សំណួរពីយុវវ័យ
តើខ្ញុំអាចធ្វើយ៉ាងណាដើម្បីចុះសម្រុងជាមួយគ្រូ?
គ្រូកាច
មិនយូរមិនឆាប់ សិស្សស្ទើរតែទាំងអស់នឹងរៀនប៉ះគ្រូដែលមើលទៅដូចជាលម្អៀង តឹងរ៉ឹង ឬកាច។
ប្អូនលូអ៊ីសដែលមានអាយុ២១ឆ្នាំ បានរៀបរាប់ថា៖«ខ្ញុំធ្លាប់រៀនជាមួយគ្រូម្នាក់ដែលប្រើពាក្យអសុរោះ និងមើលងាយសិស្ស។ ដោយសារបន្តិចទៀតគាត់នឹងចូលនិវត្តន៍ អ៊ីចឹងហើយគាត់ប្រហែលជាគិតថាគេនឹងមិនបញ្ឈប់ការងារគាត់ទេ»។
ប្អូនមេឡានីដែលមានអាយុ២៥ឆ្នាំ នឹកចាំពេលនៅរៀន គ្រូម្នាក់បានប្រព្រឹត្តដោយរើសអើងមកលើនាង។ នាងបានប្រាប់ថា«គ្រូខ្ញុំធ្លាប់និយាយថា គាត់ប្រព្រឹត្តបែបនោះ មកពីខ្ញុំមានសាសនាផ្សេង។ គាត់ថែមទាំងនិយាយថាប្អូនឯងទ្រាំៗទៅ តិចទៀតនឹងស៊ាំហើយ»។
បើប្អូនរៀនប៉ះគ្រូកាច សូមកុំរាថយបោះបង់ការរៀនសូត្រឡើយ។ សូមសាកធ្វើតាមយោបល់ដូចខាងក្រោម។
យោបល់ដែលអាចជួយប្អូន
ចេះបត់បែន។ គ្រូម្នាក់ៗរំពឹងខុសគ្នាពីសិស្ស។ សូមគិតអំពីអ្វីដែលគ្រូចង់ឲ្យប្អូនធ្វើ ហើយព្យាយាមធ្វើតាមគាត់។
គោលការណ៍គម្ពីរ៖ «មនុស្សដែលមានប្រាជ្ញានឹងយកចិត្តទុកដាក់ស្ដាប់ ដើម្បីរៀនថែមទៀត»។—សុភាសិត ១:៥
ប្អូនគ្រិស្តតូហ្វើបានរៀបរាប់ថា៖«ខ្ញុំឃើញថាខ្ញុំត្រូវសម្របទៅតាមគ្រូរបស់ខ្ញុំ ដូច្នេះខ្ញុំព្យាយាមធ្វើតាមតម្រូវការរបស់គាត់។ ពេលខ្ញុំធ្វើដូច្នោះ ជួយខ្ញុំឲ្យស្រួលចុះសម្រុងជាមួយគាត់ជាង»។
ប្រព្រឹត្តដោយគោរព។ សូមព្យាយាមនិយាយជាមួយគ្រូដោយគោរព។ សូមកុំនិយាយជាន់កែងគាត់ ទោះជាប្អូនគិតថាគាត់សមនឹងទទួលក៏ដោយ។ សូមចាំថាគាត់ជាគ្រូរបស់ប្អូន មិនមែនជាមិត្តរបស់ប្អូនទេ។
គោលការណ៍គម្ពីរ៖ «ចូរឲ្យសម្ដីរបស់អ្នករាល់គ្នាប្រកបដោយភាពសប្បុរសជានិច្ច ដែលប្រៀបដូចជាបានត្រូវបង់អំបិល។ ធ្វើដូច្នេះ អ្នកនឹងដឹងថាគួរតបឆ្លើយយ៉ាងណាចំពោះមនុស្សម្នាក់ៗ»។—កូឡុស ៤:៦
ប្អូនសៀរ៉ាបានរៀបរាប់ថា៖«មិនមែនគ្រូទាំងអស់ សុទ្ធតែទទួលបានការគោរពពីសិស្សទេ ដូច្នេះសូមបង្ហាញការគោរពចំពោះគាត់។ ពេលយើងគោរពគាត់ គាត់នឹងប្រព្រឹត្តល្អមកលើយើងវិញ»។
ព្យាយាមយល់ពីគាត់។ គ្រូក៏មានសម្ពាធនិងតានតឹងចិត្តដូចមនុស្សទូទៅដែរ។ ដូច្នេះ កុំឆាប់សន្និដ្ឋានថា៖‹គ្រូខ្ញុំកាចណាស់› ឬ‹គ្រូស្អប់ខ្ញុំ›។
គោលការណ៍គម្ពីរ៖ «យើងទាំងអស់គ្នាធ្វើខុសជាញឹកញយ»។—យ៉ាកុប ៣:២, កំណត់សម្គាល់
ប្អូនអាឡិចសឺសបានរៀបរាប់ថា៖«ការងារជាគ្រូពិបាកណាស់។ ខ្ញុំគិតថាគឺមិនស្រួលទេដែលត្រូវមើលខុសត្រូវនិងអប់រំសិស្សទាំងអស់។ អ៊ីចឹងហើយខ្ញុំមិនចង់ធ្វើឲ្យគាត់កាន់តែពិបាកទេ»។
និយាយជាមួយឪពុកម្ដាយ។ ព្រោះពួកគាត់តែងតែចង់ជួយប្អូន។ ពួកគាត់ចង់ឲ្យប្អូនសប្បាយនឹងការរៀននៅសាលា ហើយពួកគាត់អាចឲ្យយោបល់ដែលជួយប្អូនចេះប្រឈមនឹងគ្រូដែលពិបាក។
គោលការណ៍គម្ពីរ៖ «បើគ្មានការប្រឹក្សាទេ នោះគម្រោងនឹងបរាជ័យ»។—សុភាសិត ១៥:២២
ប្អូនអូលីវាបានរៀបរាប់ថា៖«ប៉ាម៉ាក់មានបទពិសោធន៍ច្រើនជាងក្នុងការដោះស្រាយបញ្ហាផ្សេងៗ។ ដូច្នេះ សូមស្ដាប់យោបល់គាត់។ ព្រោះយោបល់ទាំងនោះអាចជួយយើងបាន»។
របៀបនិយាយជាមួយគ្រូ
ក្នុងករណីខ្លះ ប្អូនប្រហែលជាត្រូវប្រាប់គ្រូអំពីសម្ពាធដែលប្អូនបានទទួលពីគាត់។ សូមចាំថាការនិយាយនោះ មិនមែនជាការឈ្លោះជាមួយគាត់ទេ តែជាការពិភាក្សាជាមួយគាត់វិញ។ ដូច្នេះកុំខ្លាចអី ព្រោះការធ្វើដូច្នោះមិនពិបាកដូចប្អូនស្មានទេ ហើយវាថែមទាំងមានប្រសិទ្ធភាពទៀតផង។
គោលការណ៍គម្ពីរ៖ «ខំព្យាយាមធ្វើអ្វីដែលនាំឲ្យមានសន្តិភាព»។—រ៉ូម ១៤:១៩
ប្អូនជូលីអាណាបានរៀបរាប់ថា៖«បើយើងឃើញថាគ្រូដូចជាកាចដាក់តែយើងម្នាក់ សូមសួរគាត់ថាតើយើងបានធ្វើអ្វីមួយដែលនាំឲ្យគាត់ខឹងឬ។ ក្រោយដឹងចម្លើយ យើងអាចដឹងថាយើងគួរកែប្រែចំណុចណា»។
ប្អូនបេនយ៉ាមីនបានរៀបរាប់ថា៖«វិធីល្អបំផុតគឺប្រាប់គ្រូពេលមានតែពីរនាក់គាត់ ឬបើមិនអ៊ីចឹងទេ យើងអាចប្រាប់គាត់ក្រោយម៉ោងរៀនក៏បាន។ តែសូមនិយាយដោយស្លូតបូតទៅកាន់គាត់ ហើយប្រាប់គាត់ថាយើងមានអារម្មណ៍យ៉ាងណា។ សង្ឃឹមថាគ្រូនឹងគិតថ្លឹងថ្លែង ហើយឲ្យតម្លៃយើងជាង»។
បទពិសោធន៍ពិត
ប្អូនម៉ារៀបានរៀបរាប់ថា៖«ខ្ញុំរៀនខ្សោយទៅៗ ហើយគ្រូខ្ញុំមិនបានជួយខ្ញុំទាល់តែសោះ។ ដោយសារគាត់តឹងរ៉ឹងដាក់ខ្ញុំពេក ខ្ញុំចង់តែឈប់រៀនទេ។
«ខ្ញុំបានសុំយោបល់ពីគ្រូម្នាក់ទៀត។ តែគាត់ប្រាប់ថា៖‹ប្អូនត្រូវប្រាប់បញ្ហានោះដល់គ្រូប្អូន ព្រោះប្អូននិងគាត់ប្រហែលជាមិនសូវយល់ពីគ្នាច្បាស់ទេ។ ក្រោយប្អូននិយាយជាមួយគាត់រួច ប្អូនប្រហែលជាស្រួលជួយសិស្សឯទៀតដែលមានបញ្ហាដូចប្អូនឲ្យនិយាយជាមួយគាត់ដែរ›។
«នេះជាអ្វីដែលខ្ញុំពិបាកធ្វើជាងគេ! តែពេលគិតពីសម្ដីគាត់ ខ្ញុំគិតថាគាត់និយាយត្រូវ។ បើខ្ញុំចង់ឲ្យស្ថានភាពកែប្រែ ខ្ញុំត្រូវតែទៅនិយាយប្រាប់គ្រូខ្ញុំ។
«ដូច្នេះ ស្អែកឡើងខ្ញុំបានទៅជួបគ្រូខ្ញុំ ហើយបាននិយាយដោយគោរពប្រាប់គាត់ថាខ្ញុំចូលចិត្តរៀនមុខវិជ្ជាគាត់ ហើយចង់ចេះមុខវិជ្ជានោះ។ តែខ្ញុំមិនសូវយល់ទេ ហើយខ្ញុំក៏មិនដឹងថាត្រូវធ្វើយ៉ាងណាដែរ។ ឮដូច្នោះ គាត់បានឲ្យយោបល់ខ្ញុំ ហើយថែមទាំងស្នើជួយបង្រៀនខ្ញុំក្រៅម៉ោងរៀនឬតាមអ៊ីម៉ែលទៀតផង។
«ខ្ញុំភ្ញាក់ផ្អើលណាស់ចំពោះសំណើរបស់គាត់។ ខ្ញុំឃើញថាក្រោយពីខ្ញុំបាននិយាយជាមួយគាត់ ទំនាក់ទំនងខ្ញុំជាមួយគាត់ល្អជាង ហើយខ្ញុំសប្បាយរៀនជាងដែរ»។
យោបល់៖ បើប្អូនពិបាកនិយាយជាមួយគ្រូ សូមកុំរាថយ តែចាត់ទុកនោះជាការលត់ដំមួយដើម្បីជួយប្អូននៅថ្ងៃអនាគត។ ប្អូនខេធីដែលមានអាយុ២២ឆ្នាំ បានរៀបរាប់ថា៖«ទោះជារៀនចប់ក៏ដោយ យើងទំនងជានឹងជួបមន្ត្រីរាជការដែលមិនតែងតែប្រព្រឹត្តដោយសប្បុរសទេ។ ប៉ុន្តែ បើឥឡូវយើងអាចចុះសម្រុងនឹងគ្រូកាចបាន នោះនៅថ្ងៃអនាគតយើងក៏អាចចុះសម្រុងជាមួយនឹងនរណាក៏បានដែរ»។
លោកអ្នកក៏ប្រហែលជាចូលចិត្តដែរ
សំណួរពីយុវវ័យ
ចុះបើខ្ញុំមិនចូលចិត្តទៅសាលា?
ចុះបើខ្ញុំមិនចូលចិត្តទៅសាលា? មិនមែនមានតែប្អូនទេដែលមានអារម្មណ៍ដូចនេះ។ សូមស្វែងយល់អំពីអ្វីដែលអាចជួយប្អូនឲ្យមានទស្សនៈត្រឹមត្រូវចំពោះការអប់រំនៅសាលា។
សំណួរពីយុវវ័យ
តើខ្ញុំគួរឈប់រៀនពាក់កណ្ដាលទីទេ?
ចម្លើយនៃសំណួរនេះប្រហែលជាធ្វើឲ្យប្អូនភ្ញាក់ផ្អើល។
សំណួរពីយុវវ័យ
ចុះបើខ្ញុំរៀនខ្សោយ?
មុនសម្រេចចិត្តឈប់រៀន សូមពិចារណាជំហាន៦យ៉ាងដែលអាចជួយប្អូនឲ្យបានចំណាត់ថ្នាក់ខ្ពស់ជាង។
សំណួរពីយុវវ័យ
តើតាមរបៀបណាខ្ញុំអាចបង្ហើយកិច្ចការសាលា?
បើប្អូនពិបាកបង្ហើយកិច្ចការសាលា ប្អូនអាចរកដំណោះស្រាយបាន។ សូមចាំថាប្អូនអាចសម្រេចកិច្ចការច្រើនបាន ដោយប្រើពេលវេលាតិច។
