Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

NG’ALEK CHE KIGITES

Tos Betutab Kiruoget ko Nee?

Tos Betutab Kiruoget ko Nee?

TOS ngibwat ko u nee Betutab Kiruoget? Ibwati bik che chang’ kole, tun kimuti bik agenge agenge koba taitab Kamuktaindet. Ye ibata noto, kiruokyi chi tugul. Nyoru alake paradiso ne bo kipsengwet, ko bendi alake araraitab mat ne lalei koigeny. Nga u noto, koboru Bibilia kit age ne ter kosubgei ak kasarito. Mwaei Ng’olyotab Kamuktaindet kole, kasarito ko ma kasarta ne kiywei, ne kata u noto ko kasarta ne bo kamang’unet ak kasarta ne kiweechei bik koek che ititaatin ko u ole ki u eng’ tai.

Kisomani eng’ Ng’ang’utiet 20:11, 12 ole kiiarorundo Johana agobo Betutab Kiruoget: “Ak kiageer ng’echeret ne o ak koleel ne bo laitornatet, ak inendet ne kitebe, ne kimwee togennyi ng’ony ak kipsengwet; ama kisikyi ole tebe. Ak kiageer che kigobek, che eechen ak che mengechen, kotonondos eng’ taitab ng’echeretab laitornatet; ak kigiyat bukuisiek: ak kigiyat bukuit age, noto ko bukuitab sobondo: ak kigiruokyi che kigobek eng’ tuguk che kiga kisirji bukuisiechoto, ko u boisionikwak.” Ng’o kiruogindet ne ng’alale sirutioni?

Jehovah Kamuktaindet ko Kiruogindet ne o ne bo bik. Nga u noto, kogoitoi inendet boisietab kiruoget. Kosubgei ak Boisionik 17:31, ko kimwa Paulo kole ‘kigochop Kamuktaindet betut, ne tun iruokyine ng’ony eng’ imanda eng’ chichoto kigonde.’ Chichito kiinde Jehovah koek Kiruogindet ko Jesu Kristo ne kiging’eet. (Johana 5:22) Ara anyun, tos taugei au Betutab Kiruoget? Ago tos ibei kasarta ne tia?

Iboru bukuitab Ng’ang’utiet kole taugei Betutab Kiruoget ye kagobata borietab Har-Magedon, betut ne tun king’emei ng’onyuni bo setani.* (Ng’ang’utiet 16:14, 16; 19:19-20:3) Ye kagobata borietab Har-Magedon ko tun keratei Setani ak oikyik eng’ keringet ne maigoksei kenyisiek elfut agenge. Eng’ kasarata ko tun egu kiruogik bik 144,000 kiruogik “ak kolaitoran koboto Kristo kenyisiek elfut.” (Ng’ang’utiet 14:1-3; 20:1-4; Romanik 8:17) Betutab Kiruoget ko ma kiy ne kichokyin keyaei eng’ betut agenge. Ibei kenyisiek elfut agenge.

Eng’ kasarata bo kenyisiek elfut ko tun ‘iruokyin Kristo Jesu che saptos ak che kigobek.’ (2 Timothy 4:1) “Che saptos” ko “tuiyet ne o” che tun ma king’emei eng’ Har-Magedon. (Ng’ang’utiet 7:9-17) Kigeer kora Johana ‘kotonondos che kigobek eng’ taitab ng’echeretab laitornatet’ ne bo kiruoget. Ko u ye kiga aror Jesu, ko tun “kasei kutinnyi [ne bo Kristo] tugul che mi kererisiek ak komong’” amu tun king’eeti. (Johana 5:28, 29; Boisionik 24:15) Ara anyun, tos tun tienge nee kiruogenywa?

Kosubgei ak ng’ang’utiet ne kiging’ang’ji Johana, ko “kigiyat bukuisiek,” ak “kigiruokyi che kigobek eng’ tuguk che kiga kisirji bukuisiechoto, ko u boisionikwak.” Tos bukuisiechuto koboru tuguk che kiga yai bik ko soptos? Achicha, tun ma tiengei kiruoget tuguk che kiga yai bik kotomo kobek. Tos kinae nee nito? Mwae Bibilia kole: “Inendet ne kigome kotiagat eng’ tengek.” (Romanik 6:7) Bik che king’eeti ko tun koma kiityin tengekwogik che kigosiirto. Ara anyun, bukuisiechuto ko tuguk che makyin Kamuktaindet bik koyai. Si kobiit komeng’is bik koigeny che tun ng’etu eng’ Har-Magedon ak che tun king’eeti, ko magat kogas it ng’atutikab Kamuktaindet, koboto magutik alak tugul che lelach che tun ng’ang’u Jehovah eng’ kasartab kenyisiek elfut agenge. Ko u noto, ko tun kiruokyin chi age tugul kosubgei ak kit ne yaei kasarata bo Betutab Kiruoget.

Tun igochin Betutab Kiruoget bik che chang’ kasarta konetgei agobo magetab Kamuktaindet ak koyai kosubgei ak kanetutichoto. Iboru nito kole, tun ko mi boisiet ne o mising’ ne bo kanetisiet. Eng’ iman ko tun “konetegei che menyei ng’ony imanda.” (Isaia 26:9) Nga u noto, ko tun ko ma tugul che iyani koyai magetab Kamuktaindet. Mwae Isaia 26:10 kole: “Agot nda kiborji chamet kiptengekyot, ko mainetigei imanda kora; yaei inendet ne ma bo iman eng’ emetab imanda, ama keerei telunatetab Jehovah.” Tun kiwong’u kiptengeginichuto kogeesgei eng’ Betutab Kiruoget.—Isaia 65:20.

Kobegu Betutab Kiruoget, ko tun ko ‘kagosopcho bik’ tugul ak koek che ititaatin. (Ng’ang’utiet 20:5) Ara anyun, tun eng’ Betutab Kiruoget koweeksei bik tugul koegu che ititaatin ko u ye ki u eng’ tai. (1 Korintoek 15:24-28) Ye ibata kobiit tiemutiet ne bo let. Tun kitiachi Setani komong’ eng’ keringet ne ma igoksei ak kichamji kotiem bik kogeny konyil agenge ago ne bo let. (Ng’ang’utiet 20:3, 7-10) Bik che kagirinda Setani, ko boiboichin kasuldaetab arorutioni bo Bibilia: “Namei emet che bo imanda, ak komeny oloto koigeny.” (Tienwogikab Kalosunet 37:29) Ee, tun egu Betutab Kiruoget kaberuret eng’ bik tugul che iyanotin!


*  Kaigai keer ng’alek agobo Har-Magedon, eng’ Insight on the Scriptures, Bukuit ne tai, pechisiekab 594-595, 1037-1038, ak somanetab 20 eng’ bukuit ne kiguure Worship the Only True God, bukuisiechuto ko kisirei Baorinikab Jehovah.

← Keer somanet ne ng’alale ng’alechu