Siirte iwe tuguk che biitu

Siirte iwe menu alak

Baorinikab Jehovah

Kalenjin

Tos Imache Inai Imanda?

Tos Imache Inai Imanda?

IMANDA agobo nee? Imanda agobo teebutik che bo kamanut che kikoteeb bik che chang’. Imuchi kiteebekei teebutik che u chu:

  • Tos ibwatech Kamuktaindet iman?
  • Tos tun begu boriet ak nyalilda?
  • Nee ne yaaksei ye kagebegu?
  • Tos tun saptos che kigobek?
  • Tos asaite ano asi kogas Kamuktaindet?
  • Tos anyorunde ano boiboiyet eng’ sobet?

Tos inyorchi ano walutikab tebutichu? Ngot iteebe bik che chang’, inyoru walutik che terchin. Agot ye iteebe bik che bendi kanisa ak kandoikab kanisa, ko terchin walutikwak. Imuchi kobois walutik alake eng’ kasarta, yeitio, ko ma ko boisiei.

Nga no, ko mi bukuit agenge ne tinyei walutik che kitiengei. Noto ko bukuit ne maimuchi komwa lembech. Kimwa Jesu Kristo ye kingosae Kamuktaindet kole: “Imanit ng’olyondeng’ung’.” (Johana 17:17) Betusiechu, kingen Ng’olyondo noto kele Bukuit ne Tilil. Ye ing’any bukuini, inyoru walutik chebo iman eng’ Bibilia agobo tebutik chu kaaketeeb eng’ tai.

Tos Ibwatech Kamuktaindet Iman?

Chito ne keyumchigei bik che chang’

AMU NEE ASI KOTEEB BIK KOU NI: Kimenye ng’onyut ne mami imanit ago bichii. Dinisiek che chang’, koneeti kole nyalilda ne kinyoru ko magetab Kamuktaindet.

KIT NE INETI BIBILIA: Mayaei Kamuktaindet yaitio ole kigoi. Mwaei Job 34:10 kole: “Ingolooit eng’ Kamuktaindet kele imuchi koyai yaitiet; ak ingolooit eng’ Inendet ne bo Kamuktaet kele koyai tengekto.” Ting’e Kamuktaindet bik maget ne bo chamnyet. Noto amunee asi kiineetech Jesu kesaa kou ni: “Kwandanyo ne mi kipsengwet,…Ingonyo bounateng’ung’. Ingoyaak eng’ ng’ony mageng’ung’, ko u ye kiyaei eng’ kipsengwet.” (Matayo 6:9, 10) Ibwatech Kamuktaindet mising’ kot ki kogonech werinnyi konyo ng’ony asi kome agobo bik, asi kobiit kiyan kasuldaetab magutikyik.—Johana 3:16.

Soman kora Taunet 1:26-28; Jakobo 1:13; ak 1 Petero 5:6, 7.

Tos Tun Begu Boriet ak Nyalilda?

Bikab luget

AMU NEE ASI KOTEEB BIK KOU NI: Tesetai boriet kogeesu bik che chang’. Tiinyeech tugul nyalilda.

KIT NE INETI BIBILIA: Kisib komwa Kamuktaindet agobo betusiek che tun yaei kobit kalyet eng ng’ony komugul. Ye inaam koboi ng’ony Bounatetab kipsengwet, ‘ko magonetegei bik luget kogeny.’ Ne kata yaei ko u noto, ko tun “kotanyi rotokwak bo chok koek mogomboik che bo tuga.” (Isaia 2:4) Tun igesu Kamuktaindet yaitiet ak nyalilda. Iaroru Bibilia kole, uusei Kamuktaindet “beekab kong’ alak tugul eng’ konyekwak; ama komi meet kogeny; ama komi kateiyet kogeny, anan rirek, anan ng’wanindo: kogosiirto tuguk che bo tai [koboto yaitiet ak nyalilda ne mi rani].”—Ng’ang’utiet 21:3, 4.

Soman kora Tienwogikab Kalosunet 37:10, 11; 46:9; ak Mika 4:1-4.

Nee ne Yaaksei ye Kagebegu?

Ole kitupchin bik

AMU NEE ASI KOTEEB BIK KOU NI: Ineti dinisiek che chang’ kole, mi kit ne tesetai kosobei eng’ chi ye kakome. Iyani bik alak kole imuchi kous bik che kigobek che saptos, anan kobirei Kamuktaindet che kikayai yaitio kosoptos eng’ mat ne lalei koigeny.

KIT NE INETI BIBILIA: Ngo me chito ko ma komi. Mwaei Amdoindet 9:5 kole: “Ago manaei kiy age tugul che kigobek.” Ara anyun amu mengen kiy che kigobek, amakase kiy, ko maimuchi kous anan kotoret che saptos.—Tienwogikab Kalosunet 146:3, 4.

Soman kora Taunet 3:19 ak Amdoindet 9:6, 10.

Tos Tun Saptos che Kigobek?

Lakwet ne iimegei agobo meetab chamanennyi

AMU NEE ASI KOTEEB BIK KOU NI: Kimoche kesobche ak kemoche keboibochi sobet koboto chamanikchok. Kitinye tugul maget kegeer chamanikchok che kigobek kogeny.

KIT NE INETI BIBILIA: Tun king’eti bik che chang’ che kigobek. Kiiaror Jesu kole: ‘Tun mang’u che mi kererisiek.’ (Johana 5:28, 29) Nyoru boroindo che king’eeti komeng’is eng’ ng’onyut ne paradiso, kosubgei ak magetab Kamuktaindet ne tai. (Luka 23:43) Eng’ betusiek che bwanei kosubgei ak arorutietab Kamuktaindet, kotun konyoru borwek che miach ak sobondab koigeny bik che kasei it inendet. Mwaei Bibilia kole: “Namei emet che bo imanda, ak komeny oloto koigeny.”—Tienwogikab Kalosunet 37:29.

Soman kora Job 14:14, 15; Luka 7:11-17; ak Boisionik 24:15.

Tos Asaite Ano asi Kogas Kamuktaindet?

Chito ne saei

AMU NEE ASI KOTEEB BIK KOU NI: Saei bik eng’ dinisiek tugul. Nga no, kogeerei bik che chang’ kole magiwolu sautikwak.

KIT NE INETI BIBILIA: Kiinetech Jesu kole manyolu kegetyi sautik. Kimwa kole: “Ye osae, ko mat otes ng’alekab buch [“Amatogetyi ng’alek ye osae,” NW ] .” (Matayo 6:7) Ngot kemache kogas Kamuktaindet sautikchok, konyolu kesaa eng’ oret ne chamei. Asi keyai kou noto, ko nyolu kinetgei magetab Kamuktaindet ak kesaa kosubgei ak magennyi. Mwaei 1 Johana 5:14 kole: “Ngesom kiy age tugul ko u magennyi, kogasech.”

Soman kora Tienwogikab Kalosunet 65:2; Johana 14:6, 14; ak 1 Johana 3:22.

Tos Anyorunde Ano Boiboiyet eng’ Sobet?

Kwondo ne cheng’ei boiboiyet kobun somanetab Bibilia

AMU NEE ASI KOTEEB BIK KOU NI: Iyoni bik che chang’ kole konu boiboiyet robisiek, ngonaak chito anan ko kararanindo. Imuch kocheng’ tuguchu mising, nga no, ko manyoru boiboiyet kora.

KIT NE INETI BIBILIA: Kiibor Jesu kit ne konu boiboiyet kingomwa kole: “Iberurotin kosiir che kasei ng’olyotab Jehovah, ak korib.” (Luka 11:28) Kinyoru boiboiyet ne bo iman ngot kisub kakwoutik kecheng’ kit ne kimache mising’ kosir tugul, noto ko rubenyo agobo imanda ak kit ne makwech Kamuktaindet. Kinyorchini Bibilia imanit noto. Naetab imanda kotoretech kiguiye kit ne ma bo ak ne bo kamanut mising’. Ngot kigochi boroindo imanitab Bibilia kondoiwech eng’ tilutik ak boisionikchok, kotoretech kenyoru boiboiyet nebo iman.

Soman kora Kalewenaik 3:5, 6, 13-18 ak 1 Timoteo 6:9, 10.

Chuto ko walutikab Bibilia eng’ nwokindo chebo teebutik lo. Ara tos imache inai che chang’? Ngot ko i agenge eng che cheng’ei imanda, ko ne matiny imache inai kosiir chuto. Imuchi kiteebegei teebutik alak, che u: ‘Ngot ko ibwatech kamuktaindet, ko amu nee asi kochamda yaitio ak nyalilda koboch keny? Tos ayaei nee asi atech sobetab koinyu?’ Konu Bibilia walutik che ititootin eng’ teebutichu ak alak che chang’.

Nga no, ko mamoge kiy bik che chang’ konetgei Bibilia. Keere kou bukuit ne o ago ui kiguiyo sait age. Tos imache toretet inyoru walutik eng’ Bibilia? Konu Baorinikab Jehovah ortinwek aeng’ che imuch kotoretin.

Oret ne tai ko bukuit ne kigure, Makwech Kamuktaindet Keyai Nee? Kigisir kotoret bik kocheng’ walutik che togunotin eng’ Bibilia, agobo teebutik che bo kamanut. Oret ne bo aeng’, ko tetutiet ne bo kanetisietab Bibilia eng’ gaa ne ma kiyochei chi. Imuchi konyo koing’ung’ anan ko ole nyolchinin agenge eng’ Baorinikab Jehovah ne negiten ole imenye, asi oboisiei kasarta kitigin inetgei Bibilia. Kigotoret tetutioni bik milionisiek eng’ ng’ony komugul. Ki komwa che chang’ chekikonetgei kole: “Kaanyoru imanda!”

Mami kit ne bo kamanut kosiir imanda ne bunu Bibilia. Imandab Bibilia kotyachech eng’ bitonwek che yaach, teerchinet ak kaiyweet ne ma bo iman. Konech kamang’unet ak boiboiyet. Kimwa Jesu kole: “Ak onai imanda, ak kotiachak imanda.”—Johana 8:32.

1. Chito ne inetigei Bibilia; 2. Kwondo ne inetigei Bibilia

Ineetgei che Chang'

Som Kanetisietab Bibilia ne ma Kiyachei Chi

Amu Nee si Konyolu Ineetgei Bibilia?

Toreti Bibilia bik milionisiek eng’ ng’ony komugul konyor wolutik che bo teebutik che eechen eng’ sobet. Tos imache iegu agenge eng’ bichoto?