Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

NG’ALEK CHE KIGITES

“Sobondo” ak “Tamirmiriet” ko Nee?

“Sobondo” ak “Tamirmiriet” ko Nee?

TOS ngigas ng’alek “sobondo” ak “tamirmiriet,” kobwatun nee? Iyani bik che chang’ kole, ng’alechuto ko kit ne mi borwekyok orit ne ma toogu ago ma meei. Ibwati kole ngome chito komandoi kioto ma toogu ak kotestai kosob. Amu kigonaak kayananito, ko kwong’dos bik che chang’ ye inetgei kole ma ineti Bibilia agot kitigin ko u nito. Ara anyun, tos sobondo ak tamirmiriet ko nee kosubgei ak Ng’olyotab Kamuktaindet?

BOISIEE BIBILIA NG’OLYOT “SOBONDO” ENG’ OR NEE?

Ne tai, keer agobo sobondo. Imuchi ko ta ibwati ile kigakisire Bibilia eng’ tai kutitab Hebranik ak Yunanik. Kingesirei agobo sobondo, ko kiboisiee siriikab Bibilia ng’olyotab Hebranik, ne′phesh anan ng’olyotab Yunanik, psy·khe′. Kinyoru ng’alechu aeng’ konyil che ma regune 800 eng’ Sirutik, ak eng’ Bibilia ne bo New World Translation ko boisiee “sobondo” konyil che chang’. Ye ichigil oret ne boisiee Bibilia “sobondo” anan “sobonwek,” igeere ile ng’olyondonito koboisie eng’ (1) bik, (2) tiong’ik, anan ko eng’ (3) sobet ne boiboichin chito anan ko tiondo. Ngegeer sirutik che iboruech tuguchuto somok teerchin.

Bik. ‘Eng’ betusiekab Noa ko kigisor che ng’ering’ eng’ beek, choto ko ki bik [psy·khe′] sisiit.’ (1 Petero 3:20) Eng’ yu ng’olyotab Yunanik psy·khe′ ko kigisir kele “bik,” ago chuto ko Noa, osotiondennyi, werikyik somok ak osotikwak. Mwae Komong’u 16:16 agobo ng’atutik che kigigochi Israelik kosubgei ak kayumetab mana. Kigimwachi icheget kole: “Ingoyum chi tugul…che yamei koitetab bikwok, [eng’ kutitab Hebranik, ne′phesh] ingoipchi chi age tugul bikyik che mi gonnyi.” Ko u noto anyun, chang’indab mana che kigiyumi, ko kitiengei koitetab ne′phesh anan bik che kimi got age tugul.

Tiong’ik. Kisomani eng’ Bibilia agobo tuguk che kiyai Jehovah kele: ‘Ak kimwa Kamuktaindet kole, Ingochang’a koek ng’isiat tuguk che soptos [eng’ kutitab Hebranik ne′phesh] eng’ beek, ingotirirenso taritik eng’ baragutab ng’ony eng’ soetab kipsengwetisiek. Ak kimwa Kamuktaindet kole, Ingoii ng’ony tuguk che soptos ko u kergeindanywa, tuga, ak che ichuutegei, ak tiong’ik che bo ng’ony ko u kergeindanywa; ak kiyaak ko u noto.’ (Taunet 1:20, 24) Kosubgei ak sirutichu, njirenik, tuga ak tiong’ik che bo ng’ony keguure tugul eng’ ng’olyotab Hebranik, ne′phesh.

Sobondo. Eng’ kasarwek alak, ng’olyot “sobondo” koboru sobondab chito. Kimwachi Daudi Jonatan kolenji: “Nee chalwoktanyu eng’ taitab Kwandang’ung’, si kocheng’ei sobondanyu?” (1 Samuel 20:1) Tos kicheng’e nee Saul? Kicheng’ei kowong’ sobondab Daudi. Ibwat ng’alekab Jesu: “A mestowot ne mie: igoitoi mestowot ne mie sobondanyi agobo kechirek.” (Johana 10:11) Kiigoito Jesu sobondanyi agobo bik. Eng’ sirutichu, ngolyot “sobondo” koboru komie ko chito ne sobei. Inyoru ng’alek alak che chang’ agobo “sobondo” eng’, 1 Laitorinik 17:17-23; Matayo 10:39; ak Johana 15:13.

Ye inetgei che chang’ agobo Ng’olyotab Kamuktaindet inae ile ma mi eng’ Bibilia komugul ole mwae agobo “sobondo” kole “ma meei” anan “tebyei koigeny.” Ne kata u noto, komwae sirutik kole meei sobondo. (Esekiel 18:4) Ko u noto, kosubgei ak Bibilia, ko kuure chito ne kagome sobondo ne kagome ago mami kit ne sobei eng’ chito ye kagome.—Amdoindet 9:5, 10.

NG’ALEK RU′ACH AK PNEU′MA KO U YE KIBOSIEE ENG’ BIBILIA

Kigiwal eng’ Bibilia alak ng’olyot ne eng’ kutitab Hebranik ko ru′ach ak ne eng’ kutitab Yunanik ko pneu′ma koek sobondo, kabusetab sobondo anan tamirmiriet. Eng’ kutuswek che kigiboisie kesire Bibilia eng’ tai, koboru kole, ng’olyot ru′ach ak pneu′ma ko kimnatetab sobondo eng’ tuguk che soptos che bo ng’ony. Ko u ye mwae Tienwogikab Kalosunet 104:29 kole: “Inemu [“tamirmiriet,” NW; Hebranik ru′ach], si kobek, ak koweektagei temburiekwak.” Ak komwae Luka 8:55 kole “koweek anyun tamirmiriennyi [pneu′ma], ak kong’eet ngunoto.” Eng’ sirutichoto anyun, ru′ach ak pneu′ma ko kimnatet ne yae borto kosob. Ngo mami ru′ach anan pneu′ma, ko meat borto. Ko u noto, ko eng’ Bibilia ne kiguure New World Translation, ngomwae agobo ng’olyot ru′ach, ko boisiee ng’olyot kabusetab sobet ma tamirmiriet kityo. Ko u, kosubgei ak Maranet ne bo betusiekab Noa komwae Taunet 6:17 kole: “Aipchini ane ng’ony maranet ne o ne bo beek, si ang’eme borwek tugul, age tugul ne tinyei [“tamirmiriet,” NW; Hebranik ru′ach], eng’ kureretab kipsengwet.” (Taunet 7:15, 22) Ko u noto, ng’olyot tamirmiriet, ru′ach ak pneu′ma, ko kimnatet ne ma toogu ne tinyei tuguk tugul che soptos.

Mache borto kimnatetab sobet ko u yo mache redioit mat ne mi koik si kobiit kobois. Si kobiit kiguiye igeer kaborunoni; ibwat agobo redioit. Ye inde koik redioit ak iat, ko yae mat ne mitei koik kong’alal redioit. Ko u noto, ngo mami koik, ko ma boisiei redioit. U noto kora redioit ne boisiee sitimet, nginem eng’ sitimet ko ma boisiei. Ko u noto, ko machei borwekyok kimnatetab sobet si kobiit kosob. Kora, ko u matab koik, ko ma kasei kiy tamirmiriet [ru′ach anan pneu′ma] ago ma imuchi kobwat. Kimnatonoto ko ma u chito. Nga u noto, ye mami kimnatonoto bo sobet, kobegu borwekyok “ak koweektagei temburiekwak,” ko u ole mwaitoi sirindetab tienwogikab kalosunet.

redioit

Mwae Amdoindet 12:7 agobo meetab chito kole: “Ak koweekyigei ng’ung’unyek [bortonnyi] ng’ony ko u ye kinye, ak koweekyigei [“tamirmiriet,” NW; Hebranik ru′ach] Kamuktaindet ne kigonu.” Ye istogei kimnatetab sobet eng’ borto, ko meei borto ak koweek ole ki bunu, ng’ony. Ko u noto, koweektogei kimnatetab sobet ole ki bunu, ne noto ko Kamuktaindet. (Job 34:14, 15; Tienwogikab Kalosunet 36:9) Nito ko ma iboru kole inaami banda kimnatetab sobet kwendi kipsengwet. Ne kata u noto, koboru kole eng’ chito ne kagome, ko kamang’unennyi ne bo betusiek che bwanei ko tiengei Jehovah Kamukaindet. Mitei eunekab Kamuktaindet sobetab chichoto. Kamuktaindet inegei ne tinye kimnatet koweekyi chito kimnatetab sobet anan ko tamirmiriet, si kobiit kosob kogeny.

Igaigaech ne tia kenai kele, nito ko kit ne tun yae Kamuktaindet agobo bik tugul che imung’tos eng “kererisiek”! (Johana 5:28, 29) Eng’ betutab ng’eetiet, ko tun yae Jehovah borwekab bik che ruitos eng’ meet ak kogochi tamirmiriet anan kimnatetab sobet si kobiit kosopcho. Tun ko betut ne bo boiboiyet ne o ne tia noto!

Ngot imache inetgei che chang’ agobo ng’alek “sobondo” ak “tamirmiriet” ko u ole kiboisiee eng’ Bibilia, inyoru logoiywek che bo kamanut eng’ bukuit ne kiguure What Happens to Us When We Die? ak eng’ pechisiekab 375-384 che bo bukuit ne kiguure Reasoning From the Scriptures, bukuisiek che kisire Baorinikab Jehovah.

← Keer somanet ne ng’alale ng’alechu