្វីខ្លះដែលខ្ញុំត្រូវការសម្រាប់កិច្ចការសាលារបស់ខ្ញុំ?
តើពេលណាជាពេលល្អដែលខ្ញុំធ្វើកិច្ចការសាលា?
តើកន្លែងណាល្អជាងគេឲ្យខ្ញុំស្រួលផ្ចង់អារម្មណ៍?
តើខ្ញុំអាចធ្វើយ៉ាងណាដើម្បីកុំឲ្យបង្អែបង្អង់?
តើមានអ្វីរំខានខ្លះដែលពន្យារពេលខ្ញុំធ្វើកិច្ចការសាលា?
តើខ្ញុំអាចធ្វើយ៉ាងណាដើម្បីកុំឲ្យគ្រឿងអេឡិចត្រូនិកឬអ្វីផ្សេងទៀតមកបង្វែរអារម្មណ៍ខ្ញុំ?
តើខ្ញុំអាចធ្វើយ៉ាងណាដើម្បីមានតុល្យភាពពេលមានកិច្ចការសាលា?
សូមចាំថា៖ សូមប្រាកដថាប្អូនយល់ច្បាស់អំពីកិច្ចការសាលាដែលប្អូនត្រូវធ្វើ។ បើប្អូនមានសំណួរ សូមសួរគ្រូមុននឹងប្អូនចេញពីថ្នាក់រៀន។
a ចំណុចទាំងនេះបានត្រូវដកស្រង់ពីសៀវភៅSchool Power រៀបរៀងដោយជីន ស្កឹម។
លោកអ្នកក៏ប្រហែលជាចូលចិត្តដែរ
ទស្សនៈពីមនុស្សស្រករប្អូន
ទស្សនៈពីយុវវ័យអំពីការបង្អែបង្អង់
សូមស្ដាប់ នូវអ្វីដែលយុវវ័យប្រាប់អំពីគ្រោះថ្នាក់ដែលមកពីការបង្អែបង្អង់និងប្រយោជន៍ដែលមកពីការប្រើពេលវេលាដោយឈ្លាសវៃ។
សំណួរពីយុវវ័យ
តើតាមរបៀបណាខ្ញុំអាចប្រើពេលវេលាដោយឈ្លាសវៃ?
មានយោបល់ប្រាំយ៉ាងដែលអាចជួយប្អូនកុំឲ្យខ្ជះខ្ជាយពេលវេលាដ៏មានតម្លៃរបស់ប្អូន។
សំណួរពីយុវវ័យ
តើខ្ញុំគួរធ្វើយ៉ាងណាដើម្បីអាចផ្ចង់អារម្មណ៍បានល្អ?
សូមពិចារណាទិដ្ឋភាពបីយ៉ាងដែលគ្រឿងអេឡិចត្រូនិកប្រហែលជារារាំងការផ្ចង់អារម្មណ៍របស់ប្អូន។ ហើយមើលថាតើអ្វីអាចជួយប្អូនឲ្យចេះផ្ចង់អារម្មណ៍។
សំណួរពីយុវវ័យ
តើខ្ញុំគួរដឹងអ្វីខ្លះអំពីការធ្វើកិច្ចការផ្សេងៗក្នុងពេលតែមួយ?
តើប្អូនពិតជាអាចធ្វើកិច្ចការផ្សេងៗក្នុងពេលតែមួយ ដោយមិនពិបាកផ្ចង់អារម្មណ៍ទេ?
