ព្រះចេះឈឺចិត្ដ តើយើងអាចធ្វើឲ្យព្រះរីករាយយ៉ាងដូចម្ដេច?
ចូរបង្រៀនកូនរបស់អ្នក
ព្រះចេះឈឺចិត្ត តើយើងអាចធ្វើឲ្យព្រះរីករាយយ៉ាងដូចម្ដេច?
តើកូនធ្លាប់ឈឺខ្លាំងរហូតដល់យំទេ?— * យើងទាំងអស់គ្នាពិតជាធ្លាប់មែន។ ជួនកាល យើងយំដោយសារយើងពិបាកចិត្ត ឬក៏ដោយសារអ្នកណាម្នាក់និយាយមិនល្អអំពីយើងដែលជារឿងមិនពិត។ រឿងដូចនោះអាចធ្វើឲ្យយើងឈឺចិត្ត មែនទេ?— ព្រះក៏ចេះឈឺចិត្តដែរ ពេលដែលគេនិយាយកុហកអំពីលោក។ សូមយើងគិតអំពីរឿងនេះ និងពិនិត្យមើលរបៀបដែលយើងអាចធ្វើឲ្យព្រះរីករាយ មិនមែនធ្វើឲ្យលោកឈឺចិត្តទេ។
គម្ពីររៀបរាប់ថាមនុស្សខ្លះដែលប្រាប់ថាពួកគេស្រឡាញ់ព្រះ តែពួកគេបានធ្វើឲ្យ‹លោកព្រួយចិត្ត›វិញ។ ត្រូវហើយពួកគេបានធ្វើឲ្យព្រះឈឺចិត្តមែន! សូមឲ្យយើងពិនិត្យមើលមូលហេតុដែលព្រះយេហូវ៉ាឈឺចិត្ត ពេលយើងមិនធ្វើតាមអ្វីដែលលោកប្រាប់។
មនុស្សពីរនាក់ដំបូងដែលព្រះយេហូវ៉ាបានបង្កើតឲ្យរស់នៅផែនដីបានធ្វើឲ្យលោកឈឺចិត្តខ្លាំងណាស់។ ព្រះបានដាក់ពីរនាក់នោះឲ្យរស់នៅក្នុងសួនឧទ្យានមួយនៅផែនដី ហៅថា«សួនច្បារអេដែន»។ តើមនុស្សពីរនាក់នោះជាអ្នកណា?— មែនហើយ មុនដំបូងអាដាម ក្រោយមកអេវ៉ា។ សូមឲ្យយើងពិនិត្យមើល តើពួកគេបានធ្វើអ្វីដែលនាំឲ្យព្រះឈឺចិត្ត?
បន្ទាប់ពីព្រះយេហូវ៉ាបានដាក់ពួកគេឲ្យរស់នៅក្នុងសួនច្បារហើយ លោកបានប្រាប់ពួកគេឲ្យថែរក្សាសួនច្បារនោះ។ លោកក៏ប្រាប់ពួកគេដែរថា ពួកគេអាចមានកូន ហើយរស់នៅជាមួយគ្នាក្នុងសួនច្បារនោះដោយមិនស្លាប់។ ប៉ុន្តែមុនដែលអាដាមនិងអេវ៉ាមានកូន មានរឿងដ៏អាក្រក់មួយបានកើតឡើង។ តើកូនដឹងរឿងនោះទេ?— ទេវតាមួយរូបបានជំរុញឲ្យអេវ៉ាបះបោរប្រឆាំងនឹងព្រះយេហូវ៉ា ហើយក្រោយមកអាដាមក៏ចូលរួមដែរ។ សូមមើលរបៀបដែលរឿងនេះបានកើតឡើង។
ទេវតានោះបានធ្វើឲ្យសត្វពស់មើលទៅហាក់ដូចជាចេះនិយាយ។ អេវ៉ាចូលចិត្តអ្វីដែលសត្វពស់នោះបានប្រាប់នាង វាប្រាប់ថានាងនឹងបាន«ដូចជាព្រះ»ដែរ។ ដូច្នេះ នាងបានធ្វើតាមអ្វីដែលសត្វពស់បានប្រាប់។ តើកូនដឹងថានាងបានធ្វើអ្វីទេ?—
អេវ៉ាបានញ៉ាំផ្លែពីដើមឈើដែលព្រះបានប្រាប់អាដាមថា ពួកគេមិនត្រូវញ៉ាំផ្លែនោះឡើយ។ មុនដែលព្រះបានបង្កើតអេវ៉ា លោកបានប្រាប់អាដាមថា៖ «ឯងនឹងស៊ីផ្លែឈើទាំងអស់ក្នុងសួនច្បារនេះបានតាមចិត្ត តែឯត្រង់ដើមដឹងខុសត្រូវ នោះមិនត្រូវឲ្យឯងស៊ីផលឡើយ ដ្បិតនៅថ្ងៃណាដែលឯងស៊ី នោះនឹងត្រូវស្លាប់ជាមិនខាន»។
អេវ៉ាបានដឹងអំពីច្បាប់នោះ។ ក៏ប៉ុន្តែ នាងនៅតែបន្តសម្លឹងមើលទៅផ្លែឈើនោះ រួចនាងឃើញថាផ្លែឈើនោះ«បរិភោគបាន ក៏ជាទីគាប់ដល់ភ្នែក . . . នោះនាងក៏យកផ្លែមកបរិភោគ»។ ក្រោយមកនាងក៏បានចែកផ្លែឈើនោះឲ្យដល់អាដាម ហើយ«គាត់ក៏បរិភោគតាម»ដែរ។ តើកូនគិតថា មូលហេតុអ្វីអាដាមធ្វើដូច្នោះ?— នោះគឺដោយសារអាដាមបានស្រឡាញ់អេវ៉ាខ្លាំងជាងស្រឡាញ់ព្រះយេហូវ៉ា។ គាត់បានសម្រេចចិត្តធ្វើឲ្យអេវ៉ាពេញចិត្ត មិនមែនធ្វើឲ្យព្រះយេហូវ៉ាពេញចិត្តទេ។ ប៉ុន្តែ ការស្ដាប់បង្គាប់ព្រះយេហូវ៉ាគឺសំខាន់ជាងការស្ដាប់បង្គាប់អ្នកណាទាំងអស់!
តើកូនចាំសត្វពស់ដែលបាននិយាយជាមួយអេវ៉ាទេ? ដូចមនុស្សម្នាក់ដែលអាចធ្វើឲ្យតុក្កតាមើលទៅដូចជាកំពុងនិយាយ នោះបុគ្គលម្នាក់ក៏បានធ្វើឲ្យសត្វពស់មើលទៅហាក់ដូចជាចេះនិយាយដែរ។ តើសំឡេងដែលចេញពីសត្វពស់នោះជាសំឡេងរបស់អ្នកណា?— គឺជាសំឡេងរបស់«ពស់ដំបូងបង្អស់ ជាអ្នកដែលត្រូវហៅថាមេកំណាចនិងសាថាន»។
តើកូនដឹងនូវរបៀបដែលកូនអាចធ្វើឲ្យព្រះយេហូវ៉ារីករាយទេ?— កូនអាចធ្វើឲ្យលោករីករាយបាន ដោយស្ដាប់បង្គាប់លោកជានិច្ច។ សាថាននិយាយថា វាអាចធ្វើឲ្យមនុស្សទាំងអស់ធ្វើតាមវាបាន។ ហេតុនេះហើយ ព្រះយេហូវ៉ាដាស់តឿនយើងថា៖ «កូនអើយ ចូរឲ្យឯងមានប្រាជ្ញាឡើង ហើយឲ្យចិត្តអញបានរីករាយចុះ ដើម្បីឲ្យអញអាចតបឆ្លើយចំពោះមនុស្សដែលដៀលតិះដល់អញ»។ ប៉ុន្តែ សាថានបានដៀលតិះឬចំអកឲ្យព្រះយេហូវ៉ា ដោយប្រាប់ថាវាអាចនាំមនុស្សទាំងអស់ឲ្យបែរចេញពីការបម្រើលោក។ ដូច្នេះ សូមយើងធ្វើឲ្យព្រះយេហូវ៉ារីករាយ ដោយស្ដាប់បង្គាប់និងបម្រើលោក! តើកូននឹងខំព្យាយាមធ្វើឲ្យព្រះយេហូវ៉ារីករាយទេ?—
សូមអានពីគម្ពីររបស់អ្នក
លោកុប្បត្តិ ១:២៦-២៨; ២:១៥-១៧; ៣:១-៦
ការបើកបង្ហាញ ១២:៩; សុភាសិត ២៧:១១
[កំណត់សម្គាល់]
^ វគ្គ 3 បើអ្នកអានជាមួយកូនតូច ហើយឃើញថាមានអូសបន្ទាត់ នេះជួយរំលឹកអ្នកឲ្យផ្អាក និងលើកទឹកចិត្តកូនឲ្យឆ្លើយ។
[រូបភាពនៅទំព័រ១៤]
[រូបភាពនៅទំព័រ១៥]
