Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

NG’ALEK CHE KIGITES

Tos Kigisichei Jesu eng’ Arawetab Taman ak Aeng’?

Tos Kigisichei Jesu eng’ Arawetab Taman ak Aeng’?

MA MWAWECH Bibilia betut ne kigisichei Jesu. Nga u noto, ko mwawech kit ne yaech kiyan kele kima kesichei inendet arawetab Taman ak Aeng’.

Ibwat kit ne ki u emetab Bethlehem ole kigisikyin Jesu eng’ arawetab Taman ak Aeng’. Arawetab Yahudik ne kigiguure Kisleb, (Kisleb ko taunegei kwenutab arawetab Taman ak Agenge agoi kwenutab arawetab Taman ak Aeng’) ko ki arawet ne ki kaitit ago kiroboni. Arawet ne kirubei ko ki Tebet (arawet ne taunegei kwenutab arawetab Taman ak Aeng’ agoi kwenutab arawetab Agenge). Ki kasartab kaititiet eng’ kenyit ago kiroboni roptab koik kasarwek alak eng’ komoswek che mi tulonok. Ngegeer kit ne mwawech Bibilia agobo kit ne u emonoto bo Betlehem.

Mwae sirindetab Bibilia Esra kole, Kisleb ko ki arawet ne kinaat eng’ kaititiet ak ropta. Kingo kagomwa kole kimi tuiyet ne kigayumjigei Jerusalem “arawetab sogol [Kisleb], eng’ betutab tiptem ne bo arawanato,” ko aroru Esra kole, ‘kibotandos bik agobo ropta ne o.’ Kosubgei ak kit ne ki u emet eng’ kenyit, ko kimwae bik che kigayumgei kole: “Betusiekab ropta ne o, ama kimuchi ketononse eng’ sang’.” (Esra 10:9, 13; Jeremia 36:22) Noto amu nee si ko mestowek tugul che ki mi emonoto bo Betlehem, ko kigeere kole ma tesetai kotebyei icheget ak kechirekwak eng’ sang’ kemoi kingorik arawetab Taman ak Aeng’.

Mestowek ak kechirekwak

Betut ne kigisichei Jesu, ko kimi sang’ kemoi mestowek ak kiagikwak

Nga u noto, ko aroru Bibilia kole, kimi mestowek koribei kechirek kemoi eng’ sang’ kembout ne kigisichei Jesu. Eng’ iman, ko mwae sirindet Luka agobo betusiechoto kole, kitebyei mestowek “eng’ kewet koribei akwenywa ne bo kechirek kemoi” eng’ ye negit Betlehem. (Luka 2:8-12) Keer komie ile, kitebyei mestowek eng’ sang’ kemoi, kima kobendoti kityo eng’ sang’ bet. Kiribei kechirekwak eng’ sang’ kemoi. Tos mwaet ne kimwae kele kitebyei mestowek eng’ sang’ kemoi konamegei ak kaititiet ak ropta ne mi eng’ Betlehem eng’ arawetab Taman ak Aeng’? Achicha, ma namegei. Ko u noto, kit ne kiyaak eng’ kasarta ne kigisichei Jesu, koboru kole kima kesichei inendet arawetab Taman ak Aeng’.*

Mwawech Ng’olyotab Kamuktaindet komie betut ne kimee Jesu, nga u noto, ko mwawech tuguk tutigin agobo betut ne kigisichei inendet. Ibwatwech nito ng’alekab Laitoriat Solomon che mwae kole: “Kaigai kainet ne mie kosiir mwanik che bo kamanutiet ne o; ak kaigai betutab meet kosiir betut ne kisichei chi.” (Amdoindet 7:1) Ara anyun, nito amu nee si ko mwae Bibilia tuguk che chang’ che mengech agobo boisiet ak meetab Jesu, ago mwae tutigin agobo betutab sigennyi.


*  Si inai che chang’, igeer pechisiekab 176-179 eng’ bukuit ne kiguure Reasoning From the Scriptures ne kisire Baorinikab Jehovah.

← Keer somanet ne ng’alale ng’alechu