សំណួរពីយុវវ័យ
តើខ្ញុំអាចធ្វើយ៉ាងណាដើម្បីចុះសម្រុងជាមួយនឹងឪពុកម្ដាយ?
សំណួរចម្លើយអំពីការមិនចុះសម្រុងគ្នា
រវាងឪពុកនិងម្ដាយ តើប្អូនច្រើនតែមិនចុះសម្រុងជាមួយអ្នកណា?
ឪពុក
ម្ដាយ
តើប្អូនឧស្សាហ៍ទាស់ជាមួយគាត់ប៉ុនណា?
កម្រ
យូរៗម្ដង
ញឹកញាប់
តើទំនាស់នោះប្រហែលជាខ្លាំងដល់កម្រិតណា?
ទំនាស់នោះបានត្រូវដោះស្រាយភ្លាមៗ និងដោយសន្តិវិធី។
ទំនាស់នោះបានត្រូវដោះស្រាយ ក្រោយពីតឹងសរសៃកដាក់គ្នា។
ទំនាស់នោះមិនបានត្រូវដោះស្រាយទេ ទោះជាបានប្រកែកគ្នាហើយក្ដី។
បើប្អូនពិបាកចុះសម្រុងជាមួយនឹងឪពុកម្ដាយ ប្អូនប្រហែលជាគិតថាឪពុកម្ដាយគួរធ្វើអ្វីមួយដើម្បីឲ្យស្ថានភាពល្អប្រសើរជាង។ ប៉ុន្តែ មានជំហានខ្លះដែលប្អូនអាចធ្វើ ដើម្បីកាត់បន្ថយការទាស់គ្នាជាមួយគាត់ ហើយមិនថាប្អូនទាស់គ្នាខ្លាំងជាមួយគាត់ក្ដី ប្អូនអាចដោះស្រាយដោយសន្តិវិធី។ ដំបូងសូមពិចារណា . . .
មូលហេតុដែលនាំឲ្យមិនចុះសម្រុងគ្នា
សមត្ថភាពរិះគិត។ ពេលប្អូនធំឡើង ប្អូនចាប់ផ្ដើមចេះគិតវែងឆ្ងាយជាងចំពោះរឿងផ្សេងៗ។ បន្ថែមទៅទៀត ប្អូនក៏ចាប់ផ្ដើមមានគោលជំហរជារបស់ខ្លួន គឺអ្វីមួយចំនួនដែលប្រហែលជាខុសពីគោលជំហររបស់ឪពុកម្ដាយ។ ទោះជាយ៉ាងនោះក៏ដោយ គម្ពីរចែងថា៖«ចូរអ្នករាល់គ្នាគោរពឪពុកម្ដាយ»។—ដំណើរចាកចេញ ២០:១២
សូមចាំថា៖ ត្រូវមានគំនិតចាស់ទុំនិងចេះរៀបពាក្យនិយាយដើម្បីកុំឲ្យពួកគាត់មានអារម្មណ៍ថាយើងប្រកែកតវ៉ានឹងគាត់។
ភាពម្ចាស់ការ។ ពេលប្អូនមានគំនិតចាស់ទុំ ឪពុកម្ដាយរបស់ប្អូនទំនងជានឹងផ្ដល់សេរីភាពឲ្យប្អូនច្រើនជាង។ ប៉ុន្តែ សេរីភាពនោះប្រហែលមិនច្រើនដូចដែលប្អូនចង់បានទេ ហើយក៏មិនបានភ្លាមៗដូចដែលប្អូនត្រូវការដែរ។ នោះអាចជាហេតុនាំឲ្យប្អូននិងគាត់មិនចុះសម្រុងនឹងគ្នា។ ទោះជាយ៉ាងនោះក៏ដោយ គម្ពីរចែងថា៖«ចូរស្ដាប់បង្គាប់ឪពុកម្ដាយ»។—អេភេសូរ ៦:១
សូមចាំថា៖ ជាញឹកញយ ឪពុកម្ដាយផ្ដល់សេរីភាពឲ្យប្អូនច្រើនប៉ុនណា គឺអាស្រ័យថាប្អូនប្រើសេរីភាពដែលប្អូនមានរួចហើយយ៉ាងដូចម្ដេច។
អ្វីដែលប្អូនអាចធ្វើ
ផ្ដោតទៅលើតួនាទីរបស់ប្អូន។ ពេលខ្វែងគំនិតគ្នា ជាជាងចោទថានោះជាកំហុសឪពុកម្ដាយ សូមគិតពីអ្វីដែលប្អូនអាចធ្វើដើម្បីកុំឲ្យឈានទៅដល់ការឈ្លោះប្រកែកគ្នាជាមួយពួកគាត់។ ប្អូនចេហ្វ្រីបានប្រាប់ថា៖«ពេលមានការឈ្លោះប្រកែកគ្នា មិនតែងតែមកពីអ្វីដែលឪពុកម្ដាយនិយាយទេ តែមកពីរបៀបដែលយើងតបឆ្លើយទៅកាន់ពួកគាត់។ បើយើងនិយាយដោយស្លូតបូតទៅកាន់ពួកគាត់ នោះនឹងមិនឈានដល់ការឈ្លោះគ្នាទេ»។
គម្ពីរចែងថា៖ «ចូរខំអស់ពីសមត្ថភាពដើម្បីធ្វើឲ្យមានសន្តិភាពជាមួយនឹងមនុស្សទាំងអស់»។—រ៉ូម ១២:១៨
ការស្ដាប់។ ប្អូនសឺមែនថឺបានរៀបរាប់ថា៖«ខ្ញុំមិនសូវចេះអត់ធ្មត់ស្ដាប់ទេ តែខ្ញុំឃើញថា ពេលខ្ញុំស្ដាប់ឪពុកម្ដាយយ៉ាងយកចិត្តទុកដាក់ នោះពួកគាត់ក៏ស្ដាប់ខ្ញុំវិញដែរ»។
គម្ពីរចែងថា៖ «ត្រូវរហ័សស្ដាប់ មិនរហ័សនិយាយ»។—យ៉ាកុប ១:១៩
ការទាស់គ្នាប្រៀបដូចជាភ្លើងឆេះ បើមិនទប់ចិត្តទេ កំហឹងអាចផ្ទុះឡើង
សហការជាមួយពួកគាត់ដូចនៅក្នុងក្រុមតែមួយ។ សូមដោះស្រាយបញ្ហានៃការមិនចុះសម្រុងគ្នា ដូចជាការលេងកីឡាវាយកូនបាល់ជាក្រុម។ ប្អូននិងឪពុកម្ដាយនៅក្នុងក្រុមតែមួយ ហើយប្រកួតជាមួយនឹងក្រុមម្ខាងទៀតគឺបញ្ហានោះ។ ដូច្នេះ អ្នកដែលប្អូនគួរយកឈ្នះគឺបញ្ហានៃការមិនចុះសម្រុងគ្នា មិនមែនឪពុកម្ដាយទេ។ ប្អូនប្រុសម្នាក់ឈ្មោះអាដាមបានរៀបរាប់ថា៖«ពេលមានជម្លោះឬការខ្វែងគំនិតគ្នា ឪពុកម្ដាយគិតអំពីអ្វីល្អបំផុតសម្រាប់កូន តែកូនមានគំនិតផ្សេងចំពោះអ្វីល្អបំផុតសម្រាប់ខ្លួន។ ទោះជាយ៉ាងនោះក្ដី ដោយសារឪពុកម្ដាយនិងកូននៅក្នុងក្រុមតែមួយ គោលដៅពួកគេដូចគ្នាគឺយកឈ្នះគូប្រកួតម្ខាងទៀត ពោលគឺបញ្ហាមិនចុះសម្រុងគ្នា»។
គម្ពីរចែងថា៖ «ព្យាយាមធ្វើអ្វីដែលនាំឲ្យមានសន្តិភាព»។—រ៉ូម ១៤:១៩
ចេះយល់អារម្មណ៍។ ប្អូនស្រីម្នាក់ឈ្មោះសារ៉ា បានរៀបរាប់ថា៖«អ្វីមួយដែលជួយខ្ញុំ គឺខ្ញុំចាំថាឪពុកម្ដាយខ្ញុំក៏មានការពិបាករបស់ពួកគាត់ដែរ ហើយច្រើនដងបញ្ហានោះមកពីកូនៗទេ»។ ប្អូនខាឡេបានរៀបរាប់ថា៖«ខ្ញុំព្យាយាមស្រមៃគិតថាបើខ្ញុំជាឪពុកម្ដាយ តើខ្ញុំនឹងធ្វើយ៉ាងណាបើខ្ញុំត្រូវចិញ្ចឹមអប់រំកូននិងត្រូវដោះស្រាយបញ្ហានេះ? តើអ្វីផ្ដល់ប្រយោជន៍ច្រើនបំផុតដល់កូនខ្ញុំ?»។
គម្ពីរចែងថា៖ «បន្តយកចិត្តទុកដាក់ចំពោះអ្នកឯទៀត មិនត្រូវគិតតែអំពីរឿងផ្ទាល់ខ្លួនប៉ុណ្ណោះទេ»។—ភីលីព ២:៤
ចេះស្ដាប់បង្គាប់។ នេះជាចំណុចចុងក្រោយ ហើយជាអ្វីដែលគម្ពីរតម្រូវឲ្យប្អូនធ្វើ។ (កូឡុស ៣:២០) អ្វីៗនឹងដំណើរការយ៉ាងរលូន បើប្អូនធ្វើតាមយោបល់នេះ។ យុវនារីម្នាក់ឈ្មោះខារិន បានរៀបរាប់ថា៖«ពេលខ្ញុំធ្វើតាមអ្វីដែលឪពុកម្ដាយសុំខ្ញុំឲ្យធ្វើ ខ្ញុំមិនសូវតានតឹងចិត្តទេ។ ពួកគាត់លះបង់ច្រើនណាស់សម្រាប់ខ្ញុំ នេះជាអ្វីដែលខ្ញុំអាចតបស្នងទៅគាត់វិញ»។ ដូច្នេះ វិធីដ៏ល្អបំផុតដើម្បីចុះសម្រុងជាមួយឪពុកម្ដាយ គឺស្ដាប់បង្គាប់ពួកគាត់!
គម្ពីរចែងថា៖ «កន្លែងណាដែលគ្មានអុស នោះភ្លើងក៏រលត់ទៅ»។—សុភាសិត ២៦:២០
យោបល់។ បើប្អូនពិបាកប្រាប់អារម្មណ៍របស់ប្អូនដល់ឪពុកម្ដាយ ប្អូនអាចសរសេរក្នុងសំបុត្រឬផ្ញើសារទៅពួកគាត់ក៏បាន។ យុវតីម្នាក់ឈ្មោះអាលីសឺ បានរៀបរាប់ថា៖«ខ្ញុំបានធ្វើដូច្នេះ ពេលខ្ញុំពិបាកប្រាប់គំនិតរបស់ខ្ញុំដល់ឪពុកម្ដាយ។ នោះបានជួយខ្ញុំឲ្យប្រាប់អារម្មណ៍របស់ខ្ញុំ ដោយមិនស្រែកគំហក ឬនិយាយអ្វីមួយដែលធ្វើឲ្យខ្ញុំស្ដាយក្រោយឡើយ»។
លោកអ្នកក៏ប្រហែលជាចូលចិត្តដែរ
ទស្សនៈពីមនុស្សស្រករប្អូន
តើតាមរបៀបណាខ្ញុំអាចនិយាយជាមួយប៉ាម៉ាក់របស់ខ្ញុំ?
ប្អូនប្រហែលជានឹងទទួលប្រយោជន៍លើសពីការរំពឹងទុករបស់បងប្អូនទៅទៀត។
គំនូរជីវចលលើក្ដារខៀន
តើខ្ញុំអាចនិយាយយ៉ាងណាឲ្យឪពុកម្ដាយយល់ចិត្តខ្ញុំ?
តើអ្នកអាចប្រាស្រ័យទាក់ទងជាមួយឪពុកម្ដាយយ៉ាងដូចម្ដេច បើអ្នកមិនចង់និយាយ?
សំណួរពីយុវវ័យ
តើខ្ញុំគួរនិយាយប្រាប់ឪពុកម្ដាយយ៉ាងណាអំពីវិន័យដែលពួកគាត់ដាក់ឲ្យ?
សូមរៀននិយាយដោយគោរពទៅកាន់ឪពុកម្ដាយ។ បើប្អូនធ្វើដូច្នោះ ប្អូនប្រហែលជាភ្ញាក់ផ្អើលពេលឃើញលទ្ធផលល្អ។
សំណួរពីយុវវ័យ
តើខ្ញុំអាចធ្វើយ៉ាងណាដើម្បីឲ្យឪពុកម្ដាយទុកចិត្តខ្ញុំ?
របៀបអនុវត្តបីយ៉ាងដែលអាចជួយប្អូនឲ្យមានសេរីភាពច្រើនជាង។
សំណួរពីយុវវ័យ
ហេតុអ្វីឪពុកម្ដាយខ្ញុំមិនឲ្យខ្ញុំមានពេលសប្បាយសោះអ៊ីចឹង?
ឪពុកម្ដាយភាគច្រើនចង់ឲ្យកូនមានពេលសប្បាយ។ សូមពិចារណាមូលហេតុដែលពួកគាត់មិនអនុញ្ញាតពេលប្អូនសុំធ្វើអ្វីមួយ។ សូមមើលពីរបៀបដែលប្អូនជួយឲ្យគាត់អាចអនុញ្ញាតច្រើនជាងពេលប្អូនសុំធ្វើអ្វីមួយ
ចម្លើយចំពោះ១០សំណួរពីពួកយុវវ័យ
តើខ្ញុំអាចនិយាយយ៉ាងណាឲ្យឪពុកម្ដាយយល់ចិត្តខ្ញុំ?
វិធីទាំងនេះអាចធ្វើឲ្យប្អូននិយាយត្រូវគ្នាជាមួយនឹងឪពុកម្ដាយ
