Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

Tos Ki Machei Kamuktaindet ko U Nito?

Tos Ki Machei Kamuktaindet ko U Nito?

NGISOMAN kasetit age tugul. Ngigeer television, anan igas redioit. Inyoru logoiywek che chang’ agobo yaitiet, boriosiek, ak chemargetab bolatosiek! Ibwat agobo kaimutiguk. Imuchi koimin mising’ miando anan ko meetab chamaneng’ung’. Imuchi igas ko u ole kigasta chito ne kigiguure Job, ne kimwa kole “ageere nyalildanyu.”—Job 10:15.

Teebegei ko u ni:

  • Tos nito kit ne ki machei Kamuktaindet koyaak eng’ ane ak bik alak
  • Tos amuchi anyorji ano toretet si kobiit amuitochi ak amukte kaimutikyuk?
  • Tos mi kamang’unet age tugul kele tun kigeere kalyet eng’ ng’ony?

Konu Bibilia walutikab teebutichuto eng’ oret ne kiboiboichini.

INETI BIBILIA KOLE TUN YAEI TUGUCHU KAMUKTAINDET ENG’ NG’ONY.

Boiyot ne yos ne kaweek koming’init

“Ak kouus inendet beekab kong’ alak tugul eng’ konyekwak; ama komi meet kogeny; ama komi kateiyet kogeny, anan rirek, anan ng’wanindo.”—Ng’ang’utiet 21:4


Chepto ne ing’wali ne kagomuch kolabat kogeny

“Yeityo kotoromben chito ne ing’wali ko u cheptirgichet.”—Isaia 35:6


Chito ne korat ne tau kokeertoi

“Koyatogis anyun konyekab che koriotin.”—Isaia 35:5


Kwondo ne kabaibait kogeer chemanennyi ne kaging’eet

‘Tun mong’u tugul che mi kererisiek.’—Johana 5:28, 29


Lakwet ne miani ne wendi komietu borto

“Ma tun mwaei ne meng’isiei kole, Amiani.”—Isaia 33:24


Mbarenikab bek

“Tun biitu chang’indab bek eng’ ng’ony.”—Tienwogikab Kalosunet 72:16


NYORU BOROTET NE BUNU KANETUTIKAB BIBILIA

Murenik aeng’ che inetegei Bibilia

Mesib imwa ile tuguk che kagisir eng’ pechisiek che kagosiirto ko ma iman. Kigoaror Kamuktaindet kole tun yae kosulda tuguchuto, ak komwae Bibilia ole tun yaitoi inendet ko u noto.

Nga u noto, ko bo kamanut Bibilia eng’ ortinwek che chang’. Mwae agobo kit ne imuchi iyai si kobiit iboiboichi sobet rani. Ibwat kitigin agobo kaimutiguk. Imuchi ko metinye robisiek, itinye kaimutikab got, mianwogik, anan koimin meetab chamaneng’ung’. Imuchi kotoretin Bibilia si imuitochi kaimutik rani, ak komuchi kogonin kagaigaet ye walun teebutik che u chu:

  • Amu nee si kenyalildosi?
  • Nee kit ne imuchi kotoretech kiterter kaimutikab sobet?
  • Tos kimuchi keyai nee si kobiit boiboiyet ne o eng’ gorikyok?
  • Nee ne yaaksei ye kibegu?
  • Tos tun kigeere chamanikyok che kigobek kogeny?
  • Tos kimuchi kenaite ano kele tun yae Kamuktaindet kosulda arorutikyik agobo betusiek che bwanei?

Amu isomani bukuini, koboru kole imache inai kit ne ineti Bibilia. Toretin bukuini. Keer ile, eng’ ratutietab ng’alek age tugul, ko mitei teebutikyik kabkelien eng’ pechit. Kigoboiboichi bik che chang’ koboisie oretab walutik ak teebutik ye ng’alale Bibilia ak Baorinikab Jehovah. Kitinye kamang’unet kele iboiboichini ak inye kanetutichuto. Ngoberurin anyun Kamuktaindet ye iboiboichini nguni inetgei kanetutikab Bibilia che bo iman!

IGUIYE BIBILIA NENG’UNG’ KOMIE

Bibilia

TINYEI Bibilia bukuisiek 66 koboto baronok. Kigipchei chuto eng’ kurgotik ak kaitosiek si kobiit kenyoru sirutik eng’ chokyinet. Ye kisir sirutiet eng’ bukuini, ko koitet ne tai ne igeere kogagobata kainetab bukuit anan ko baruet, ko kurget, ne rubei ko koitetab kurganato. Ko u, ngesir “2 Timoteo 3:16” koboru kole nito ko baruetab aeng’ ne bo Timoteo, kurgetab 3, koitetab 16.

Inae Bibilia eng’ chokyinet ye ing’any sirutik che kigisir eng’ bukuini. Kora, amu nee si menaam itet isoman Bibilia betut age tugul? Ye isoman kurgotik somok agoi mut eng’ betut, imuchi itar isomani Bibilia komugul eng’ kenyit agenge.