Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

SOMANETAB TAMAN AK ANG’WAN

Tos Iyai Nee si Inyoru Boiboyet eng’ Gong’ung’?

Tos Iyai Nee si Inyoru Boiboyet eng’ Gong’ung’?

Nee ne magat koyai chito si koek manong’otiot ne mie?

Tos imuchi kwondo koek osotiot ne mie eng’ or nee?

Nee ne magat koyai chito si koek sigindet ne mie?

Nee kit ne tos yai lagok si kobiit boiboyet eng’ gaa?

MACHEI Jehovah Kamuktaindet kobiit boiboiyet eng’ sobetab gong’ung’. Eng’ Ng’olyondennyi Bibilia, ko aroru Kamuktaindet komie boisiet ne magat koyai chi age tugul eng’ gab chi. Ngot koyai chi tugul boisiennyi eng’ gaa kosubgei ak ng’atutietab Kamuktaindet, konyoru boiboiyet. Kimwa Jesu kole: “Iberurotin kosiir che kasei ng’olyotab Jehovah, ak korib.”—Luka 11:28.

2 Boiboyetab gab chi ko tiengei kenai kele kitau Jehovah gab chi, inendet ne kiguure Jesu “Kwandannyo.” (Matayo 6:9) Gab chi age tugul eng’ ng’ony ko mi amu Kwandannyo ne bo kipsengwet—ago ingen inendet komie kit ne yaei gab chi koboiboitu. (Epesoek 3:14, 15) Ara anyun, tos nee ne ineti Bibilia agobo boisietab chi age tugul eng’ gab chi?

KITAU KAMUKTAINDET GAB CHI

3 Kiyai Jehovah bik che tai Adam ak Awa ak kotuiyo icheget koek manong’otiot ak osotiot. Kiinde icheget ng’onyut ne paradiso ne ki kararan ne bo kwong’ut, mbaretab Eden ak kolenji kosich lagok. Kimwa Jehovah kole: “Oiiye, otesage, si onyi ng’ony.” (Taunet 1:26-28; 2:18, 21-24) Nito ko ma atindiot ne ma bo iman, amu kiibor Jesu kole kit ne mwaei bukuitab Taunet agobo taunet ne bo sobetab gab chi ko iman. (Matayo 19:4, 5) Nga kinyoru kaimutik che chang’ ago ma u sobet rani ole kimaktoi Kamuktaindet, ko ngegeer amu nee si komugaksei kobiit boiboiyet eng’ sobetab gab chi.

4 Imuchi koyai chi age tugul kobiit boiboiyet eng’ gaa ngot koobor chamnyet ko u Kamuktaindet. (Epesoek 5:1, 2) Ara anyun, amu ma kimuchi kegeer Kamuktaindet, ko tos kiborunde ano chamnyet ko u inendet? Kimuchi kinetgei agobo atebetab Kamuktaindet amu kiiyok Werinnyi ne tai konyo ng’ony kong’eete kipsengwet. (Johana 1:14, 18) Kingo mi ng’ony Jesu Kristo, ko kiyai kiy age tugul ko u Kwandannyi eng’ oret ne ki ngogeer chito anan kogas ng’alek che kimwae, ko ki u yo ki mi chichoto ak Jehovah ak kogase kong’alali inendet. (Johana 14:9) Ko u noto, ye kinetgei agobo chamnyet ne kiibor Jesu ak kisub kaborunennyi, komuchi koyai age tugul kobiit boiboiyet eng’ gaa.

KABORUNET NE NYOLU KOSUB MANONG’OTAIK

5 Mwaei Bibilia kole magat koyachi manong’otaik osotikwak ko u ole kiyachindo Jesu alamalaikyik. Keer kit ne mwaei Bibilia: “Manong’otaichu, ocham osotikwok, ko u Kristo agine ne kicham kaniset, ak kogoitogei agobo inendet…Ko u noto, kanyolji manong’otaik agichek kocham osotikwak ko u ye chamei borwekwak ichegei. Inendet ne chamei osotiondennyi kochamegei inegei: amu mami chi ne wechei bortanyi; ago baei ak koribei, ko u kit ne yachin Kristo agine kaniset.”—Epesoek 5:23, 25-29.

6 Ole kichamdoi Jesu alamalaikyik ko kaborunet ne ititaat eng’ manong’otaik. Kicham Jesu “chechik agoi betutab let,” ago kiigoito sobondonnyi agobo ichek agot nga kima koititaatin icheget. (Johana 13:1; 15:13) Ko u noto, kemwachin manong’otaik kole: “Ocham osotikwok, amogochi ng’wanindo.” (Kolosiak 3:19) Nee kit ne tos toret manong’otiot ko boisiee kotigononito, ago mising’ ko yo ma tebi osotiondennyi eng’ ng’omnatet? Magat kobwat kole lelei agine, ak kit ne magat koyai si kobiit konyochi kaat Kamuktaindet. Tos nee kit ne magat koyai? Magat konyochi kaat bik alak, koboto osotiondennyi. Eng’ iman, ko magat koyai ko u noto osotiot agine. (Matayo 6:12, 14, 15) Tos igeere amu nee si kigomwa bik alak kole boiboiyetab gab chi ko katuiyetab ge ne bo bik aeng’ che nyochingei kaat kochamei?

7 Nyolu konai kora manong’otaik kole kirib Jesu alamalaikyik. Kiingen komie tuguk che kima komuchi koyai ak tuguk che kimachei icheget. Ko u, kingong’etyo, kolenji Jesu icheget: “Obwa okwege taban ole surkwen, si omuuny kitigin.” (Mariko 6:30-32) Osotik agichek komachei kibwat kerib. Mwae Bibilia agobo osotik kole ‘nyaluliotin’ icheget, ago ko u noto keng’atei manong’otaik ‘koteegis.’ Amu nee? Amu tinyei tugul, manong’otaik ak osotik “mieindab sobondo.” (1 Petero 3:7) Nyolu kobwat manong’otaik kole kit ne yae chito koek ne bo kamanut eng’ Kamuktaindet, ko kayanet, ma ko muren chito anan ko kwony.—Tienwogikab Kalosunet 101:6.

8 Mwaei Bibilia kole manong’otiot ne “chamei osotiondennyi kochamegei inegei.” Nito ko amu kimwa Jesu kole chito ak kwondonnyi ko “ma ko aeng’, ago borto agenge.” (Matayo 19:6) Ko u noto, ko ma nyolu koruiyo osotiot anan ko manong’otiot ak chi age ne ma agenge eng’ ichek. (Kalewenaik 5:15-21; Hebranik 13:4) Imuchi koyai ko u nito ngot kobwat age tugul magutikab age ma chechik kityo. (1 Korintoek 7:3-5) Bo kamanut kibwat ng’olyondoni: “Amu mami chi ne wechei bortanyi; ago baei ak koribei.” Magat kocham manong’otaik osotikwak ko u ye chamegei ichegei kongen kole, ngot ko ma yai ko u noto, ko yachei kowolji Jesu Kristo, amu inendet ko metinywa.—Epesoek 5:29; 1 Korintoek 11:3.

9 King’alale Paulo “rirenosiekab Kristo Jesu.” (Pilipik 1:8) Rirenetab Jesu ko ki atebet ne kararan, kiboibochi atebonito kwonyik che kiek kasubikyik. (Johana 20:1, 11-13, 16) Machei osotik ak ichek rirge eng’ manong’otoikwak.

KABORUNET NE NYOLU KOSUB OSOTIK

10 Si kobois gab chi komie, ko magat komi metit. Agot Jesu ko tinyei chito ne imining’ityinge inendet ne Metinnyi. “Metitab Kristo ko Jehovah,” ko u yo “metitab kobogoriot ko muren.” (1 Korintoek 11:3) Kamining’etab ge ne bo Jesu eng’ metinnyi ne noto ko Kamuktaindet, ko kaborunet ne kararan, amu achek tugul ketinye chito ne magat kimining’ityinge.

11 Bik che ma ititaatin ko yaei lelutik ago amu noto, ko ma nyumnyum kondochi korikwak eng’ oret ne kararan. Ara anyun, nyolu koyai nee osotiot? Ma nyolu kogeer inendet manong’otiondennyi ko u yo ma kiy anan ko tiem koek metit inendet. Mie kobwat osotiot kole bo kamanut talasiet eng’ taitab Kamuktaindet. (1 Petero 3:4) Ye testai inendet koboor mugulelda ne u nito, kogeere ko nyumnyum koming’init ge agot eng’ kasarwek che bichien. Ne siirei tugul, ko mwae Bibilia kole: “Ingogonyit [mising’] osotiot manong’otiondennyi.” (Epesoek 5:33) Ara anyun, ngot ko ma iyani manong’otiot Kristo koek Metinnyi? Mwachin Bibilia osotik kole: “Ogas it manong’otaikwok; si nganda magase it alak ng’olyot , kimuch kichuut ichek eng’ atebet ne mie ne bo osotikwak ama eng’ ng’olyot, ye keerei atebeng’wong’ ne tilil ne boto kaiyweisiet.”—1 Petero 3:1, 2.

Nee kaborunet ne kararan ne kiiborchi Sara osotik?

Kong’alaldos Sara ak Abraham

12 Ngot koyani anan ko ma iyani manong’otiot Kamuktaindet, ko ma iboru kele ma konyiti osotiot manong’otiondennyi ngot komwachi kabwatutiyik che imuch koteer ak chechik eng’ ng’omnatet. Imuch ko bo iman kabwatutikyik ak komuchi kotoret bik tugul eng’ gaa ngot kogas it inendet manong’otiondennyi. Nga kima iyan Abraham ng’alekab osotiondennyi Sara ye kingomwachi inendet agobo kit ne kiimuchi koyai agobo kaimutiet ne kimi goinywa, ko kimwachi Kamuktaindet Abraham kole: “Kas ng’alekab Sara.” (Taunet 21:9-12) Eng’ iman, ye kagotil manong’otiot ng’oliot ne bo let ago ma ng’oliot ne butei ng’atutikab Kamuktaindet ko magat komining’itgei osotiot.—Boisionik 5:29; Epesoek 5:24.

13 Imuchi koyai osotiot boisiennyi eng’ ortinwek che chang’ si korib gonnyi. Ko u, iboru Bibilia kole kwonyik che kigitun ko magat “kocham manong’otoikwak, kocham lagokwak, koek che bou kabwatutikwak, che tililen, che boisiei eng’ gorikwak, che taloen, che kase it monong’otaikwak.” (Tito 2:4, 5) Osotiot ak kametab lagok ne tinyei atebet ne u nito ko nyoru chamnyet ak kegonyiti inendet bik tugul che bo gonnyi. (Kalewenaik 31:10, 28) Amu katunisiet ko bik aeng’ che ma ititaatin che kigituiyo, ko mi kasarwek che bichien che imuchi koyai kobagachgei anan kobesio. Chamdoi Bibilia kobagachgei osotiot ak manong’otiot eng’ kasarwek alak. Nga u noto, kebagachgei ko kit ne nyigis, amu mwaei Bibilia ko u ni: “Amat kobagakta osotiot manong’otiondennyi…ak amat kometo manong’otiot osotiondennyi.” (1 Korintoek 7:10, 11) Chamdoi Bibilia kobesio bik che kigotungei ngot koyai sokset agenge eng’ ichek kityo.—Matayo 19:9.

KABORUNET NE ITITAAT NE NYOLU KOSUB SIGIK

14 Kiiborji Jesu sigik kaborunet ne ititaat eng’ ole kiyochindo lagok. Ye kingotiem bik alak kogirinda lagok si ma rikyi Jesu, kowolji kolenji: “Ochamji lagok che mengech kobwanja; amoete ichek.” Mwae Bibilia kole, yeitio koganab “icheget eng’ eunekyik, ak koberur, kogonoor eunekyik ichek.” (Mariko 10:13-16) Amu kiib Jesu kasarta ak lagok che mengech, ko tos ma nyolu iyai ko u noto ak inye eng’ weriguk ak tibiguk? Machei icheget kasartang’ung ne o. Magat iib kasarta inet icheget, amu mwachin Jehovah sigik koyai ko u noto.—Ne Kibwate Ng’atutik 6:4-9.

Nee kit ne imuchi konetgei sigik eng’ ole kiyachindo Jesu lagok?

1. Ng’alajin Jesu lagok; 2. Kwanda ne ng’aloljin werinnyi

15 Ye tesetai koyaitu ng’onyuni, ko machei lagok sigik che ribei icheget eng’ bik che cheng’ei kong’em icheget ko u, bik nyeree lagok. Keer ole kiribto Jesu alamalaikyik, che kiguure inendet “lagochu mengech.” Kingenam ak konegit kebar Jesu, koyai inendet kobiit oret ne mwee alamalaikyik. (Johana 13:33; 18:7-9) Ko i sigindet, ko magat inai ole tiemdoi Oindet kong’em lagoguk. Magat isib iteechi icheget.* (1 Petero 5:8) Tomo koeetu ng’oiyondit eng’ lagok ole kigoi ko u betusiechu kimi.

16 Eng’ kembout kotomo kome Jesu ko kibolio alamalaikyik agobo ng’o ne o eng’ ichek. Ne kita nerechei Jesu, ko kitestai koneet icheget eng’ ng’oliot ak kaborunet. (Luka 22:24-27; Johana 13:3-8) Ngot ko i sigindet, ko tos igeere ole imuktoi isub kaborunetab Jesu yo itoreti lagoguk? Eng’ iman ko magat kitigon lagok, nga u noto ko nyolu kitigon eng’ “kiruoget [“oret ne yamegei,” NW]” ma eng’ neregek. Magoi imach ing’alal ko ma ibwat “ko u rotwetab chok ne toorsei.” (Jeremia 30:11; Kalewenaik 12:18) Nyolu kitigon lakwet eng’ oret ne yae inendet kogeer kole bo iman katigono noto.—Epesoek 6:4; Hebranik 12:9-11.

KABORUNET NE NYOLU KOSUB LAGOK

17 Tos imuchi konetgei kiy lagok eng’ Jesu? Ee imuchi! Eng’ atebennyi, ko kiiborji Jesu lagok ole nyolu kogasta it sigikwak. Kimwa inendet kole: “Amwae tuguchu ko u ye kiineta Kwanda.” Ago kites kora kole: “Amu ayae kotugul tuguchuto chamaksei eng’ inendet.” (Johana 8:28, 29) Kigasei it Jesu Kwandanyi ne bo kipsengwet, ago mwachin Bibilia lagok kogas it sigikwak. (Epesoek 6:1-3) Nga ki lakwet ne ititaat Jesu, ko kigas it inendet sigikyik che kima koititaatin, Josep ak Maria. Eng’ iman ko kiyai nito kobaibait chi age tugul eng’ goinnywa!—Luka 2:4, 5, 51, 52.

18 Tos imuchi kogeer lagok ortinwek che imuchi koyai ko u Jesu si kobaibai sigikwak? Eng’ iman, kasarwek alak komuchi kogeer lagok ko ui kogas it sigikwak, nga u noto, ko nito kit ne machei Kamuktaindet koyai lagok. (Kalewenaik 1:8; 6:20) Kigas it Jesu Kwandanyi ne bo kipsengwet betusiek tugul, agot eng’ kasarwek che ki bichien. Kasarta agenge ye ki magetab Kamuktaindet koyai Jesu kit ne ki ui, komwa inendet kole: “Iistoena kikombani [kit ne ki magat koyai].” Nga u noto, ko kiyai Jesu kit ne kimwachi Kamuktaindet koyai, amu kinai kole kiingen Kwandannyi kit ne ki nyolu koyai eng’ kasarata. (Luka 22:42) Ye inetgei lagok kogas it sigikwak, koyae koboiboitu mising’ sigikwak ak Kwandannywa ne bo kipsengwet.#—Kalewenaik 23:22-25.

Nee kit ne nyolu kobwat bik che mengech ngonyor tiemutik?

Lakwet ne eesioi tiemutiakab lagok che somani tugul

19 Kitiem Oindet Jesu, ak kingen komie kora kele tiemei inendet lagok koyai kit ne ya. (Matayo 4:1-10) Boisiee Setani ne Oindet kimnatet ne tinye choronok eng’ chito, ne imuchi kouit kegirinda. Ara anyun, bo kamanut ne tia mat koyai choruandit lagok ak bik che yaei tuguk che yaach! (1 Korintoek 15:33) Kiyai choruandit cheptab Jakobo ne kigi kuure Dina ak bik che ki ma kootei Jehovah, nito ko kiyai kobiit kaimutik che chang’. (Taunet 34:1, 2) Ibwat ng’wanindo ne imuchi kogas bik eng’ gaa ngot ko kesesen (koruiyo ak chito) agenge eng’ ichek!—Kalewenaik 17:21, 25.

KIT NE IPCHIN GAB CHI KOBOIBOITU

20 Nyumnyumitu kaimutikab gab chi ngot ko boisiee ng’atutikab Bibilia. Eng’ iman, ngeboisie ng’atutichoto bo Bibilia ko yaei kobiit boiboiyet eng’ gaa. Ko u noto, manong’otaik, ocham osotikwok ak oyachi ko u ole kiyachindo Jesu Kaniset. Osotik, ogas it manong’otaikwok ak osub kaborunetab kwondo ne nyolunot ne ng’alale Kalewenaik 31:10-31. Sigik, onet lagokwok. (Kalewenaik 22:6) Kwanisiek, ‘obou gorikwok komie.’ (1 Timoteo 3:4, 5; 5:8) Ak okwek lagok, ogas it sigikwok. (Kolosaik 3:20) Mami chi ne ititaat eng’ gab chi amu yaei tugul tengek. Ko u noto, omining’itgei ak osomgei nyoetab kaat.

21 Eng’ iman, ko tinye Bibilia katigonutik ak kanetutik che chang’ agobo sobetab gab chi. Kora, konetech agobo ng’onyut ne leel ne bo Kamuktaindet ak paradiso ne kinyi bik che boiboi che boisiechin Jehovah. (Ng’ang’utiet 21:3, 4) Mi tainnyo kaberuret ne o ne tia! Agot rani, kimuchi kenyoru boiboiyet eng’ gorikyok ngot kisub ng’atutikab Kamuktaindet che mi Ng’olyondennyi, Bibilia.

KIT NE INETI BIBILIA

  • Magat kocham manong’otaik osotikwak ko u ole chamdoi borwekwak ichegei.—Epesoek 5:25-29.
  • Nyolu kocham osotik gorikwak ak kogonyit manong’otaikwak.—Tito 2:4, 5.
  • Magat kocham sigik, konet, ak korib lagokwak.—Ne Kibwate Ng’atutik 6:4-9.
  • Magat kogonyit lagok sigikwak.—Epesoek 6:1-3.

*  Torotet agobo ole kiribtoi lagok kenyorchin somanetab 32 eng’ bukuit ne kiguure Learn From the Great Teacher, ne kisirei Baorinikab Jehovah.

#  Mi kasarta agenge kityo ne ma nyolu kogas it lakwet sigindennyi, noto ko ngot kolenji sigindet kobut ng’atutietab Kamuktaindet.—Boisionik 5:29.


Teebutik che Kinetegei

1. Nee ne tos igochi gab chi boiboiyet?

2. Boiboiyetab gab chi kotiengei kenai nee?

3. Iarorundoi ano Bibilia taunetab gab chi, ago amu nee si kingen kele Bibilia mwae iman?

4. (a) Tos yai nee chi age tugul si kobiit boiboiyet eng’ gaa? (b) Si konyor boiboiyet gab chi, ko amu nee si ko bo kamanut konetgei icheget agobo sobetab Jesu?

5, 6. (a) Ole kiyachindo Jesu kaniset kogochin manong’otaik kaborunet eng’ or nee? (b) Si kobiit konyor chito nyoetab kaat ko magat koyai nee?

7. Nee kit ne kiibwat Jesu eng’ alamalaikyik ne kaborunet eng’ manong’otaik?

8. (a) Manong’otiot “ne chamei osotiondennyi kochamegei inegei” eng’ or nee? (b) Iboru nee keek “borto egenge” eng’ manong’otiot ak osotiondennyi?

9. Nee atebetab Jesu ne mwae Pilipik 1:8, ago amu nee si ko nyolu koborji manong’otoik atebonito osotikwak?

10. Iborjin Jesu osotik kaborunet ne kararan eng’ or nee?

11. Nyolu kogeerto ano osotiot manong’otiondennyi, ago yaaksei nee ye tebi eng’ oret ne kararan?

12. Amu nee si ko ma ya komwa osotiot kabwatutikyik eng’ konyit?

13. Nee kit ne mwachin Tito 2:4, 5 kwonyik che kigitun koyai? (b) Mwaei nee Bibilia agobo kebagachgei ak besiet?

14. Kiyachindo ano Jesu lagok, ago nee kit ne machei lagok eng’ sigikwak?

15. Tos imuchi koyai nee sigik si kobiit korib lagokwak?

16. Nee kit ne tos inetgei sigik eng’ ole kiyochindo Jesu alamalaikyik che kima koititaatin?

17. Kiigochi Jesu lagok kaborunet ne ititaat eng’ ortinwek ngorcho?

18. Amu nee si kigas it Jesu Kwandannyi ne bo kipsengwet betusiek tugul, ago ng’o ne boiboitu ngot kogas it lagok sigikwak rani?

19. (a) Tiemdoi ano Setani lagok? (b) Tos kastoi ano sigik ngot kotebi lagok atebet ne ya?

20. Si kobiit boiboiyet eng’ gab chi, ko magat koyai nee age tugul eng’ gaa?

21. Nee kaberuret ne mi tainnyo, ago kimuchi kenyorunde ano boiboiyet eng’ gorikyok rani?