ជំនួយសម្រាប់ក្រុមគ្រួសារ | អាពាហ៍ពិពាហ៍
តើគួររួមរស់ជាមួយគ្នាមុនរៀបការឬ?
គូជាច្រើនរស់នៅជាមួយគ្នាមុនរៀបការ។ គូខ្លះសម្រេចចិត្តដូច្នេះ ដោយសារពួកគេចង់ដឹងថាពួកគេចុះសម្រុងគ្នាឬអត់ ហើយពួកគេសង្ឃឹមថាបើពួកគេរស់នៅជាមួយគ្នាមុនរៀបការ នោះនឹងជួយឲ្យអាពាហ៍ពិពាហ៍របស់ពួកគេបានជោគជ័យជាងក្រោយពីពួកគេរៀបការ។ តើការរស់នៅជាមួយគ្នាមុនរៀបការជាគំនិតឈ្លាសវៃឬទេ?
ក្នុងអត្ថបទនេះយើងនឹងពិចារណា
តើគម្ពីរចែងយ៉ាងណា?
គម្ពីរផ្ដន្ទាទោសការរួមភេទក្រៅអាពាហ៍ពិពាហ៍។ ជាឧទាហរណ៍ គម្ពីរចែងថា៖ចូរ«ជៀសចេញពីអំពើប្រាសចាកសីលធម៌ខាងផ្លូវភេទ»។ (ថែស្សាឡូនិចទី១ ៤:៣; កូរិនថូសទី១ ៦:១៨) អំពើប្រាសចាកសីលធម៌ខាងផ្លូវភេទនេះក៏រួមបញ្ចូលការរួមភេទរវាងប្រុសនិងស្រីដែលកំពុងរស់នៅជាមួយគ្នា ទោះជាពួកគេទាំងពីរមានគម្រោងរៀបការក្រោយមកក៏ដោយ។ a គោលការណ៍គម្ពីរនេះ ជួយការពារកុំឲ្យមានផ្ទៃពោះមុនរៀបការ និងផលវិបាកផ្សេងទៀតដែលបណ្ដាលមកពីរួមរស់ជាមួយគ្នាមុនរៀបការ។
អាពាហ៍ពិពាហ៍ជាការរៀបចំពីព្រះ។ ពេលលោកផ្ដើមឲ្យមានអាពាហ៍ពិពាហ៍ដំបូង លោកមានប្រសាសន៍ថា៖«បុរសនឹងចាកចេញពីឪពុកម្ដាយខ្លួន ហើយនៅជាប់ជាមួយនឹងប្រពន្ធរបស់គាត់ រួចពួកគេទាំងពីរនាក់នឹងទៅជាសាច់ឈាមតែមួយ»។ (ដើមកំណើត ២:២៤) ពេលបុរសនិងស្ត្រីតាំងចិត្តស្មោះនឹងគ្នា នោះទំនងជាជួយឲ្យអាពាហ៍ពិពាហ៍របស់ពួកគេរឹងមាំជាងនិងមានសេចក្ដីស្រឡាញ់ច្រើនជាង។
តើការរស់នៅជាមួយគ្នាជួយអ្នកត្រៀមខ្លួនសម្រាប់អាពាហ៍ពិពាហ៍ឬ?
អ្នកខ្លះគិតថាមែន។ ពួកគេគិតថាបើពួកគេរស់នៅជាមួយគ្នាមុនរៀបការ នោះជួយពួកគេឲ្យចេះសហការគ្នាធ្វើកិច្ចការផ្ទះ និងអាចសង្កេតមើលទម្លាប់ប្រចាំថ្ងៃរបស់គ្នា។ ប៉ុន្តែ អ្វីទាំងនោះមិនមែនជាកត្តាសំខាន់ដែលធ្វើឲ្យអាពាហ៍ពិពាហ៍ជោគជ័យទេ។ កត្តាសំខាន់គឺជាការតាំងចិត្តស្មោះនឹងគ្នា។
តើគូសង្សាររៀនតាំងចិត្តស្មោះនឹងគ្នាតាមរបៀបណា? គឺពួកគេត្រូវស្មោះស្ម័គ្រនឹងគ្នាមិនថាគ្រាសប្បាយឬគ្រាពិបាកក្ដី ហើយពួកគេត្រូវចេះសហការគ្នាយកឈ្នះបញ្ហាផ្សេងៗ។ មិនមែនជាការសាករស់នៅជាមួយគ្នាដោយមានគំនិតថា បើអត់ត្រូវគ្នា អាចបែកគ្នានោះទេ។
សរុបសេចក្ដី៖ គូដែលសម្រេចចិត្តរស់នៅជាមួយគ្នាមុនរៀបការ មិនមែនត្រៀមខ្លួនសម្រាប់អាពាហ៍ពិពាហ៍ទេ តែពួកគេកំពុងត្រៀមខ្លួនបែកគ្នាវិញ។
គោលការណ៍គម្ពីរ៖ «ព្រោះមនុស្សទទួលផលតាមតែអ្វីដែលគេសាបព្រោះ»។—កាឡាទី ៦:៧
តើការរស់នៅជាមួយគ្នាជួយកាត់បន្ថយចំណាយឬ?
អ្នកខ្លះគិតថាមែន។ យោងទៅតាមការស្ទង់មតិមួយបានរកឃើញថានៅសហរដ្ឋអាម៉េរិក ក្នុងចំណោមមនុស្សពេញវ័យ១០នាក់ មាន៤នាក់ចាប់ផ្ដើមរស់នៅជាមួយគ្នាដើម្បីកាត់បន្ថយការចំណាយ។ ប៉ុន្តែ ក្រោយពីពួកគេរស់នៅជាមួយគ្នាបានមួយរយៈ ពួកគេឃើញថាបញ្ហាលុយកាក់នៅតែមានដដែល ហើយនេះជាបញ្ហាចម្បងដែលមកពីពួកគេមិនទាន់ត្រៀមខ្លួនសម្រាប់អាពាហ៍ពិពាហ៍(Pew Research Center)។
មិនត្រឹមតែប៉ុណ្ណោះ ការរស់នៅជាមួយគ្នាមុនរៀបការ អាចនាំឲ្យមានបញ្ហាផ្សេងទៀតដែរ ជាពិសេសសម្រាប់មនុស្សស្រី។ ជាឧទាហរណ៍ ក្រោយពីផ្ដាច់ទំនាក់ទំនងជាមួយគ្នា ស្ត្រីច្រើនតែជាអ្នកទទួលបន្ទុកចិញ្ចឹមបីបាច់កូន។
សរុបសេចក្ដី៖ តាមមើលទៅការរស់នៅជាមួយគ្នាមុនរៀបការ មានផលវិបាកច្រើនជាងផលចំណេញ។
គោលការណ៍គម្ពីរ៖ «ខ្ញុំជាយេហូវ៉ា ជាព្រះរបស់អ្នករាល់គ្នា ខ្ញុំជាអ្នកបង្រៀនអ្នករាល់គ្នាឲ្យទទួលប្រយោជន៍»។—អេសាយ ៤៨:១៧
តើការរស់នៅជាមួយគ្នាជួយបង្ការកុំឲ្យរៀបការខុសឬ?
អ្នកខ្លះគិតថាមែន។ ប៉ុន្តែ សៀវភៅមួយបានរៀបរាប់ថាអ្នកដែលរស់នៅជាមួយគ្នាមុនរៀបការ ស្មានថាស្រួលបែកគ្នា តែតាមពិតខុសពីការរំពឹងគិតរបស់ពួកគេឆ្ងាយណាស់(Fighting for Your Marriage)។ ហេតុអ្វី? ពីព្រោះក្រោយពួកគេរស់នៅជាមួយគ្នា ពួកគេឃើញថាមានភារកិច្ចដែលនាំឲ្យពួកគេពិបាកបែកគ្នាវិញ ដូចជាមានសត្វចិញ្ចឹម មានកិច្ចសន្យាជួលផ្ទះរួមគ្នា ឬត្រូវមើលថែកូនជាដើម។ អ្នកស្រាវជ្រាវពន្យល់ថាដោយសារបញ្ហាទាំងនេះ ពួកគេបង្ខំចិត្តរៀបការ ព្រោះពួកគេគិតថាធ្វើដូច្នោះស្រួលជាងបែកគ្នា។ b
សរុបសេចក្ដី៖ ការរស់នៅជាមួយគ្នាមុនរៀបការ មិនមែនជួយអ្នកឲ្យធ្វើការសម្រេចចិត្តត្រឹមត្រូវទេ តែធ្វើឲ្យអ្នកពិបាកផ្ដាច់ទំនាក់ទំនងជាមួយបុគ្គលនោះវិញ។
គោលការណ៍គម្ពីរ៖ «មនុស្សឈ្លាសវៃឃើញអន្តរាយមកក៏ពួនខ្លួន តែមនុស្សខ្វះបទពិសោធន៍បន្តដើរទៅទៀត ហើយរងផលពិបាក»។—សុភាសិត ២២:៣
តើមានជម្រើសប្រសើរជាងនេះទេ?
អ្នកអាចជៀសវាងពីបញ្ហាដែលរៀបរាប់ខាងលើនេះបាន ហើយអ្នកអាចមានអាពាហ៍ពិពាហ៍ដែលជោគជ័យដែរ។ តើតាមរបៀបណា? គឺដោយធ្វើតាមគោលការណ៍គម្ពីរឲ្យបានដិតដល់ដែលទាក់ទងនឹងអាពាហ៍ពិពាហ៍។ សូមចំណាយពេលស្គាល់បុគ្គលដែលអ្នកចង់រៀបការឲ្យបានល្មមគ្រប់គ្រាន់ មុននឹងអ្នកសម្រេចចិត្តរស់នៅជាមួយគ្នាក្នុងនាមជាប្ដីប្រពន្ធ។ គឺប្រសើរជាងឲ្យយើងជ្រើសរើសគូជីវិតដែលមានខ្នាតតម្រានិងគោលជំហរស្រដៀងគ្នា ជាជាងដើម្បីបំពេញចំណង់ផ្លូវភេទប៉ុណ្ណោះ។
គម្ពីរមានយោបល់ដែលអាចជួយឲ្យអាពាហ៍ពិពាហ៍ស្ថិតស្ថេរនិងមានសុភមង្គល។ c ជាឧទាហរណ៍ គម្ពីរមានគោលការណ៍ដែលអាចជួយអ្នក . . .
ឲ្យជៀសវាងចិត្តគំនិតមិនស្មោះត្រង់
ឲ្យទៅជាបុគ្គលដែលសមជាគូអាពាហ៍ពិពាហ៍ដ៏ល្អ
ឲ្យដឹងថាបុគ្គលដែលអ្នកកំពុងស្វែងយល់ចិត្តនោះ សមជាគូអនាគតរបស់អ្នកឬយ៉ាងណា
ដើម្បីរៀនថែមទៀតអំពីប្រធានបទទាំងនេះ សូមមើលផ្នែក«អាពាហ៍ពិពាហ៍និងក្រុមគ្រួសារ»ក្នុងគេហទំព័រjw.org។
គោលការណ៍គម្ពីរ៖ «គ្រប់ទាំងបទគម្ពីរបានត្រូវសរសេរក្រោមការដឹកនាំរបស់ព្រះ ក៏មានប្រយោជន៍សម្រាប់បង្រៀន»។—ធីម៉ូថេទី២ ៣:១៦
a សូមមើលអត្ថបទដែលមានចំណងជើងថា«តើការរួមភេទមុនរៀបការជាហេតុផលត្រឹមត្រូវក្នុងការបង្ហាញមនោសញ្ចេតនាស្នេហាឬ?»
b ដកស្រង់ពីអត្ថបទដែលមានចំណងជើងថា“Sliding Versus Deciding: Inertia and the Premarital Cohabitation Effect”ដែលបានត្រូវបោះពុម្ពក្នុងទស្សនាវដ្ដីFamily Relations ហើយបានរៀបរៀងដោយScott Stanley Galena Kline Rhoades និង Howard Markman។
c ក្នុងវប្បធម៌ខ្លះ ឪពុកម្ដាយជួយជ្រើសរើសគូអាពាហ៍ពិពាហ៍ឲ្យកូនរបស់ពួកគេ។ ពេលស្ថិតក្នុងករណីនោះ គម្ពីរអាចជួយឪពុកម្ដាយឲ្យដឹងថាតើគុណសម្បត្តិអ្វីខ្លះដែលពួកគាត់គួរស្វែងរកពីបុគ្គលនោះ។
លោកអ្នកក៏ប្រហែលជាចូលចិត្តដែរ
សំណួរនិងចម្លើយពីគម្ពីរ
តើគម្ពីរចែងយ៉ាងណាអំពីការរស់នៅជាមួយគ្នាដោយមិនរៀបការ?
ដំបូន្មានពីព្រះប្រាប់យើងអំពីរបៀបដែលយើងអាចមានសុភមង្គលក្នុងក្រុមគ្រួសារ ហើយខ្នាតតម្រារបស់លោកតែងតែផ្ដល់ប្រយោជន៍ជានិច្ចដល់អ្នកដែលធ្វើតាម។
សេចក្ដីបង្រៀនសំខាន់ៗពីគម្ពីរ
តើព្រះមានទស្សនៈយ៉ាងណាចំពោះអាពាហ៍ពិពាហ៍?
ព្រះចង់ឲ្យចំណងអាពាហ៍ពិពាហ៍របស់លោកអ្នកមានសុភមង្គល។ គម្ពីរមានដំបូន្មានល្អៗដែលបានជួយគូអាពាហ៍ពិពាហ៍ជាច្រើន។
គំនូរជីវចលលើក្ដារខៀន
តើជាស្នេហ៍ពិតឬជាការឈ្លក់វង្វេង?
សូមស្វែងយល់ថាតើអ្វីជាការឈ្លក់វង្វេងនិងអ្វីជាស្នេហ៍ពិត?
