សំណួរពីយុវវ័យ
តើខ្ញុំគួរធ្វើយ៉ាងណាដើម្បីចង់ហាត់ប្រាណច្រើនជាង?
ហេតុអ្វីខ្ញុំគួរហាត់ប្រាណ?
នៅប្រទេសខ្លះ ប្អូនៗយុវវ័យមិនសូវមានចលនាខាងរាងកាយទេ នេះនាំឲ្យពួកគេប្រឈមនឹងបញ្ហាសុខភាព។ ហេតុនេះហើយ គម្ពីរប្រាប់ថា«ហ្វឹកហាត់ខ្លួនប្រាណមានប្រយោជន៍»។ (ធីម៉ូថេទី១ ៤:៨) សូមពិចារណាចំណុចដូចខាងក្រោម៖
ការហាត់ប្រាណជួយប្អូនឲ្យមានអារម្មណ៍ស្រស់ស្រាយ។ ពេលយើងធ្វើចលនាខាងរាងកាយ ខួរក្បាលយើងបញ្ចេញគីមីម្យ៉ាងហៅថាអង់ដូហ្វីន ដែលជួយយើងឲ្យមានអារម្មណ៍ធូរស្រាលនិងស្រស់ស្រាយ។ ហេតុនេះហើយបានជាអ្នកខ្លះនិយាយថាការហាត់ប្រាណជាថ្នាំធម្មជាតិដែលបំបាត់ការតានតឹងចិត្ត។
ប្អូនរីជីណាបានរៀបរាប់ថា៖«បើខ្ញុំរត់ហាត់ប្រាណនៅពេលព្រឹក ពេញមួយថ្ងៃនោះខ្ញុំអាចបំពេញកិច្ចការបានល្អជាងនិងមានអារម្មណ៍សប្បាយជាង»។
ការហាត់ប្រាណធ្វើឲ្យប្អូនមានរាងកាយស្អាតនិងសង្ហារ។ ការហាត់ប្រាណដោយមានតុល្យភាព ធ្វើឲ្យរាងកាយមាំមួន និងរូបរាងសមសួន ហើយដោយសារនោះទំនងជានឹងជួយប្អូនឲ្យមានទំនុកចិត្តមកលើខ្លួនច្រើនជាងដែរ។
ប្អូនអូលីវាបានរៀបរាប់ថា៖«កាលពីឆ្នាំមុន ខ្ញុំមិនអាចហាត់ប្រាណលើកខ្លួនឡើងលើបានទេ តែឥឡូវខ្ញុំសប្បាយចិត្តណាស់ ព្រោះរាល់លើក ពេលខ្ញុំហាត់ប្រាណខ្ញុំអាចលើកខ្លួនឡើងលើអស់១០ដង។ ហើយអ្វីដែលសំខាន់ ខ្ញុំដឹងថាខ្ញុំកំពុងថែរក្សារាងកាយរបស់ខ្ញុំ»។
ការហាត់ប្រាណជួយឲ្យអាយុវែង។ ការធ្វើចលនាលំហាត់ប្រាណជួយដល់សុខភាពបេះដូងនិងប្រព័ន្ធសួត។ ម្យ៉ាងទៀត ការហាត់ប្រាណដោយធ្វើចលនាញាប់និងខ្លាំងៗ អាចជួយបង្ការកុំឲ្យមានជំងឺបេះដូង ជាជំងឺម្យ៉ាងដែលអាចសម្លាប់មនុស្សទាំងប្រុសទាំងស្រី។
ប្អូនជេស៊ីកាបានរៀបរាប់ថា៖«ពេលយើងមានទម្លាប់ហាត់ប្រាណជាទៀងទាត់ យើងបង្ហាញថាយើងឲ្យតម្លៃចំពោះរូបកាយដែលព្រះបានបង្កើត»។
សរុបសេចក្ដី៖ ការហាត់ប្រាណផ្ដល់ប្រយោជន៍ជាច្រើន មិនថានៅឥឡូវនេះនិងអនាគត។ ប្អូនថានយ៉ាបានរៀបរាប់ថា៖«យើងមិនដែលនិយាយថាស្ដាយណាស់ដែលខ្ញុំរត់ហាត់ប្រាណឬដើរឡើងភ្នំទេ។ ព្រោះពេលដែលខ្ញុំជម្នះចិត្តដើម្បីហាត់ប្រាណ ខ្ញុំមិនដែលស្ដាយក្រោយឡើយ»។
ឡានមួយដែលគ្មានការមើលថែ ទីបំផុតនឹងលែងដំណើរការទៀត។ ឯរូបកាយយើងវិញ ត្រូវការថែទាំឲ្យបានល្អ ដោយការហាត់ប្រាណជាទៀងទាត់
តើអ្វីធ្វើឲ្យខ្ញុំមិនចង់ហាត់ប្រាណ?
មានឧបសគ្គមួយចំនួនដូចខាងក្រោម៖
គិតថាមិនចាំបាច់។ ប្អូនសូហ្វៀបានរៀបរាប់ថា៖«យុវវ័យច្រើនតែគិតថាខ្លួនរឹងមាំគ្មានបញ្ហាសុខភាពអីទេ ហើយគិតថាអ្នកដែលមានបញ្ហាសុខភាពមានតែមនុស្សចាស់ប៉ុណ្ណោះ»។
គ្មានពេល។ ប្អូនក្លារីសាបានរៀបរាប់ថា៖«ដោយសារជីវិតប្រចាំថ្ងៃ តែងតែរវល់ អ៊ីចឹងហើយ ខ្ញុំត្រូវធ្វើយ៉ាងណាដើម្បីមានពេលញ៉ាំនិងគេង។ តែសម្រាប់ការហាត់ប្រាណវិញ ខ្ញុំពិបាករកពេលណាស់»។
គ្មានកាតសមាជិកនៅកន្លែងហាត់ប្រាណ។ ប្អូនជីណាបានរៀបរាប់ថា៖«ដើម្បីទៅក្លឹបហាត់ប្រាណគឺត្រូវចំណាយលុយ។ ដូច្នេះដើម្បីបានរាងស្អាតគឺអស់លុយច្រើនណាស់»។
សូមពិចារណា៖
តើអ្វីជាឧបសគ្គធំជាងគេដែលរារាំងប្អូនពីការហាត់ប្រាណ? ដើម្បីយកឈ្នះឧបសគ្គនោះគឺត្រូវការខំព្យាយាម តែការខំធ្វើដូច្នោះមិនបង់ប្រយោជន៍ទេ។
តើខ្ញុំអាចធ្វើយ៉ាងណាដើម្បីមានទម្លាប់ហាត់ប្រាណទៀងទាត់?
សូមមើលយោបល់ដូចខាងក្រោម៖
ប្អូនមានភារកិច្ចថែរក្សាសុខភាពរបស់ខ្លួន។—កាឡាទី ៦:៥
កុំរកលេស។ (អ្នកទូន្មាន ១១:៤) ជាឧទាហរណ៍ ប្អូនមិនចាំបាច់ត្រូវចុះឈ្មោះក្នុងក្លឹបហាត់ប្រាណណាមួយឡើយ។ គ្រាន់តែស្វែងរកលំហាត់ប្រាណណាដែលប្អូនចូលចិត្ត ហើយធ្វើជាទៀងទាត់។
សុំយោបល់ពីអ្នកឯទៀតអំពីរបៀបដែលគាត់ហាត់ប្រាណ។—សុភាសិត ២០:១៨
មានកាលវិភាគហាត់ប្រាណច្បាស់លាស់។ សូមកំណត់គោលដៅ និងកត់ទុកលទ្ធផលដែលប្អូនបានសម្រេចរួចហើយ ដើម្បីជំរុញចិត្តប្អូនឲ្យចង់ហាត់ប្រាណថែមទៀត។—សុភាសិត ២១:៥
រកអ្នកណាម្នាក់ហាត់ប្រាណជាមួយប្អូន។ បើប្អូនមានមិត្តភក្តិម្នាក់ហាត់ប្រាណជាទៀងទាត់ជាមួយប្អូន គាត់អាចលើកទឹកចិត្តប្អូននិងជួយប្អូនឲ្យរក្សាទម្លាប់នោះ។—អ្នកទូន្មាន ៤:៩, ១០
ពេលជួបការពិបាកឬមិនអាចធ្វើតាមកាលវិភាគហាត់ប្រាណ សូមកុំឈប់ព្យាយាមឡើយ។—សុភាសិត ២៤:១០
មានតុល្យភាព
គម្ពីរបានប្រាប់ទាំងបុរសទាំងស្រីឲ្យ«ប្រព្រឹត្តដោយមានតុល្យភាព»។ (ធីម៉ូថេទី១ ៣:២, ១១) ដូច្នេះ សូមមានតុល្យភាពក្នុងការហាត់ប្រាណ។ អ្នកដែលហាត់ប្រាណខ្លាំងហួសហេតុពេក មិនមែនផ្ដល់ប្រយោជន៍ដល់រាងកាយទេ តែបង់ប្រយោជន៍វិញ។ ប្អូនជូលាបានរៀបរាប់ថា៖«បើបុរសម្នាក់មានតែសាច់ដុំ តែមិនសូវមានភាពឈ្លាសវៃ នោះគាត់គ្មានភាពទាក់ទាញឡើយ»។
សូមប្រយ័ត្នកុំធ្វើតាមយោបល់ដែលបង្ខំប្អូនឲ្យហាត់ប្រាណហួសពីកម្រិតរបស់ប្អូនឡើយ។ យោបល់ទាំងនេះមិនត្រឹមតែធ្វើឲ្យឈឺចាប់ខាងរាងកាយទេ តែធ្វើឲ្យប្អូនលែងផ្ដោតអារម្មណ៍ទៅលើ«អ្វីដែលសំខាន់ជាង»ក្នុងជីវិត។—ភីលីព ១:១០
បន្ថែមទៅទៀត អ្វីដែលជំរុញចិត្តប្អូនឲ្យហាត់ប្រាណក៏អាចធ្វើឲ្យប្អូនខកចិត្តដែរ។ ប្អូនវីរ៉ាបានសង្កេតឃើញថា៖«ក្មេងស្រីជាច្រើនបិទរូបតារាដែលពួកគេចិត្ត និងចង់មានរូបរាងដូចតារានោះ។ ហើយពេលគេមើលរូបតារានោះជំរុញចិត្តពួកគេឲ្យហាត់ប្រាណ។ តែពេលគេមើលរូបរាងខ្លួនមិនដូចតារានោះ ពួកគេបែរជាធ្លាក់ទឹកចិត្តទៅវិញ។ ដូច្នេះជាការល្អដែលយើងមានគោលដៅហាត់ប្រាណដើម្បីមានសុខភាពល្អ មិនមែនគ្រាន់តែគិតពីរូបរាងប៉ុណ្ណោះទេ»។
លោកអ្នកក៏ប្រហែលជាចូលចិត្តដែរ
សំណួរពីយុវវ័យ
តើខ្ញុំត្រូវធ្វើយ៉ាងណាដើម្បីសម្រកទម្ងន់?
បើប្អូនត្រូវសម្រកទម្ងន់ សូមកុំបង្អត់អាហារខ្លួនឯង តែគួរមានរបបអាហារត្រឹមត្រូវនិងលំហាត់ប្រាណទៀងទាត់។
សំណួរពីយុវវ័យ
តើខ្ញុំខ្វល់ហួសហេតុអំពីសម្បកក្រៅរបស់ខ្លួនឬ?
បើប្អូនបារម្ភអំពីរូបរាងរបស់ប្អូន តើតាមរបៀបណាប្អូនអាចមានទស្សនៈត្រឹមត្រូវចំពោះខ្លួនឯង?
សំណួរពីយុវវ័យ
តើខ្ញុំគួរដឹងអ្វីខ្លះអំពីកីឡា?
សូមពិនិត្យមើលថាប្អូនលេងកីឡាអ្វីខ្លះ ប្អូនលេងវាបែបណា និងលេងច្រើនប៉ុនណា។
